Te Minita 3:1-22
3 Iai te tai ae baireaki ibukini bwaai nako,Ae te tai ibukini mwakuri nako aika karaoaki i aani karawa:
2 Te tai ni bung ao te tai ni mate,Te tai n ununiki ao te tai n taewakaa are e unikaki.
3 Te tai n tiritiri ao te tai ni kamarurung,Te tai n ururu ao te tai ni kateitei.
4 Te tai n tang ao te tai ni ngarengare,Te tai n tanginiwenei ao te tai ni mwamwaie.*
5 Te tai n tetewenakoi atibu ao te tai n ikoikotii atibu,Te tai n irabwati ao te tai n aki irabwati.
6 Te tai ni kakaae ao te tai n iangoa te bwai teuana bwa e a boni bua,Te tai ni kakawakin ao te tai n tetewenako.
7 Te tai n raeuai bwaai+ ao te tai n itui ni katomai,Te tai ni kainabwabu+ ao te tai n taetae.+
8 Te tai n tangira ao te tai n riribai,+Te tai ni buaka ao te tai n raoi.
9 Tera te bwai ae e karekea te tia mwakuri ibukin ana kakorakora ni kabane?+
10 I nora te mwakuri ae e a tia n anga te Atua nakoia natiia aomata, ae a teimatoa ni katabetabeaki iai.
11 E katamaroai* bwaai nako n taia.+ E karina naba i nanoia te iango ni kaineti ma te maiu n aki toki. Ma e ngae n anne, a aki kona aomata n atai raoi ana mwakuri* nako te Atua ae koaua ake e karaoi.
12 I a ataia ngkai bwa akea te bwai ae raoiroi riki ibukia nakoni kakimwareireiaia ao karaoan ae raoiroi i nanoni maiuia,+
13 ao a riai naba aomata nako n amwarake ao ni moi ao ni karekea kimwareireia ibukin aia mwakuri korakora ni kabane. Bon te bwaintangira mairoun te Atua.+
14 I a ataia ae a na teimatoa n aki toki bwaai nako aika e karaoi te Atua ae koaua. Akea te bwai ae e na karakaaki nako iai, ao akea te bwai ae e na kakeeaki mai iai. E karaoia te Atua ae koaua n te aro aei bwa a aonga ni maakua aomata.+
15 Te baere riki e a kaman tia n riki, ao te baere e na kaoti ai kaman iai,+ ma e kakaaea ane e ukoukoraki* te Atua ae koaua.
16 I a tia naba n nora aei i aan taai: Ike e riai ni mena iai te kaetitaeka ae riai ao e mena iai te buakaka, ao ike e riai ni mena iai te raoiroi ao e mena iai te buakaka.+
17 Ngaia are I taku i nanou: “E na motika taekaia akana raoiroi ma akana buakaka te Atua ae koaua,+ bwa bon iai te tai ibukini bwaai nako aika karaoaki ma mwakuri nako.”
18 I taku naba i nanou ibukia natiia aomata ake e na kataiia te Atua ae koaua, ao ni kaotia nakoia bwa kaanga ai aroia maan ngaiia,
19 bwa iai tokia* aomata ao iai tokia maan. Titeboo tokia maan ma aomata.+ E mate temanna ao ai aron naba are temanna, ao titeboo naba te korakora ae te maiu* are irouia ni kabane.+ Mangaia ae akea riki rakan aron te aomata nakoia maan, bwa bon akea manenani bwaai nako.
20 A bane n nakon te tabo ae tii teuana.+ A bane n riki man te tano,+ ao a bane n okira te tano.+
21 Antai ae ataia raoi bwa e waerake te korakora ae te maiu* are irouia aomata, ao e ruo rikaaki nakon te tano te korakora ae te maiu* are irouia maan?+
22 Ao I noria bwa bon akea te bwai ae raoiroi riki iroun te aomata nakoni karekeani kimwareireina n ana mwakuri,+ ibukina bwa bon anne kaniwangana.* Bwa antai ae kona ni buokia bwa e na nora te bwai ae e na riki imwina ngkana ai akea ngaia?+
Taiani Kabwarabwara Mai Nano
^ Ebera, “ewewe; kibakibarake.”
^ Ke, “bairei raoi; karaoi n te aro ae riai.”
^ Ebera, “mai moana ni karokoa tiana.”
^ Ke tao, “te baere e a tia ni bwakanako.”
^ Ke, “te bwai ae e na riki.”
^ Nora Nanon Taeka, “Taamnei.”
^ Nora Nanon Taeka, “Taamnei.”
^ Nora Nanon Taeka, “Taamnei.”
^ Ke, “tibwangana.”
