Nicolas nè Céline beè kpeesĩ́ ló dõona kà ànà-ànà. Tọ nàà tóm ea di France beè kọ bàá kil dõona kà bõ̀ònatõ̀ò gé sí tóm. Bà kọ́ọ̀: “Túá ból, nyíéi beè palàge ẹẹ, sõò née beè láá zọ̀ nà gbò kóò e beè ié naaá nu. È gáà beè palàge zọ̀ gbò e bà di bẹẹ ãa bõ̀ònatõ̀ò naaá nu.” a Tã́gíní bé e gè nyaaná tõ̀ò é láá naa kọọ̀ ge zọ̀ gbò nen naaá nu á tàvàlàí lóá, éé ní ea é láá nvèè bá nèi tṍó e kìl dõona kà bõ̀ònatõ̀ò ẽ? Mósĩ́ deè ní e dõona gbò é láá nvèè bá nèi ẽ́? Vaá mósĩ́ deè ní eo é láá siè kpóó ló gbò e bà di o ãa bõ̀ònatõ̀ò vaá ié nágé sìà kpóó ló é?

TÉNÌ KÀ NÒÒKÚU EA DI MM̀ KPÁ KÁÍ EA É LÁÁ NVÈÈ BÁ NÈI

1. Dẹ̀ẹ̀a boo Jìhóvà. (Ps. 37:5) Ene kà vígà pábia ea bée kọlà Kazumi, ea ólò tõó Japan, beè nyaaná tõ̀ò vaá aa bõ̀ònatõ̀ò ea ni tú 20 gbáá siimá, tṍó e gbò ea dóm ólò sí tóm nè nyáánáe tẹlẹ dõona ketõ̀ò. Mósĩ́ deè ní ea beè “tú nú [ea] gé náa gbẹẹ́ bá Jìhóvà” ẹ? À kọ́ọ̀: “M beè kọ́ bé e pọ̀ beè siím naa, bé ea dú áá m̀m̀ naa, nè bé em beè ié tã̀àgã̀ bùlà naa nè Jìhóvà. Buù tṍó em náà vó, à ólò nèm kói em íè bíi ló.”

Mósĩ́ deè ní eo é láá kpáá palàge dẹ̀ẹ̀a boo Jìhóvà ẹ? Dì belí bé e té ólò ié bíi ló múú nè gbò nú ea é náa kọ á dùm naaá, níà bé ea dú bíi kọ é naa gbò nú ea é agẹlẹ ló bẹẹ zìgà naa ẽ́. Nicolas e beè zẹ́ẹ́ kọ́ nú ea kil lóá, beè mòn kọọ̀ ge bugi togó boo nu dòòmà bá Ébràhàm, Jíízọ̀s, nè Pọ́ọ̀l e ba beè sọ̀bá gã́bug nu kọbé bà láá naa bùlà Bàrì, beè naa kọ á agala boo kọọ̀ Jìhóvà é nveenìè bá neè ẽ. Be è kilsĩ́ gè nó Kpá Káí boo bẹẹ lóó, àé nveè bá nèi kọ é láá ĩ̀ìma kọ̀láá kà tã̀àgã̀ e kpeèsĩ́ ló vaá siè kpóó ló pá vígà tení dú ló gbò nú e ni nó.

 2. Ó gá tú gbò e bà di bõ̀onatõ̀ò eo beè zẹ́ẹ́ dìa doolé ló gbò e bà di o ãa bõ̀ònatõ̀ò. (Éklì. 7:10) Ene kà vígà págbálà ea bée kọlà Jules beè nyaaná bé ea ólò tõó dùm naa tṍó ea aa Benin kil United State. Vígàí kọ́ọ̀ “A beè olòó tõó ḿ ló kọọ̀ àé dú bíi kọ ḿ kọ́ kọ̀láá kà nú ea kilím ló nè kọ̀láá kà ãa nen em monì. Boo béè kọọ̀ náa beè olòó naa vó gbẹá kĩée ea beè olòó tõo, a beè gbóó dààmà togó gè kpòòlà lóó lọl ló pá vígà. Tṍó ea ni nyímá ló pá vígà leevè, a beè gbóó nyaaná bé ea beè olòó bugi togó naa. À kọ́ọ̀, “M beè gbóó nyimá kọọ̀ dénè nen ea di boo kunukẽ̀í dú tẽ̀ènè kà vaá náa dẹẹa boo kĩée e dì. Bà ólò labví láb vaá ló bel mm̀ kele-kele sĩ́deè. À palàge dú bíi kọ é sọ̀tọ́ deè kọ gbò nen á naa nu belí bé ea léémá va naa.” Vóà naa, ó gá tú gbò e bà di o nómá bõ̀ònatõ̀ò doolé ló gbò e bà di o ãa bõ̀ònatõ̀ò. Ene kà vígà pábia ea bée kọlà Anne-Lise, ea gé sí tóm gyà deèsĩ́ tóm kọ̀ kpẹ̀a kọ́ọ̀: “M beè àà kil dõona kà bõ̀ònatõ̀ò kọbé m̀ nó ãa nu, ním beè naa vó kọbé m̀ mon tẽ̀ènè kà nú em beè aa lóá.”

Náa dú bíi kọ gbò kànen á tú bõ̀ònatõ̀ò e ba beè zẹ́ẹ́ dì doolé ló ní e bà di kátogóí. Ge kọ pá vígà e bà di o ãa bõ̀ònatõ̀ò náa nu mm̀ kele-kele sĩ́deè náa tõó dọ̀ kọọ̀ bà náa pọ́lọ́ nu. Àé dú lé be ò zẹ́ẹ́ nyimá bé e pá kĩá ólò naa nu naa besĩ́ ò kálá domà o lọ̀ọ̀gà bùlà. (Ẹ̀klì. 3:​1, 7b) Àé dú nágé lé be ò zógè lé nu dòòmà bá nè pá vígà e bà di kĩá tení dú ló bé eo lábvì láb naa, èlmà ge naa kọ bàá ẹ̀b nu belí bé ea léémá ni naa.​—2 Kọ́r. 1:24.

3. Tú lóó nè ge sí tóm mm̀ bõ̀ònatõ̀ò eo ã́àa kìla. (Fíl. 1:27) Ge nyaaná tõ̀ò ólò bĩiná gã́bug tṍó nè kói, sõò à palàge dú bíi kọ ó sí nònù kà lèlà tṍó eo ínà kĩá, vaá be à válí ó gá sí tenmá boo zúùm. Boo béè kọ àé dú bíi kọọ̀ pá vígà e bà di o ãa bõ̀ònatõ̀ò á mòn ni kọbé bà láá nvèè bá nè ni. Ene kà vígà pábia ea bée kọlà Lucinda e bàà kà a nvín pábia nè ẹ̀ẹ̀ beè àà kil ene kà pọ̀b bon ea di South Africa, kọ́ọ̀: “Ńdáà kóò beè dùùlàm bá deè tṍ kọọ̀ ḿ olòó tõo bã ló pá vígà e bà di ãa bõ̀ònatõ̀ò em gé kilá, zọ̀ vá kọ́ kpẹ̀a, vaá m̀ áálá bel gbẹá nònù. È beè kọ́ nè pá vígà kọ bà é láá bõoná gbẹá bẹẹ tọ besĩ́ bà kálá àà gé kọ́ kpẹ̀a.”

Ge ‘gbaaá ló’ pá vígà e bà di mm̀ bõ̀ònatõ̀ò eo ã́àa kìla é síè kpóó ló zìgà pá vígà vaá agẹló o zìgà. Gbò kànen e bà di mm̀ bõ̀ònatõ̀ò bà Anne-Lise e beè zẹ́ẹ́ kọ́ nú ea kil lóá, beè sièe kpóó ló kọ á zọ̀ kọ̀láá nen kọ́ kpẹ̀a. Éé ní ea beè sìlà aa m ẽ́? Vígàí kọ́ọ̀ “M beè gbóó nyimá kọọ̀ kà lé sĩ́deè ge dũunà bõ̀ònatõ̀ò dú gè zọ̀ pá vígà naaá nu.” Nagé, tṍó eo neè lóó gè sí tóm mm̀ bõ̀ònatõ̀ò, dì belí tóm gè kpalí kẽ vaá ẹ̀b nú ea kil ló Kíǹdòm Họ́ọ̀l, àé náa kọọ̀ pá vígà á nyimá kọ o ẹbvì o bá kọ ò dṹùnàè bõ̀ònatõ̀òa. Bé eo neè lóó gè sí tóm naa, níà bé e pá vígà é nyímá ni  ló naa ẽ́, vaá níí é náa kọọ̀ lóó ni á dĩ̀ìnà vaá naa kọ ó nyimá kọ ò íèè ãa pá tọ.

4. Bã̀àà ãa kóò. (2 Kọ́r. 6:​11-13) Be ò íe lèèma mm̀ gbò nen, àé váli vá ló gè bã̀àà ni kóò, vóà naa, vàlẹ̀bá dú nònù vaá ó gá vàlẹ̀bá kil be tṍó e nònù ni zaalà kọbé ò láá zọ̀ pá vígà loá bel vaá nyimá va ló leevè. Piiga boo gè nyimá ba bée. Tṍó eo kẽeà boo béè gbò nen vaá dú nen e bàé láá vàlẹ̀bá bã ló, bàé gbĩ́ gè nyimá ni ló leevè vaá bã̀àà ni kóò.

Tãa vó eo lábvì dõona íb láb kọbé gbò nen tú ni naamá kóò, naa kọọ̀ pá vígà á nyimá kà lèlà íb nen eo dúù. Nó nu lọl ló vígà Lucinda ea kọ́ọ̀, “E íe gã́bug kóò kátogóí boo béè kọ è ólò kolí va kilma tọ.”

“TUI ENE BOO LÉ BÁ”

Pọ̀ é láá sii sìgà nen gè bã Kíǹdòm Họ́ọ̀l e gbò e bà náa nyímá ló ní e bà di m ẽ́. Vóà naa, mósĩ́ deè ní eo é láá naa kọọ̀ lóó gbò e bà ã́àa dú bọọ bõ̀ònatõ̀ò á dĩ̀ìnà ẽ? Neǹ tóm Pọ́ọ̀l síèi kpóó ló kọọ̀, “tui ene boo lé bá dì belí bé e Kráìst beè tú boolo naaá.” (Róm̀ 15:7) Tení dú ló gè nó Kráìst, gbò kànen é láá nvèè bá nè gbò e bà ã́àa dú ba bõ̀ònatõ̀ò kọ lóó va á dĩ̀ìnà. (Bugi ńkpó ea kọ́ọ̀ “ Nú Ea É Láá Nvèè Bá Nè Ni Tṍó Eo Nyáànà Tõ̀ò.”) Náa kal ló béè vó, kọ̀láá nen ea di mm̀ bõ̀ònatõ̀ò bíi ló gbò pá nvín é láá naa kọọ̀ lóó gbò e bà ã́àa dú ba bõ̀ònatõ̀ò á dĩ̀ìnà.

Ge tú lé bá tuumá gbò nen bãàa mm̀ ge kolí va kyáà nè ge nvèè bá nè va. Dì belí nu dòòmà bá, ene kà vígà pábia beè faalá dõona kà vígà pábia ea ã́àa iná ba bálásĩ́ tenmá ló kẽ vaá kọ́ bé ea é láá bã faà naa nèe. Níí beè nvèè bá nè vígà pábia ea ã́àa dùí vaá naa kọ lóóe á dĩ̀ìnà.

NÈÀ DEÈ EA É NÁA KỌ Ó SÌM KILSĨ́

Tṍó e ńgulubèè gé bọọ, à ólò kọ̀ọ̀là kpá gã́bug tṍó besĩ́ a pó kálá agaló naa ní ea é pẹ́ẹ. Mm̀ tẽ̀ènè sĩ́deèá, tṍó eo kil dõona  kà bõ̀ònatõ̀ò, à dú bíi kọ ó tú kọ̀láá kà nú ea é láá naa kọ ó gá láá zọ̀ pá vígà naaá nu lọa ló. Nicolas nè Céline kọ́ọ̀, “Ge nyaaná tõ̀ò níà kà lé búma, vaá kọbé ò láá tõó kĩée eo ã́àa kila vaá láá zọ̀ dõona gbò naaá nu, à dú bíi kọ ó toní ãa láb.” Jean-Charles, e beè zẹ́ẹ́ kó nú ea kil lóá, kọ́ gbò bélè e pá a tọ ni íe, à kọ́ọ̀: “Ge nyaaná tõ̀ò a náa kọọ̀ bẹẹ gbò nvín á sìm kilsĩ́ vaá kpáá tõo bã ló Jìhóvà. Sìgà ẽ́ aa ló tṍóá, bẹẹ nvín pábia beè gbóó ié nu gè naa gbẹá nònù èèlè nyíè zẹ̀ẹ̀ sè vaá ba beè íbá ló bẹẹ nvín págbálà naamá neǹ kọ̀ kpẹ̀a ea gáà dììa múú.”

Vaá èé kọ́ vàẹ beè o dìtõ̀ò náa sọ́ ni tọ́ deè kọ ó láá kil kĩée e bíì gbò kọ̀ kpẹ̀a bọọ gé sí tóm ẽ́? Òé láá tú gbò lọ̀ọ̀gà bùlà e ni kọ́ nú ea kil ló mm̀ nakà togó belí siimá tóm gbẹá bọọ bõ̀ònatõ̀ò. Dẹ̀ẹ̀a boo Jìhóvà, nè lóó gè sí gbò tóm ea di mm̀ bõ̀ònatõ̀ò, zọ̀ pá vígà kọ́ kpẹ̀a vaá ò bãaà ãa kóò àbèè kọ ò dú lé kóò kilma ló gbò eo beè nyimá ló. Òé láá nvèè bá nè gbò e bà ã́àa iná bọọ bõ̀ònatõ̀ò àbèè gbò e bíi di ló. Tã́gíní bé e vulà ní ea ólò dòbá kà-kà gbò e bà gé nyoone nvéè Kráìst e, tṍó e nveè bá nè dõona gbò, àé náa kọ é kpáá tõo bã ló Jìhóvà. (Jọ́ọ̀n 13:35) Be ò náa vó, òé láá agala boo kọọ̀ níà “vààla gyọ́ọ ea léémá Bàrì.”​—Híb. 13:16.

Náa kal ló béè kọọ̀ ge nyaaná bõ̀ònatõ̀ò é láá du nu ànà-ànà, gã́bug pá vígà a íe ẹ́ẹ́-ẹẹ̀ nyíe vaá sim kilsĩ́ gbẹá ba ãa bõ̀ònatõ̀ò vaá olo é láá naa nagé vó! Anne-Lise kọ́ọ̀, “Ge kil dõona kà bõ̀ònatõ̀ò a nveè bá nèm kọ ḿ nyimá ló gã́bug pá vígà.” Kátogóí Kazumi a mon kọọ̀ tṍó eo kil dõona kà bõ̀ònatõ̀ò, Jìhóvà é nveè bá nè ni mm̀ sĩ́deè e nóo beè ẹ̀bmà dẽe.” Éé ní e Jules kọ́ ẹ́? À kọ́ọ̀: “Ge bã̀àà kóò a náa kọ lóóm á dĩ̀ìnà. Kátogóí, m kpáá tõo bã ló gbò e bà di nà ãa bõ̀ònatõ̀ò, vaá náa é váli ḿ ló gè àà na kĩí.”