Te karioiango: Bukina ngkai a aki bukamarua te Kiritimati Ana Tia Kakoaua Iehova, bwa a aki kakoauaa Iesu.

 Te koaua: Boni Kristian ngaira. Ti kakoauaa ae e tii kona n reke te kamaiuaki rinanoni Iesu Kristo.​—Mwakuri 4:12.

 Te karioiango: Kam karaureia utu n aromi n reireinia kaaina bwa a na aki bukamarua te Kiritimati.

 Te koaua: Ti rangi n tabeakinia utu, ao ti kabongana te Baibara ni buokiia iai bwa a na kaan riki reitakia.

 Te karioiango: Kam aikoa namakina kakukurein te Kiritimati ae reke man te tituaraoi, te rau n te aonnaba, ao ai te nano ae raoiroi nakoia aomata nako.

 Te koaua: Ti kakorakoraira naba n anganga ao ni kaotiota te rau ni katoabong. (Taeka N Rabakau 11:25; I-Rom 12:18) N te katoto, e boraoi arora ni kairi ara botaki n taromauri ao n uarongorongo ma ana kaetieti Iesu ae kangai: “Kam anganaki n akea boona, aanga naba n aki kabooaki.” (Mataio 10:8) Irarikin anne, ti kabotoa ara rongorongo i aon Ana Tautaeka n Uea te Atua ngkai bon tii anne ae kona n reke iai te rau ni koaua n te aonnaba.​—Mataio 10:7.

•   E tua Iesu bwa ti na kakauringa matena, ma tiaki bungiakina.​—Ruka 22:19, 20.

•   A aki bukamarua te Kiritimati ana abotoro Iesu ma taan rimwina ake rimoa. E taku te New Catholic Encyclopedia bwa “e a tibwa bukamaruaki te Moanibung n 243 [C.E.],” ae tebubua tabun te ririki imwini maten te kabanea n abotoro.

•   Akea te bwai ni kakoaua ae e bungiaki Iesu n Ritembwa 25. E aki taekinaki ana bongi ni bung n te Baibara.

•   Ti kakoauaa ae e aki kukurei te Atua n te Kiritimati ibukina bwa e nako mani katei ao waaki ni beekan.​—2 I-Korinto 6:17.

 A bati aomata aika teimatoa ni bukamarua te Kiritimati e ngae ngke a ataia ae e nako mairouia beekan ao e aki boutokaaki n te Baibara. A kona n titiraki ni kangai aomata akanne: A aera Kristian ngkai a na kariaia ribaakia? Tera te kangaanga ni bukamaruana?

 E kaungaira te Baibara bwa ti na iaiangoira, ao ni kabongana ‘wanawanara.’ (I-Rom 12:1, 2) E reireinira kakawakin te koaua. (Ioane 4:23, 24) Ngaia are e ngae ngkai ti kan ataa aia iango aomata ibukira, ma ti riai n ongeaba n ana boto n reirei te Baibara n aki ongea ribaakira iai.

Kioina ngkai ti rineia bwa ti na aki bukamarua te Kiritimati, ti karinea inaomatan temanna ma temanna ni karaoan ana babaire iai.  Ti aki kairoroia tabemwaang bwa a na bukamarua te Kiritimati ke ana aki.