Ngkana iai te Aro teuana ae kabwaraa nanom, e na bae ni kangaanga onimakinan te Aro teuana riki. Ma karaua nanom bwa bon iai te Aro ae riai n onimakinaki. Ni menan Iesu i aon te aba, e bootia taan rimwina aika kakaonimaki ao n reireinia bwa a na maiuakina te aroaro ni maiu ae boraoi ma ana kaetieti te Atua. Bon iai naba ni boong aikai taan rimwini Kristo ni koaua aika a kaboraoi maiuia ma te kaetieti ibukia Kristian. Ko kona n noria ia?

E taku Estelle are e mwaneweaki n te kaongora are mai moa riki: “Imwin te tai ae maan, I a moana reiakinan te Baibara ngke I reirei ma Ana Tia Kakoaua Iehova. E aki rangi ni maan imwin anne, I a ota n te bae I warekia n Ioane 8:32 ae kangai: ‘Ane kam na ataa te koaua, ao e na kainaomataingkami te koaua.’”

E taku naba Ray are e taekinaki mai moa riki: “Ngke I reiakina te Baibara ma Ana Tia Kakoaua Iehova. I a ataia ae e aki riai ni bukinaki te Atua ibukin rawawataia botannaomata. I rangi ni kakaitau ngkai I a ataia bwa iai bukina aika riai iroun te Atua ngkai e aki katoka te buakaka ao e berita naba bwa e na boni kamauna n te tai ae waekoa.”

E mataata bwa e kangaanga te kabokorakora n uaua ni kaitaraa airan ana mwakuri te aonnaba aei, ni kataia ni karaoa ae eti ngkai angiia aomata a aki maiuakina te aroaro ni maiu ae riai. Ma e boni kona n reke anne. A bati aomata aika tangira buokaia bwa a na ota ao ni maiuakin reirei man te Baibara. Anne bukina ngkai a kairi reirei man te Baibara n akea booia Ana Tia Kakoaua Iehova ni mwengaia aomata aika mirion ma mirion ni katobibia te aonnaba. A mwaitikurikuri aika reiakina ana reirei ni koaua te Baibara ni katoa wiki. Ibukin anne, a a kaaniaki riki ma aia tia Karikiriki ao ni karikirakei maiuia aika kakukurei riki. *

Ngkana ko kaitiboo ma Ana Tia Kakoaua Iehova n te tai teuana, e aera ko aki titirakinia bwa bukin tera ngkai a onimakina aia Aaro? Neneri raoi aia reirei ao rongorongoia. Ngkanne, ko a kona ni baireia bwa bon iai te Aro ae ko na onimakinna.