Itaia 44:1-28
44 “Ongora ngkai ngkoe ae Iakoba ae au toro,Ao ngkoe ae Iteraera ae I rineia.+
2 E kangai ana taeka Iehova,Ae te tia Karaoiko ao Teuare kateiraoiko,+Are e buokiko man te biroto:*
‘Tai maaku au toro ae Iakoba,+Ao ngkoe ae Ieturun*+ ae I rineia.
3 Bwa N na kabwaroa te ran i aon ane e bora n taka,*+Ao karaanga n ran i aon te tano ae mwau.
N na kabwaroa taamneiu i aoia kanoam,*+Ao au kakabwaia i aoia kanoam.
4 Ao a na rikirake kaanga i buakon uteute aika kiriin,+N ai aron aroka aika taiani bobura ake i rarikini karaanga n ran.
5 E na kangai temanna: “Bon ana bwai Iehova ngai.”+
Ao are temanna e na ingoanna i bon irouna n aran Iakoba,Ao are temanna riki e na korea ae kangai i aoni baina: “Ana bwai Iehova.”
Ao e na katokaa i aona aran Iteraera.’
6 E kangai ana taeka Iehova,Ae ana Uea Iteraera+ ao te tia Manga Kabooa,+ ae Iehova ae Atuaia taanga ni buaka:*
‘Boni ngai te moan ao te kabane.+
Akea riki te Atua temanna bwa tii ngai.+
7 Antai ae ai arou?+
Ke e taetae ao n taekinna ni kaota koauana nakoiu!+
N aron are I a tia ni karaoia man te tai are I karikiia iai aomata ake ngkoangkoa,Ke a taekini baika a na rokoAo aika a tuai n riki.
8 Tai maakunrangAo tai taonakinako n te maaku.+
Tiaki I a kaman tuangingkami n tatabemaningkami nako mai mwaina ao n taekinna?
Bon au tia kakoaua ngkami.+
Iai riki te Atua temanna i rarikiu?
Bon akea, ao akea te Bwaa riki temanna,+ ao akea riki ae I ataia.’”
9 Akea manenaia ni kabane taani karaoi bouannanti aika kaaraki,Ao e na akea bongan aia bwai aika kakawaki irouia.+
Ngkai aia tia kakoaua ngaiia, ao akea te bwai ae a* noria ao akea te bwai ae a ataia,+Mangaia are a na kamaamaeaki naake a karaoi baikai.+
10 Antai ae karaoa te atua ke ae e karaoa te bouannanti ae te biti*Ae akea te kakabwaia ae e kona ni karekea?+
11 Noria! A na kamaamaeaki raona ni kabane!+
Bon tii aomata mwaane aika mwaatai ni karaobwai.
Ke a bane n ikotaki ao n tei.
A na bane ni maakunrang ao ni kamaamaeaki.
12 E mwakuria te biti te tia mwakuria te biti i aon te mwaakaro ma ana bwai ni mwakuri.
E kateiraoia n taian aama,Ao e mwakuria n anganibaina ae korakora.+
Ao e a rikirake ni baki ao e a kerikaaki korakorana.
E aki moi n te ran ao e a rikirake ni kua.
13 E katika te kora ni baire te tia kaara te kai, e katanea te taamnei n te tiaoka ae uraura.
E mwakuria ni bwaini kaaran te kai ao ni katanea n te kambwati.
E karaoia bwa katotongan te aomata+Ao tamaroan te aomata,Bwa e na kaaki n te auti.*+
14 Iai te aomata temanna ae ana mwakuri boni koreani kaai aika tiira.
E rinea te aeka n aroka tekaina ae te oke,Ao e karikirakea bwa e na totoa i buakon arokan te buakonikai.+
E unika te aroka ae te raaura ao e karikirakea te karau.
15 Ao e riki bwa ana aia te aomata ni kauraa te ai.
E anai tabeua mai iai bwa e na kaabuea iai.
E kauraa te ai ao e umuna te kariki.
Ma e karaoa naba iai te atua ao e taromauria.
E karaoia bwa te bouannanti ae kaaraki ao e bobaraaki i matana.+
16 E kabueka iterana n te ai.
Ao are iterana e umuna iai te irikomaiu are e kanna ao e rauaki iai.
E kaabuea naba ao e kangai:
“Noria! ae I a abue ngkai I tarataraa te ai.”
17 Ma e karaoa are nikirana bwa te atua, ae ana bouannanti ae kaaraki.
E bobaraaki nakoina ao e taromauria.
E tataro nakoina ao e kangai:
“Kamaiuai, bwa bon atuau ngkoe.”+
18 Akea te bwai ae a ataia ao akea te bwai ae a ota iai+Ibukina bwa a kainaki mataia ao a aki kona n noraaba,Ao akea te ataibwai i nanoia.
19 Akea temanna ae iaiango i nanona,Ke ae iai ana atatai ke ana ataibwai, ae e kangai:
“Are iterana I kabuekia n te ai,Ao I umuna te kariki ma n tinima te irikomaiu i aoni mwaakarona bwa N na kanna.
I riai ngkanne ni karaoa are nikirana bwa te bwai ae riribaaki?+
I riai bwa N na taromauria te mwakoro ni kai* ae reke man te aroka?”
20 E amwamwarake n te mannang.
Ao e tiotionako n nanona ae burebureaki.
E aki kona ni kamaiua i bon irouna, ke ni kangai:
“Tiaki bon iai te kewe teuana ni baiu ae te atai?”
21 “Uringi baikai ngkoe ae Iakoba ao ngkoe ae Iteraera,Bwa bon au toro ngkoe.
I kateiraoiko, ao bon au toro ngkoe.+
N na bon aki mwaninga taekam ngkoe ae Iteraera.+
22 N na kamaunai am kairua kaanga ai aron ae I rabuni n te nang,+Ao am bure kaanga ai aron ae I rabuni n te nang ae matenten.
Okirai bwa N na manga kabooko.+
23 Takarua ni kimwareirei ngkoe ae karawa,Bwa e a mwakuri Iehova!
Takarua n tokanikai ngkoe ae kabin te aonnaba!
Takarua ni kimwareirei ngkami aika maunga,+Ao ngkoe ae te buakonikai ma arokam ni kabane!
Bwa e a tia Iehova ni manga kabooa Iakoba,Ao e kaotiota tamaroana i aon Iteraera.”+
24 E kangai ana taeka Iehova, ae te tia Manga Kabooko,+Are e kateiraoiko mangke ko mena n te biroto:
“Bon Iehova ngai ae I karaoi bwaai ni kabane.
I taakina karawa n tii ngai+Ao I arora te aonnaba.+
Antai raou?
25 I tokobitoi aia kanikina taan taekin taeka aika akea uaaia,*Ao boni ngai Teuare karaoiia taani kaiwa bwa kaanga rangirang,+Ao Teuare kamangaoia mwaane aika wanawana,Ma n oniki aia atatai nakon te nanobaba,+
26 Ae Teuare kakoroa bukin ana taeka ana toro,Ao are e kakororaoi raoi nanoni baike a a kaman taekin ana tia uataeka,+Ao Teuare kangai ibukin Ierutarem, ‘E na maekanaki neiei,’+Ao ibukini kaawa ake i Iuta, ‘A na manga kateaki,+Ao N na manga karaoi uruakin neiei,’+
27 Ao Teuare kangai nakon te ran ae makuakua, ‘Ko na buanerake,Ao N na kabwatakatakai am karaanga ni kabane,’+
28 Ao Teuare kangai ibukin Tairati,+ ‘Bon au tia kawakintiibu teuaei,Ao e na kakororaoa raoi au kantaninga ni kabane,’+Teuare kangai ibukin Ierutarem, ‘E na manga kateaki neiei,’Ao ibukin te tembora, ‘E na kaweneaki aam.’”+
Taiani Kabwarabwara Mai Nano
^ Ke, “mangke kam bungiaki.”
^ Ae nanona, “te Aomata ae Raoiroi,” ae bon te nakoa ae rine ae tei ibukin Iteraera.
^ Ke, “te aba ae bwatakataka.”
^ Ebera, “am kariki.”
^ Ke, “Tabaota.” Nora Nanon Taeka.
^ Ae taekan taiani bouannanti.
^ Ke, “te bouannanti ae kaburoaki n atoaki.”
^ Ke, “tembora.”
^ Ke, “mwakorona ae mwau.”
^ Ke, “burabeti ni kewe.”
