E WAETEBE LUZIA. N uarereken neiei ao e a reke naba irouna te borioo ae te aoraki ae rangi n ewewe ae urui bwain te rabwata ake a katomai bwain nako te rabwata ma te kaburoro. Ngke ai 16 ana ririki ao e a taku nakoina te aine ae ana tia kammwakuri: “E katuuaaeko te Atua bwa e na mate bwain rabwatam bwa ko aki ongeaba ao ko buakaka nakon tinam.” Ai iraua te ririki imwina ma e bon ururinga naba uruakin nanona Luzia n te tai anne.

NGKE E A ATAIA DAMARIS AE E KAENTIA KABURORONA, ao e titiraki tamana ni kangai: “Tera ae ko karaoia ngkai e riki aei nakoim? Ko bae n tia ni karaoa te bae rangi ni buakaka. Anne bukina ae e a katuuaaeko te Atua.” E uruaki nanon Damaris n ana taeka tamana anne.

Ai iraua tenga ngkai te ririki maania aomata ni kakoauaa ae te aoraki bon te tuuaa mairoun te Atua. E taku te boki ae Manners and Customs of Bible Lands bwa a bati aomata ake n ana tai Kristo ae a kakoauaa bwa “e kona n aoraki temanna ibukin ana bure ke man aia bure ana utu. Ibukin te bure anne ao e a aoraki.” E taku te Medieval Medicine and the Plague bwa n taai ake rimoa ao “iai tabeman ake a kakoauaa bwa e karokoa te aoraki ae kamamate te Atua ni katuuaaeia iai aomata ibukin aia bure.” Ngaia are mateia aomata aika iraua te mirion ni kabutaa Eurobe n te aoraki ae kamamate n te ka-14 n tienture, nanona bwa e motika taekaia aomata aika buakaka te Atua? Ke e bon riki te aoraki anne man ewewen te mannaoraki, n aron ae a taekinna taani kakaae i aoni bwainnaoraki? A kona n iangoa aei tabeman, te koaua bwa te Atua e boni kabongana te aoraki ni karawawataia iai aomata ibukin aia bure? *

IANGOA AEI: E aera Iesu ngke e kamarurungia aoraki ngkana ngaia bwa te aoraki ao te rawawata bon taian tuuaa mairoun te Atua? Tiaki karaoan anne irouna, e na kamemeerea iai ana kaetitaeka ae riai te Atua ao raoiroina? (Mataio 4:23, 24) E na bon aki kani kaitaraa ana mwakuri te Atua Iesu. E taku: “I kakaraoi baike a kakukurei nakoina” ao “I karaoa nanon te tua are e anganai te Tama.”—Ioane 8:29; 14:31.

E mataata n te Baibara bwa Iehova ae te Atua “e aki kona n ribuaka.” (Te Tua-Kaua 32:4) N te katoto, e aki kona te Atua ni karika te kabuanibwai nakon te wanikiba ike a a mate iai irabubua aomata aika akea aia bure, bwa e kani katuuaaea temanna ae toka iai! E kangai Aberaam ae ana toro te Atua ae kakaonimaki ni kaineti ma raoiroin te Atua, bwa e aki kona te Atua ni “kaai ni kamaunaia aika raoiroi ma aika buakaka.” E taku, ‘e aki kona n iangoia.’ (Karikani Bwaai 18:23, 25) E taku naba te Baibara bwa “e bon aki karaoa ae buakaka te Atua” ao e aki “karaoa ae kairua.”—Iobi 34:10-12.

Te rawawata ae ti rinanona bon tiaki te tuuaa mairoun te Atua ibukin te bure teuana. E kamataataa raoi aei Iesu ngke a nora te mwaane are bungiaki ni mataki, ma taan rimwina. “A titirakinna ni kangai taan rimwina: ‘Rabi, antai ae bure, teuaei ke ana karo, ngkai e a bungiaki ni mataki?’ E kaeka ni kangai Iesu: ‘E aki bure teuaei ke ana karo, ma e riki aei bwa a aonga ni kaotiotaki ana mwakuri te Atua irouna.’”—Ioane 9:1-3.

N ataakin te ota ae kairua are taabangaki n taai akekei, a na bae ni mimi ngke e tuangia ae e aki bure teuanne ao ana karo n te aro are e a tekebuaka iai. E aki tii kaurei matan teuae mataki aei Iesu, ma e  kaeta naba te koaua ae kairua ae te rawawata bon te tuuaa mairoun te Atua. (Ioane 9:6, 7) Naake a rawawata n te aoraki ngkai, a kona ni kabebeteaki n ataan ae e bon aki karika aorakia te Atua.

E karaui nanora ni kangai te Baibara

• ““E aki kona ni kataaki te Atua ni baika bubuaka ao e aki kona naba ni kataa temanna iai.” (IAKOBO 1:13)A nangi boni kamaunaaki “baika bubuaka” aika kaaorakia aomata i nanon tienture aika bati n ikotaki ma te aoraki, te maraki, ao te mate.

• E “kamarurungia ake a karawawataaki ni kabane” Iesu Kristo (MATAIO 8:16) Ngke e kamarurungia naake a kawaria, e kaotia iai Natin te Atua bwa aikai baika e na karaoi Ana Tautaeka n Uea te Atua n te aonnaba ni kabutaa.

• “E na kaoa te rannimata ni kabane mai mataia [te Atua], ao e nang akea riki te mate, ke te nanokawaki ke te tang ke te maraki. A a mauna bwaai rimoa.”​—TE KAOTIOTI 21:3-5.

E aera ngkai a rinanon te maraki ao te rawawata ae bati aomata? A a tia n iaiangoa te titiraki anne aomata i nanon tienture aika bati. Ngkana ngaia bwa e na aki bukinaki te Atua, antai ngkanne ae e na bukinaki? A na kaekaaki titiraki aikai n te kaongora ae imwina.