Yálá ŋɔ Tɔɔlaa ə gɔwɔtɔɔ yɛ ŋaawooɓolaa kɛ yələkɔlɔn ɉu a gwəlan 1914. Gwəlan dɔnɔi tii hu lɔ ɓə nwɔnɔ nukanŋaa di wɔ ŋaawooɓolaa ŋɔ holo gbəliɠaa ə gɔwɔtɔɔ laa. Gu yili kɔlɔn nəi ? Ə həɠə gwəlan tii ɓa ə too la yiihu ɓa, pələi mɛniɠaa kaa tɛɛ la, pələi nua kaa tuwɔi la, da yii Biblə ŋɔ lolowooɠaa kaa moi gu mɛniɠaa tii kaa.

1. Lə ɓə Biblə ə nɛɛ tɔwɔ ə mo ?

Daniɛlə ŋɔ hɛɓɛi ə mo yɛ ma Yálá ŋɔ Tɔɔlaa kaa pai kɛ gɔwɔtɔɔi yɛ ŋaawooɓolaa kɛ lowai ta laakulɔi yii kɛ da ma “ kwəlan mɛihweelɛ ” (Daniɛlə 4:13, 14 [4:16, 17, NWT]). Kwəlan damaa tɛɛ pulu, Zesu ə nowai tɔnɔi tii maamɛni ɓo yɛ kɛ ma “ nuai di ho laa li Yálá la di wɔ huwalawala nwɔ lowai ”, ə lɛɛ ə mo nwɔnɔ yɛ ma nowai tii ho nii kɛ kpɛɛ li (Lukə 21:24). Yɛ pələi gu kaa pai gaa la gwəlan mɛihweelɛi tii laa ə kulɔ a gwəlan 1914.

2. Ə həɠə gwəlan 1914 ɓa ə too la yiihu ɓa nua túwɔ́ pələ kaa ləi ə lɛɛ mɛni ləkɛɛɠaa ɓə tɛɛi ?

Zesu ŋɔ kalan nea di maaləngɛ diɛ ma : “ Ə́ pai lowai da yɛnɛɛ ŋaa kpɛɛi lowai kɔ́lɔn ɉɛn lə kɛɛɠaa ɓə ku kaa pai gɔlɔn ɉii la ? ” (Matie 24:3) Zesu ə di woo pulu pənə yɛ ma, a pa kɛi a Yálá ŋɔ Tɔɔlaa hu tɔɔmun yələkɔlɔn ɉu, mɛni tamaa kaa pai kɛ tɛɛ lɔi mɛi. Mɛniɠaa tii taɠaa ka, kɔ mɛniɠaa, pulu, da lɔi kpɛlin mɛni (Matie 24:7 ɓo). Biblə ə nɛɛ nwɔnɔ tɔwɔ ə mo yɛ ma “ yɛnɛɛ ŋaakpɛɛi lowai, ” nukan duwɔ pələ kaa pai gɛi ‘ mɛni ɲaanwanaaɠaa diɛ kɛ ’ (Timote veelɛ 3:1-5, Ɉɛɓɛ yili ninɛ). Ə həɠə gwəlan 1914 ɓa ə həli la yiihu ɓa, gwa kɛ mɛni ɲaanwanaaɠaa tii kaai diɛ kɛ.

3. Ə həɠə voloi Yálá ŋɔ Tɔɔlaa ə ŋaawooɓolaa kɛɛ kɔwɔtɔɔ la, lə mɛni ɓa mɛniɲɔn da lɔ ɓə pɛlɛi ma ?

Ɓɛlowai Zesu ə kɛ la a Yálá ŋɔ Tɔɔlaa hu tɔɔmun yələkɔlɔn ɉu, ɉu ho kwea ə kɔ pɛlɛ Sətana da ŋɔ ɲinɛnŋaa diɛ. Sətana ə hwɛɠɛ gɔi tii hu. Biblə kaa kɛi ma “ di bili ə yɛɛ lɔi mɛi da ɲee pɔɠaa ” (Kulɔ ponoŋa hɛɓɛ 12:9, 10, 12). Sətana lii kələnŋaa gwəi kpɔ kɛnɛ maahɔlɔɓo ə gɔlɔn yɛ ma nwun na pili hiɛ li. Yili ɓa a mɔnɔ tamaa laa nua diɛ lɔi mɛi naa kəlee. Yili a gɛ gu ɲaakaa lə mɛni ɓa mɛni ɲɔnwɔɔɠaa da kɛ kɛi. Yálá ŋɔ Tɔɔlaa kaa pai mɛniɠaa tii kəlee kpɛɛi.

 Ə́ WƆ MƐNIKƆLƆNŊAA TA PƐLƐ MA

4. Biblə ŋɔ lolowooɠaa kwɛdɛnŋaa a gu hwilɛn gwəlan 1914 ɓa

Nolowoo pɔ mɛni laahwɛɛ mɛni doloo hu. . . 

• (D) Gbɛɛ ɓə nwului tii maamɛni hwilɛnŋaa ma ? (Nwookpuɔ 19 kaa, [Nwookpuɔ 22 NWT ]).

• (E) Ŋɔ tɔɔlaa ə kpəla ləi bələi ? (Daniɛlə 4:26-30 ɓo [4:29-33 NWT]).

• (F) Lə ɓə həli Nabukodonosorə ɓa “ gwəlan mɛihweelɛi tii tɛɛ pulu ” ? (Daniɛlə 4:31-33 ɓo [4:34-36 NWT]).

Nolowoo pɔ mɛni laahwɛɛ mɛni veelɛnaa hu. . . 

• (G) Gbɛɛ ɓə nwului tii maamɛni hwilɛnŋaa ma ? (Tɔɔɓəlaa kɛmɛni dɔlɔɔ 29:23 ɓo).

• (H) Di wɔ tɔɔlaa ə kpəla ləi bələi ? Gu gɔlɔn ləi guɔ ma ɓɛlowai Zesu ə kɛ la lɔi mɛi dɔɔlaa tii ho nii kɛ pənə li ho gɔwɔtɔɔ ? (Lukə 21:24 ɓo).

• (I) Minɛ da minɛ lowai ɓə dɔɔlaa tii ə pənə ə gɔwɔtɔɔ la ?

 6. Nɛ yɛ́ ma ə́ laana yɛ́ ma Yálá ŋɔ Tɔɔlaa kaa kea ma yɛ ŋaawooɓolaa kɛ

Matie 24:3, 14 ɓo, ə lɛɛ ka lono kɛ gɛɛmaalənŋaa ŋɛi mɛi :

• Kóló maamɛni wala-walaa ləkɛɛ ɓə a nɛ yɛ ma Yálá ŋɔ Tɔɔlaa aa ŋɔ ŋaawooɓolaa kɔwɔtɔɔ ?

• Ya tɛɛ ləi ə́ gólói tii ta kɛ ?

Yálá ŋɔ Tɔɔlaa aa gɔwɔtɔɔ kea yɛ ŋaawooɓolaa kɛ, ə lɛɛ voloi gaa pai lɔi mɛi naa kəlee ŋaawooɓoi la aa lɛɠɛ. Hebreu 10:24, 25 ɓo, ə lɛɛ ka lono kɛ gɛɛmaalən ŋɛi mɛi :

• Gwa kɛi gu ‘ Námu ŋa kuui kaa maa yɛ kpuɔ ’, lə ɓə maanɛɛ gu gɛ ?

 YII GU GALAN

Mɛniɠaa tɛɛi lɔi mɛi, da Biblə ŋɔ lolowooɠaa da nɛ diɛ ma Yálá ŋɔ Tɔɔlaa aa gɔwɔtɔɔ. Gwa nɛ guɔ ma gu laa mɛniɠaa tii la gwa kɛi Yálá Lawoo laahəli, ə lɛɛ guɔ li ŋaakpɔn ma.

Nɛɛ ə́ kili pɔ

• Gwəlan mɛihweelɛi ŋɛi maamɛni ɓoɔ Daniɛlə ŋɔ lolowoo hu, ɓɛlowai ə kpɛɛ la lə mɛni ɓə tɛɛ ?

• Lə mɛni ɓa ə́ laana yɛ́ ma Yálá ŋɔ Tɔɔlaa ə gɔwɔtɔɔ yɛ ŋaawooɓolaa kɛ a gwəlan 1914 ?

• Ya pɛli nɛi ləi yɛ́ ma ə́ laana yɛ́ ma Yálá ŋɔ Tɔɔlaa aa gɔwɔtɔɔ yɛ ŋaawooɓolaa kɛ ?