SÌGÀ gbáá ea kil nvéeá, be o beè iná ńkem̀ bon ea kọlà Sangir Besar e múú bééá tení ló ea di Indonesia, ò gáẹ̀ beè mòn taà kà vígà pábia e bà ólò tõó gã́ múú ea di kĩá. Ba beè palàge nyimá va ló boo béè ba sìtóm kọ̀ kpẹ̀a​—ea dú tóm gè nvèè bá nè gbò nen kọ bàá dã́ból ló Kpá Káí. Sõò, à íe tṍó e bà ólò sí dõona kà tóm.

Sìgà dee, bà ólò bã mm̀ múúá dàlàgì kpò dem kilma boo kpò. Sìgà demí ólò bọọ́ kà belí ból bọ́ọ̀l. Tṍó e ba ni náa vó lọ̀l, ba ólò gbóó ĩìtẽ́ boo kpòté vaá tú hámà kemá gbò demí naa ní ea é dú ńkem èl ból ké kõ̀ò. Tṍóá, bà ólò gbóó tú nvee mm̀ bọ́kẹ̀t vaá dàlà kilma ba tọ. Bà ólò gbóó tú gbò demá nvee mm̀ pọ̀bkà bẹ̀lẹ̀ e bàé nvee mm̀ típà vaá kilma kĩée e bàé síímá tóm ló èèlè.

Béè ene kà vígà pábiaá kọlà Hulda. A dìtõ̀ò beè naa kọ á láá tú gã́bug tṍó siimá tómí èlmà nagbòa. À ólò tú kpègè ea dú ló ẹ̀bmà nú ea kil ló pá a tọ. Sõò, à íe dõona kà nú ea beè dìé bùlà. A beè ié bíi ló pọ̀bkà fóòn kọbé à láá tú JW Library^® nvee boo. Hulda beè nyimá kọọ̀ gbò vídiò nè dõona kà gbò nú ea di mm̀ JW Library é nveenìè bá neèe mm̀ a sìtóm kọ̀ kpẹ̀a vaá naa kọ á palàge dã́è ból ló Kpá Káí.

Hulda beè olòó tú bàà kà ávà siimá tóm kọ̀láá deè lọ̀ọ̀le, vaá a beè sí tómí mm̀ enè ẽ́ nè sìgà, vaá a beè kení gã́bug dem ea ḿ-má mm̀ ńkem̀ típà. Tṍó e tṍó téní, a beè gbóó ié gã́bug kpègè ge zalmá pọ̀bkà fóòn.

Hulda kọ́ọ̀, “Náa kal ló béè kọọ̀ tóm gè kení demí beè palàge zọ̀m vaá ọọvẹ́m ló, dénè zọ̀í ólò tám nyíe tṍó em túù nà pọ̀bkà fóòn kọọmá kpẹ̀a vaá kpoogá dee ló nyòòmà nònù.” À kọ́ nágé kọọ̀, fóòní beè nveenìè bá neèe tṍó e pọ́lọ́ kom géè téní ã́, boo béè kọọ̀ née géè láá si ná Kíndòm Họ́ọ̀l gé sí nònù àbèè ge kọ́ kpẹa aa tọ dọ tọ. Nyíéi palàge ẹẹ kọọ̀ Hulda beè teelá tùlà a nu sẹ̀ẹ̀a sĩ́.