ARTIK POU ÉTIDYÉ 7
KANTIK 15 Vive le Premier-né de Jéhovah !
Ki bénédiksyon to ka jwenn pas Jéova ka pardonnen to ?
« Vré pardon-an, a koté to nou ka jwenn li » (PS. 130:4).
SA NOU KÉ ANPRANN
Nou ké wè plizyèr bèl èkzanp ki annan Labib é ki ké idé nou gen plis rékonésans pou vré pardon-an Jéova ka bay nou chak.
1. Poukisa nou pouvé di ki zafè pardon-an pa toujou klè pou nou ?
« MO KA pardonnen to. » Si nou savé nou di ouben nou fè roun bagaj ki fè roun moun lapenn, épi moun-an ka di nou ki i ka pardonnen nou, nou soulajé ! Mé kisa moun nou fè lapenn-an lé di lò i ka di nou sa ? Ès i lé di ki nou zanmi toujou ? Ouben ès i pa lé nou palé di sa ankò ? Sa zafè pardon-an pa toujou klè pou nou.
2. Kouman Labib ka palé di pardon Jéova-a ? (gadé nòt-a osi).
2 Jéova pa ka pardonnen nou péché menm fason nou ka pardonnen nou konpanyen. Pyès moun pa pouvé pardonnen menm fason Jéova ka fè l’. Moun-an ki ékri Psaume 130-a di Jéova : « Vré pardon-an a, a koté to nou ka jwenn li, pou tout moun adoré to » (Ps. 130:4). Wi, Jéova ka bay « vré pardon-an ». É i ka montré nou kisa pardonnen lé di vréman. Détan, pou palé di fason Jéova ka pardonnen, moun ki ékri Ékritir ébrayik-ya sèrvi roun mo yé pa janmen ka sèrvi pou palé di fason moun-yan ka pardonnen.
3. Poukisa nou pouvé di ki Jéova pa ka pardonnen menm fason moun ka pardonnen yé konpanyen ? (Isaïe 55:6, 7).
3 Lò Jéova ka pardonnen roun moun, i ka éfasé so péché. Moun-an pouvé viré byen ké li. Nou byen kontan Jéova ka pardonnen nou nèt é i pa ka janmen las fè l’ (li Isaïe 55:6, 7).
4. Kouman Jéova ka idé nou konprann a kisa ki vré pardon-an ?
4 Kou nou pa parfè é Jéova pa ka pardonnen menm fason nou ka fè l’, kouman nou pouvé konprann a kisa ki vré pardon-an ? Jéova ka sèrvi plizyèr èkzanp annan Labib pou montré nou kouman i ka pardonnen nou. Annan sa artik-a, nou ké wè déztrwa annan sa èkzanp-ya. Yé ké montré nou ki lò nou ka répanti, Jéova ka éfasé nou péché é i ka pèrmèt nou viré byen ké li. Anplis di sa, sa èkzanp-ya ké fè nou gen plis rékonésans pou nou Papa ki kontan nou, ki lé fè nou konprann ki i ka pardonnen nou.
JÉOVA KA JITÉ TO PÉCHÉ
5. Kisa Jéova ka fè lò i ka pardonnen nou ?
5 Souvan, Labib ka konparé péché-ya ké charj ki lou. Men kouman rwa David palé di so péché : « Mo fot pi rot pasé mo tèt. Yé kou roun charj, yé pi pézan pasé sa mo pouvé poté » (Ps. 38:4). Mé Jéova ka pardonnen péché sa-ya ki ka répanti (Ps. 25:18 ; 32:5). Mo ébré yé ka sèrvi pou di « pardonnen » lé di « lévé » ouben « poté ». Donk, nou pouvé di ki Jéova kou roun mouché ki gen fòrs é ki ka pran nou péché ki byen lou asou nou do pou mété yé lwen di nou.
« To pardonnen mo fot » (Ps. 32:5).
6. Jik ki koté Jéova ka mennen nou péché alé ?
6 Annan Psaume 103:12, i gen rounòt èkzanp ki ka montré nou ki koté Jéova ka mété nou péché. Sa vèrsé-a ka di : « Menm fason koté solèy-a ka lévé lwen di koté i ka kouché-a, a konsa i ka mété nou péché lwen di nou. » Solèy-a pa janmen ka kouché koté i ka lévé é sa dé koté-ya pa ka janmen kontré. Donk, sa lé di ki Jéova ka pran nou péché é ka mennen yé pi lwen pasé sa nou pouvé imajiné. A pa ti bèl sa bèl ! Jéova ka pardonnen nou nèt.
« Menm fason koté solèy-a ka lévé lwen di koté i ka kouché-a » (Ps. 103:12).
7. Ki èkzanp ka byen èspliké sa Jéova ka fè ké nou péché ? (Michée 7:18, 19).
7 Si Jéova ka mennen nou péché lwen di nou, ès a pou gardé yé ? Non. Men sa rwa Ézékyas di asou Jéova : « To jité tout mo péché dèyè to do » (Is. 38:9, 17). Sa èkzanp-a ka montré ki Jéova ka pran péché sa-ya ki ka répanti épi i ka jité yé pou i pa wè yé ankò. A kousidiré Ézékyas té di : « To ka fè kousidiré mo pa té janmen péché. » I gen rounòt èkzanp ki ka montré sa lidé-a. Nou ka jwenn sa èkzanp-a annan Michée 7:18, 19 (li). Dapré sa vèrsé-ya, i ka jité nou péché ofon lanmè. Annan lépòk Labib, roun moun pa té ké janmen rivé pran roun bagaj yé té jité ofon lanmè.
« To jité tout mo péché dèyè to do » (Is. 38:17).
« To ké jité tout yé péché ofon lanmè » (Mich. 7:19).
8. Kisa nou anprann ?
8 Sa èkzanp-ya ka anprann nou ki lò Jéova ka pardonnen nou i ka tiré pwa péché-a ki anlè nou nèt. Kou David di l’, « sa-ya Bondjé pardonnen mové bagaj yé fè-a é kouvri yé péché, yé tchò kontan ; moun-an Jéova pa ké tchenbé kont di so péché, so tchò kontan » (Rom. 4:6-8). A sa ki vré pardon-an !
JÉOVA KA ÉFASÉ TO PÉCHÉ
9. Ki èkzanp Jéova ka sèrvi pou montré nou kouman so pardon gran ?
9 Jéova ka pran ròt èkzanp pou idé nou konprann ki grasa ranson-an, i ka éfasé péché moun ki ka répanti. Labib ka di ki a kousidiré i té ka lavé épi rensé yé péché. Atò, sa moun-yan ka vin pròp (Ps. 51:7 ; Is. 4:4 ; Jér. 33:8). Jéova li menm ka di sa sa ka bay : « Menmsi zòt péché rouj, yé ké divini blan kou lanèj ; menmsi yé rouj kou létòf rouj fonsé, yé ké divini kou lalèn » (Is. 1:18). Lò i gen roun tach rouj ouben rouj fonsé asou roun lenj, a pa ti rèd sa rèd pou tiré l’. Mé Jéova ka pran sa èkzanp-a pou nou sir ki i pouvé lavé nou péché é fè yé disparèt pou nou pa wè yé ankò.
« Menmsi zòt péché rouj, yé ké divini blan kou lanèj » (Is. 1:18).
10. Ki ròt èkzanp Jéova ka sèrvi pou montré nou kouman so pardon gran ?
10 Kou nou di l’ annan ròt artik-a, nou pouvé di ki péché-a kou roun dèt (Mat. 18:32-35). Chak fwa nou ka péché kont Jéova, a kousidiré nou ka dévé l’ plizanplis soumaké. Atò, nou dévé l’ roun patché « soumaké » ! Mé lò i ka pardonnen nou, a kousidiré i té ka fin ké sa dèt nou té divèt péyé-a. I pa ka doumandé nou « ranboursé » l’ pou péché i ja pardonnen nou. A roun bèl èkzanp ki ka montré kouman nou soulajé lò Jéova ka pardonnen nou !
« Mo éfasé tout to dèt » (Mat. 18:32).
11. Lò nou ka li annan Labib ki Jéova ka « éfasé » nou péché, kisa sa lé di ? (Actes 3:19).
11 Jéova ka fin ké nou « dèt » ouben nou péché, mé anplis di sa, i ka éfasé yé (li Actes 3:19). Imajiné nou dévé roun moun soumaké. Pou i montré nou ki i ka lésé sa dèt-a tonbé, i ka baré koté i té marké l’. Menmsi kantité soumaké-a baré, to pouvé wè chif-ya toujou. Mé lò to ka éfasé roun bagaj, a pa menm bagaj-a. Pou nou pouvé konprann sa èkzanp-a, nou divèt sonjé ki tan-lontan, yé té ka sèrvi roun lank yé té pouvé éfasé fasilman ké dlo. Donk, roun moun té pouvé pran roun zéponj mouyé épi éfasé sa ki té marké. A pou sa, lò yé té ka « éfasé » roun dèt, sa ki té marké té ka disparèt nèt. To pa té pouvé wè sa ki té marké ankò. A kousidiré to pa té jen gen sa dèt-a. A pa ti kontan nou kontan paské nou savé ki lò Jéova ka pardonnen nou péché, a kousidiré nou pa té janmen fè sa péché-a ! (Ps. 51:9).
« Pou zòt péché éfasé » (Actes 3:19).
12. Kisa èkzanp nou ka jwenn annan Isaïe 44:22 ka anprann nou ?
12 Jéova ka sèrvi rounòt èkzanp ki ka sanblé ké sa-ya nou fin wè pou èspliké kouman i ka éfasé péché-ya. I ka di : « Mo ké fè to fot disparèt kousidiré mo té ka kouvri yé ké roun niyaj, é mo ké fè to péché disparèt kousidiré mo té ka kouvri yé ké roun gro niyaj » (Is. 44:22). Lò Jéova ka pardonnen nou, a kousidiré i té ka sèrvi roun gro niyaj pou séré nou fot pou i pa wè yé é pou nou pa wè yé non plis.
« Mo ké fè to fot disparèt kousidiré mo té ka kouvri yé ké roun niyaj » (Is. 44:22).
13. Kisa nou pa divèt pansé ?
13 Kisa sa èkzanp-ya ka anprann nou ? Lò Jéova ka pardonnen nou péché, nou pa divèt pansé ki nou ké gen pou poté charj nou péché pannan tout larèstan nou lavi. Grasa disan Jézi Kris, Jéova ka fin ké nou « dèt » nèt. Lò Jéova ka pardonnen roun péché, a kousidiré nou pa té janmen fè sa péché-a. A sa kalité bénédiksyon vré pardon Jéova-a ka mennen pou sa-ya ki ka répanti.
JÉOVA KA FÈ TO VIRÉ BYEN KÉ LI
Pardon nou Papa ki annan syèl-a ka pèrmèt nou gen roun bèl lanmityé ké li (gadé paragraf 14).
14. Poukisa nou pouvé krè Jéova lò i ka di ki i ka pardonnen nou ? (gadé zimaj-ya osi).
14 Grasa vré pardon Jéova-a, nou pouvé divini so zanmi. Lò i ka pardonnen nou, nou konsyans pa bézwen bat nou ankò. Nou pa bézwen pè, Jéova pa ka rété kòlè ké nou é i pa la ka antann roun moman pou i pini nou. I pa ké janmen fè sa. Poukisa nou pouvé krè Jéova lò i ka di ki i ka pardonnen nou ? Men sa Jéova di profèt Jérémi : « Mo ké pardonnen yé fot é mo pa ké sonjé yé péché ankò » (Jér. 31:34). É pita, apot Pòl roupran sa menm paròl-ya. Men sa nou ka li annan Hébreux 8:12 : « Mo pa ké sonjé yé péché ankò. » Mé kisa Jéova lé di lò i ka di sa ?
« Mo pa ké sonjé yé péché ankò » (Jér. 31:34).
15. Jéova pa ké sonjé nou péché ankò. Kisa sa lé di ?
15 Annan Labib, lò yé ka di « sonjé », a pa tout tan sa lé di sonjé roun bagaj ki pasé. Sa pouvé lé di fè roun bagaj. Bandi ki té asou poto-a òbò Jézi doumandé li : « Jézi, sonjé mo lò to ké vini annan to rwayonm » (Luc 23:42, 43). I pa té ka doumandé li sonjé l’ rounso. Nou pouvé di sa paské Jézi réponn li ki i té ké fè roun bagaj pou li, i té ké résisité l’. Donk, lò Jéova ka di ki i pa ké sonjé nou péché ankò, sa lé di ki i pa ké pini nou pita pou péché i ja pardonnen nou.
16. Ki èkzanp Labib ka pran pou palé di libèrté vré pardon-an ka bay nou ?
16 Labib ka sèrvi rounòt èkzanp pou montré nou ki grasa vré pardon-an, nou lib. Kou nou pa parfè é ki nou gen tandans ka fè mové bagaj, i ka di ki nou « èsklav péché-a ». Mé grasa pardon Jéova-a, nou kou èsklav yé ‘libéré di péché-a’ (Rom. 6:17, 18 ; Rév. 1:5). Lò nou savé ki Jéova pardonnen nou, nou kontan kou roun èsklav yé libéré.
« Yé libéré zòt di péché-a » (Rom. 6:18).
17. Kouman pardon Jéova-a ka pèrmèt nou géri ? (Isaïe 53:5).
17 (Li Isaïe 53:5.) Labib ka di ki, kou nou pa parfè, nou kou dé moun ki gen roun vyé maladi, roun maladi ki ka tchwé. Mé grasa ranson-an Jéova péyé lò i bay so Pitit an sakrifis, a kousidiré nou géri (1 Pierre 2:24). Lò nou ka péché, nou ka gaté nou lanmityé ké Jéova. Mé grasa ranson-an, i pouvé pardonnen nou é nou pouvé viré byen ké li. Menm fason roun moun ki té gen roun vyé maladi tou kontan lò i géri, nou tchò kontan lò Jéova ka pardonnen nou é ki grasa sa, nou ka viré byen ké li é nou ka fè l’ plézi kou anvan.
« Si nou géri, a pas yé blésé l’ » (Is. 53:5).
BÉNÉDIKSYON TO KA JWENN PAS JÉOVA KA PARDONNEN TO
18. Kisa nou anprann grasa èkzanp annan Labib ki ka palé di pardon Jéova-a ? (gadé karé-a osi « Èkzanp ki ka montré kouman pardon Jéova-a gran »).
18 Kisa nou anprann grasa èkzanp annan Labib ki ka palé di pardon Jéova-a ? Nou anprann ki lò i ka pardonnen nou, a kousidiré nou pa té janmen péché é i pa ka antann roun jou pou i pini nou. Sa ka pèrmèt nou gen roun bon lanmityé ké li. Mé fo pa nou bliyé ki vré pardon-an, a roun kado di nou Papa ki annan syèl-a. Si i ka pardonnen nou péché, a pa paské nou mérité l’, mé a paské i kontan nou é paské i kontan pardonnen (Rom. 3:24).
19. a) Si nou lé Jéova pardonnen nou, kisa nou divèt fè ? (Romains 4:8). b) Di kisa nou ké palé annan artik ki ka vin dèyè-a ?
19 (Li Romains 4:8.) Nou divèt gen rékonésans pou Jéova pas i ka pardonnen nou (Ps. 130:4). Mé si nou lé i pardonnen nou, i gen roun bagaj nou blijé fè. Jézi di : « Si zòt pa ka pardonnen ròt-ya yé fot, zòt Papa pa ké pardonnen fot zòt ka fè non plis » (Mat. 6:14, 15). Donk, nou divèt imité Jéova épi pardonnen ròt-ya. Mé kouman nou pouvé rivé fè sa ? A sa artik ki ka vin dèyè-a ké montré.
KANTIK 46 Merci, Jéhovah
a Annan tèks ébré-a, yé ka palé di « pardon-an ». A pa nenpòrt ki kalité pardon : a sèl vré pardon-an. Roun patché Labib pa ka fè sa diférans-a ki enpòrtan. La Bible. Traduction du monde nouveau ka fè diférans-a. A pou sa fason yé tradwi Psaume 130:4 diféran di tout ròt tradiksyon-yan.
