Taeka N Rabakau 23:1-35
23 Ngkana ko tekateka n amwarake ma te uea,Ao tarataraa raoi te baere i matam.
2 Kaaki te biti i buuam*Ngkana ko a rangi ni bwarua te amwarake ae bati.
3 Tai bwarui ana amwarake aika kangkang,Bwa bon te amwarake ae mwamwanaa te aba.
4 Tai kabanea korakoram ibukini karekean te kaubwai.+
Katokia ao kaota te ataibwai.*
5 Ngkana ko kamwataua taraana, ao bon akea ikekei,+Bwa ane a na riki baina ni kiba n aron te ikare ao e na kiba nako karawa.+
6 Tai katoong ana amwarake te aomata ae bwanga n tauti.*
Tai bwarui ana amwarake aika kangkang,
7 Bwa kaanga ai aron te aomata ngaia ae tataui mwini bwaai.
E taku nakoim, “Amwarake ao moi,” ma e bon aki nanonna.*
8 Ko na mumutai baike ko a tia ni kang,Ao a na matebuaka am taeka aika raraoi.
9 Tai taetae i taningan te aomata ae nanobaba,+Bwa ane e na taboribaa wanawanan am taeka.+
10 Tai kamwainga te kanikina are mangkoangkoa ibukin tian te aba,+Ke n ninia aia tawaana akana akea tamaia.
11 Bwa e korakora te tia Tei Ibukia,*Ao ane e na kaaitarako n aia tangitang.+
12 Nanoraoi nakon te reirei ni kaetieti,Ao katanimaia taningam nakon taeka aika kaota te atatai.
13 Tai kararoaa te reirei ni kaetieti mairoun te teei.+
Ngkana ko oreia n te kai, ao e na aki mate.
14 Ko riai n oreia n te kai,Bwa ko aonga ni kawakina maiuna* man te Ruanimate.*
15 Natiu, ngkana e a wanawana nanom,Ao e na kimwareirei nanou.+
16 E na kimwareirei nanou ae raba*Ngkana a taekina te bwai ae eti riam.
17 Tai kariaia nanom bwa e na bakantang irouia taani bure,+Ma ko na maaka Iehova ni kabongnga.+
18 Bwa ane e na nakoraoi arom nakon taai aika a na roko,+Ao e na aki mauna am kantaninga.
19 Kakauongo natiu, ao ko na wanawana,Ao kairira nanom i nanon te kawai ae eti.
20 Tai mena i buakoia te koraki aika nima te wain ae riao,+Ao i buakoia te koraki aika buabeka ni kang irikomaiu.+
21 Bwa ane e na karako ana bwai te tia kokoro ni manging ao te tia buabeka,+Ao te nimatutu e na kunnikaia temanna ni kunnikai aika mangaingai.
22 Ongo iroun tamam ae karikiko,Ao tai riribaa tinam tii ibukina bwa e a kara.+
23 Kabooa* te koaua ao tai kaboonakoa,+Ao te wanawana naba ma te reirei ni kaetieti ao te ataibwai.+
24 E na boni kimwareirei taman te aomata ae raoiroi,Ao ane e riki bwa taman te nati ae wanawana e na kakatonga irouna.
25 A na kakatonga tamam ma tinam,Ao e na kimwareirei neiere bungiko.
26 Natiu, anganai nanom,Ao ke a kukurei matam n arou nako.+
27 Bwa te aine ae kakabooaki bon te mwarua ae nano,Ao te aine ae kammaira* bon te mwanibwa ae wariki.+
28 E kakaran n ai aron te tia kamwarua,+Ao e karikirakei mwaitiia mwaane aika aki kakaonimaki.
29 Antai ae iai rawawatana? Antai ae iai tabeaiangana?
Antai ae iai ana kauntaeka? Antai ae iai ngurengurena?
Antai ae iai ikoakina ao akea bukina? Antai ae iai matana aika takauraura?*
30 Bon te koraki ake a tiku ni maan i rarikin te wain.+
Te koraki ake a ukoukora* te wain ae renganaki.
31 Tai tataraa karan te wain ae uraura,Ngkana e raneanea i nanon te mwangko ao e ruo rikaaki ni marannako i buuam,
32 Bwa n tokina ao e tenatena n ai aron te naeta,Ao e kaotinakoa te boitin n ai aron te naeta ae te baiba.
33 Ane a na nori baika kamimi matam,Ao a na atongi baika aki riai nanom.+
34 Ao ane ko na riki n ai aron te aomata ae wene i nukani marawa,Ao n ai aron te aomata ae wene i tabon aneangin te kaibuke mai eta.
35 Ane ko na kangai: “A oreai, ma I aki namakinna.*
A batiboai, ma I aki ataia.
N na uti n ningai?+
I kainnanoa riki nimau.”*
Taiani Kabwarabwara Mai Nano
^ Ke, “Taotaona nanom.”
^ Ke tao, “Katoka oin am ataibwai.”
^ Ke, “ane e buakaka matana.”
^ Ebera, “e aki mena nanona iroum.”
^ Ebera, “te tia Manga Kabooia.”
^ Ebera, ne’phesh, nora Nanon Taeka.
^ Ke, “Tiore,” ae taekan ruanimaten te botannaomata. Nora Nanon Taeka.
^ Ebera, “au kirine.”
^ Ke, “Karekea.”
^ Ke, “matarai.”
^ Ke, “a ikotaki bwa a na kataa.”
^ Ke, “I aki namakina te maraki.”
^ Ke, “N na manga ukoukoria riki.”
