IANGOIA bwa aongkoa iai raoraom ae rangi ni mamate nanom irouna, ma e a karaoa naba te bwai teuana ae ko aki kona n ota iai. A tiriburea ana mwakuri raoraom tabeman ao ni kabuakakaa ni baike e karaoi bwa e ribuaka. Ko na waekoa ni kakoauaia ke ko na taningaa raoraom anne bwa e na kabwarabwaraa te bwai ae riki? Ko na aki waekoa ni motika taekana ngkana e aki mena ikanne ni kabwarabwaraa te bwai ae riki?

Imwain ae ko kaeka, ko bae ni kan ataa ae bati riki ibukina. Ko bae n titirakiniko ni kangai: ‘Tera aroni kinaakin raoi raoraou aei, ao e boto i aon tera tangirana irou?’ E riai karaoan anne. Ma iangoa aei: Tiaki ti kona ni kaineti naba booto n reirei nakon te titiraki ae e ribuaka te Atua ke e aki?

Ko kona ni kunea bwa e kangaanga otam ni bwaai tabeua ake e a tia ni karaoi te Atua, ke ko bae n aki ota ni bwaai ake e kariaia bwa a na riki. A bati aomata aika a na tuangko bwa e ribuaka te Atua ao a na kaumakiko bwa ko na kabuakakai ana iango n ai aroia. Ko na waekoa n nanokokoraki ke ko na karekei riki rongorongona? Imwain ae ko kabuakakaa te Atua, ko riai ni kabatiaa riki ataakin rongorongona. Ko riai naba n iangoi baika raraoi aika e a tia ni karaoi te Atua ibukim.

Ngkana e nakobuaka maium, ko na bae ni kaririaki n taekina ae bon tiaki te rao ni koaua te Atua. Ma iangoia teutana te tai. E riai ni bukinaki te Atua ni kangaanga ke kakabwaia ni maium? N aron ae ti a tia n ataia, Tatan bon “te tia tautaeka i aoia kaain te aonnaba aei” ao tiaki Iehova. (Ioane 12:31) Ngaia are bon Tatan ae karikii rawawata ao ribuaka aika bati n te aonnaba aei. Ko aki ngkanne boraoi n iango n ae a bon riki ara kangaanga man aki kororaoira ao ni baika aki kona n ataaki rikia?

N te itera teuana, baikara bwaai ake e bukinaki iai te Atua? Iangoa ae taekinaki n te Baibara bwa bon te Atua “Are karaoa karawa ma aonaba” ao a irekereke ana mwakuri ma rabwatara ae ‘kamimi karaoana’ ao e taekinaki naba iai Iehova bwa ‘te Atua ae e mena te ikeike i nanoni baina.’ (Taian Areru 124:8; 139:14; Taniera 5:​23, BG) Tera ae nanonaki n taeka akanne ni kabane?

Nanon anne bwa ti maiu ao n riki mairoun ara tia Karikiriki. (Mwakuri 17:28) E nanonaki iai bwa te bwaintituaraoi ae te maiu, tamaroani baika ti otabwaniniaki iai aika n te aonnaba, kakukurein te tangira ao te reitaki, kakimwareirein te nokangkang, te namakin ae reke man ringani bwaai, tangitangini bwaai ao te aroboi, boni bwaai n tituaraoi ni kabane aikai mairoun te Atua. (Iakobo 1:17) Ko aki ngkanne boraoi n iango n ae bon Raoraora te Atua ibukini kakabwaia akanne ao ti bon tau ni karinea ao n onimakinna?

Ni koauana, ko kona n iangoia bwa e kangaanga onimakinan te Atua. Ko kona n namakinna bwa ko tuai n rangi ni kinaa raoi n te aro are ko na onimakinna. E boni mataata anne. Ni kaongora aika kimototo aikai, ti aki kona n ota bwa a aera aomata ngkai a kabuakakaa te Atua bwa e ribuaka. Ma e aki ngkanne kakawaki te kakorakora ni kani kinaa riki te Atua? * Ti aki nanokokoraki bwa ngkai ko kani kinaa riki te Atua, ko na bon rikirake n ataa te koaua ibukina. E koaua bwa e ribuaka? Boni kaitaraan raoi anne: “Te Atua bon te tangira.”​—1 Ioane 4:8.