Aia Titiraki Taani Wareware . . .

E Koaua Bwa Iesu Bon te Akanera ae Mikaere?

▪ Ni kauarerekeana, te kaeka bon eng. E taabangaki n aaba aika mwaiti te katei ae ingoanakin temanna n aara aika mwaiti. E riki naba aio nakon aara n te Baibara. N te katoto, e aranaki te baatua ae Iakoba bwa Iteraera. (Karikani Bwaai 35:10) Iai naba aran te abotoro Betero aika nimaua aika kakaokoro bwa Timeon, Timon, Betero, Keba ao Timon Betero. (Mataio 10:2; 16:16; Ioane 1:42; Mwakuri 15:7, 14) Ti na kanga ni koaua raoi bwa Mikaere bon aran Iesu naba teuana? Iangoi bwaai ni kakoaua man te Baibara aikai.

E oti nimaua te tai n te Baibara taekan te anera ae mwaaka ae Mikaere, ao tenua mai buakona a kaoti n te boki ae Taniera. N Taniera 10:13, 21 (BG), ti wareka iai taekan te anera are e kanakoaki ibukini mwiokoana bwa e kamaiuaki irouni Mikaera [ae Mikaere] ae aranaki bwa “temanna i buakoia mataniwi ake anera ake a kakanato” ao “mataniwimi.” Ti reiakinna riki imwina n Taniera 12:1 (BG), bwa n tain te toki ao “e na tei rake Mikaera [ae Mikaere], are te mataniwi are kakanato are tei ibukiia kaain am koraki.”

E taekinaki naba taekani Mikaere n Te Kaotioti 12:7, are e kamatataaki iai bwa a buaka “Mikaere ma ana anera” n te buaka ae moan te kakawaki, ike e a karenakoaki iai Tatan te Riaboro ma ana anera aika buakaka mai karawa.

Noria bwa n rongorongo akana i eta ni kabane, e kaikonakaki iai Mikaere bwa te anera ae te tia buaka ao te tia kamanoia ana aomata te Atua, ao e kaitaraa naba Tatan are e rangi n riribaa Iehova.

E aranaki Mikaere bwa “te akanera” n Iuta 9 (BK), ke “archangel” n te taetae n Imatang. Te taeka ae “arch” nanona “te tia bwaibwai” ke “te mataniwi,” ao e aki kamanenaaki n te Baibara te taeka ae “akanera” ibukia aika mwaiti. Te kibu teuana riki ae taekinaki iai te akanera bon 1 I-Tetaronike 4:16 (BK), ike e kabwarabwaraaki irouni Bauro taekan Iesu are e a tia ni kautaki ni kangai: “E na ongo te aba banan te akanera; e na tang ana bu te Atua, ao e na ruo te Uea mai karawa.” Ai ngaia are e ataaki ngkai Iesu Kristo bwa te akanera ke mataniwia anera. Tera ae ti kakoauaa ni kaineti ma iango aikai? Iesu Kristo boni Mikaere ae te akanera. Aara aika Mikaere (ae nanona “Antai ae ai Aron te Atua?”) ao Iesu (ae nanona “Iehova Bon te Tia Kamaiu”) a kaira te iango nakon nakoana ae te tia tei ibukini boutokaan ana tautaeka te Atua. E taekinaki n I-Biribi 2:9 bwa “e a karietataaki iai [Iesu ae neboaki] iroun te Atua nakon te nakoa ae rietata riki ao e akoaki naba n anganaki te ara ae kakannato riki nakon aara nako.”

E kakawaki ataakin ae bungiakin Iesu bwa te aomata, bon tiaki aio moanakini maiuna. Imwaini bungiakin Iesu, e kawaraki Maria iroun te anera ao e tuangnga bwa e na bikoukou rinanon te taamnei ae raoiroi ao e na bungia natina te mwaane, ao n aranna bwa Iesu. (Ruka 1:31) E taekina maiuna Iesu ngke te taamnei ngaia imwain rikina n aomata n taai aika mwaiti, n ana tai ni mwakuri ni minita.​—Ioane 3:13; 8:23, 58.

Ngaia are Iesu bon te akanera ae Mikaere ngke e maiu bwa te taamnei imwain rikina n aomata. Ngke e a okira karawa Iesu imwini kautakina, e a manga okira nakoana ae mataniwia anera ae Mikaere, “bwa e aonga n neboaki iai te Atua ae te Tama.”​—I-Biribi 2:11.