• A Bondjé ki té ké chwazi l’. « Mo, mo mété mo rwa [...]. Mo ké bay to nasyon-yan pou to éritaj é mo ké bay to tout latè-a » (Psaume 2:6, 8).

• I té ké érité di tronn rwa David. « Roun timoun né pou nou, yé bay nou roun fis [...]. So dominasyon pa ké fini é lapè non plis, asou tronn David é annan so rwayonm. I ké byen tchenbé » (Isaïe 9:6, 7).

• I té ké fèt Bètléyèm. ‘O Bètléyèm, a koté to sa-la ki ké chèf ké soti pou mo. So grandò ké rivé jis annan bout latè-a’ (Michée 5:2, 4).

• Moun-yan té ké rijété l’ ké tchwé l’. « Yé té ka méprizé l’ é i pa té gen valò pou nou. [...] Yé pèrsé l’ pou nou péché, yé krazé l’ pou nou fot » (Isaïe 53:3, 5).

• I té ké résisité ké rousouvwè laglwar. « To pa ké anbandonnen mo annan Tonm-an. To pa ké pèrmèt ki to fidèl wè trou-a. [...] A to drèt, i gen lajwa pou tout-tan » (Psaume 16:10, 11).

Annan tout moun ki ja viv asou latè-a, rounsèl ka korèsponn ké dèskripsyon di pi bon chèf i pouvé gen-an, é sa moun-an, a Jézi Kris. Roun zanj té di Mari, manman Jézi : « Bondjé ké bay li tronn so gangan David [...], é so rwayonm pa ké janmen fini » (Luc 1:31-33).

Lò i té asou latè-a, Jézi pa janmen divini chèf. A annan syèl-a i divini Rwa rwayonm Bondjé-a, é a dipi annan syèl-a i ké dirijé latè-a. Poukisa a li ki pi bon Chèf i pouvé gen ? Men sa i fè lò i té asou latè-a.

•   I fè bon bagaj pou moun-yan. Jézi té ka idé ki wonm ki fanm, ki timoun ki granmoun, san chaché savé yé nasyonalité ouben si yé té rich ou si yé té pov (Matthieu 9:36 ; Marc 10:16). Lò roun mouché ki té gen lalèp vini sipliyé l’ é di li : « Si to lé, to pouvé pirifyé mo », Jézi té plen ké pityé é i géri sa mouché-a (Marc 1:40-42).

• I ansényé kouman pou fè Bondjé plézi. Jézi di : « Zòt pa pouvé travay kou roun èsklav pou Bondjé ké pou Soumaké-a an menm tan. » I di nou osi ki nou divèt aji ké ròt-ya kou nou menm nou té ké lé yé aji ké nou, a roun prensip ki yé ké aplé apré Règ annò-a. I montré nou osi ki Bondjé pa ka yenki gadé sa nou ka fè, mé sa nou ka pansé ké rousanti gen enpòrtans pou li osi. A pou sa, si nou lé fè Bondjé plézi, nou divèt kontrolé sa nou ka rousanti ofon nou tchò menm (Matthieu 5:28 ; 6:24 ; 7:12). Épi osi, i byen èspliké ki si nou vréman lé gen tchò kontan, nou divèt anprann kouman Bondjé lé wè nou aji, épi aji dapré sa mannyè-a (Luc 11:28).

• I ansényé kisa sa lé di kontan ròt moun. Paròl ké aksyon Jézi té gen fòrs, é sa té ka pousé moun-yan ki té ka kouté l’ aji. « Moun-yan té èstébékwé akoz di mannyè i té ka ansényé-a, paské i té ka ansényé kou roun wonm ki gen otorité » (Matthieu 7:28, 29). I di : « A pou zòt kontan zòt lèlmi ». I jis priyè pou déztrwa annan sa-ya ki té rèsponsab di so lanmò : « Papa, pardonnen-yé, paské yé pa savé sa yé ka fè » (Matthieu 5:44 ; Luc 23:34).

Jézi gen tout kalité ki fo pou i sa roun bon chèf pou monn-an, roun chèf ki plen ké byenvéyans ké bonté. Mé kitan i ka koumansé dirijé ?