E koroboki te abotoro Bauro nakon raona n unimwaane n te ekaretia are Timoteo ni kangai: “I tua nakoimi i matan te Atua ao Kristo Iesu ma anera aika rineaki, bwa kam na toui mwini kaetieti aikai ma n tirobaei raoi imwaini karaoan te moti, ao n aki inanonano.”​—1 Tim. 5:21.

Te moan, ti kona ni maroroakinna bwa antai anera aika a aki riai ni karinaki n te kurubu n anera anne. E mataata raoi bwa tiaki naake kaain 144,000. Ngke e koroboki Bauro nakon Timoteo, ao e tuai moanaki n te tai anne kautakia Kristian aika kabiraki. A tuai n riki bwa anera i karawa abotoro ao taani kabiraki riki ake tabemwaang, ngaia are “anera aika rineaki” e aki kaineti nakoia.​—1Kor. 15:​50-54; 1Tet. 4:​13-17; 1Ioa. 3:2.

E aki kona naba ni kaineti nakoia anera ake aki ongeaba n tain te Ieka, “anera aika rineaki.” A tei anera akanne n ana itera Tatan ao n riki bwa taimonio, ake taani kaitaraa Iesu. (KBwaai 6:2; Ruka 8:​30, 31; 2Bet. 2:4) N te tai ae imwaira ao a na karenakoaki n te kinono i nanon 1,000 te ririki, ao imwina a na kamaunaaki ma te Riaboro.​—Iuta 6; TeKao. 20:​1-3, 10.

Ngaia are “anera aika rineaki” are e taekinna Bauro, e boni bae n taekaia anera i karawa ake a boutokaa “te Atua ao Kristo Iesu.”

Iai nga ma nga anera aika kakaonimaki. (Ebera 12:​22, 23) Ti aki riai n iangoia ae titeboo mwiokoaia n tatabemania nako. (TeKao. 14:​17, 18) Kam bae n uringa te anera temanna are e mwiokoaki bwa e na kamaunaia tautian Aturia aika 185,000 mwaitiia. (2Uea 19:35) A bati anera aika mwiokoaki bwa a na “kaokoroia aomata ni kabane akana kabwakabwakaa te aba nakon te bure mai buakon ana Tautaeka n Uea [Iesu,] ao akana kakaraoa ae buakaka.” (Mat. 13:​39-41) Tabeman a bae n “ikotiia naake a rineaki” nako karawa. (Mat. 24:31) Ao ake tabeman a mwiokoaki bwa a na ‘kawakinira i nanoni kawaira ni kabane.’​—TaiAre. 91:11; Mat. 18:10; kabotaua ma Mataio 4:11; Ruka 22:43.

“Anera aika rineaki” ake a taekinaki n 1 Timoteo 5:21 bon anera ake a mwiokoaki n tabeia aika okoro aika a na buokiia iai ana aomata te Atua. Ni bwaninin te rongorongo, ao e anga Bauro te reirei ni kairiri ibukia unimwaane ake a anganaki karineaia irouia kaain te ekaretia. A riai unimwaane ni karaoi tabeia “ao n aki inanonano,” ao a aki riai ni karaoi aia babaire ma te aki iango moa. Bukina ae riai irouia bwa a na kakairi n ana taeka n reirei Bauro, bwa a mwakuri “i matan te Atua ao Kristo Iesu ma anera aika rineaki.” E mataata raoi ngkanne bwa iai tabeman anera aika mwiokoaki bwa a na buokiia kaain te ekaretia, n aroni katauraoan te kamanomano, tararuaan te uarongorongo, ao ribootinakina nakon Iehova.​—Mat. 18:10; TeKao. 14:6.