Gu pɛli mun ə mɛni kɔlɔn ə tɛɛ guɔ. Gu maa liihɛlɛn gaa ma, ə lɛɛ a gu wɛlilakɛ. Yálá ho kɛ bɔ nukanŋaa di kulɔ ŋɔ ŋaawoo ɓo mu (Zelemi 10:23, TMN). Yili ɓa, gu maakpaan gaa Yálá ɓa gu tənəndɔɔ mɛni ɓa, yɛ pələi lɔ lokolo maakpaan gaa la gaa nua diɛ dənəndɔɔ mɛni ɓa (Izai 48:17, 18, TMN). Biblə ŋɔ tɔn nwooɠaa da gu hwilɛn pələ lɛlɛɛ mɛi. Yili kaa a Yálá ŋɔ mɛinɛɛ.​—Timɔtə veelɛnaa 3:16 ɓo.

Zehova ŋɔ tɔn nwooɠaa da yɛnɛɛ yii ɓo pələ lɛlɛɛ lɛ guɔ háákələi. Pələi nwɔnɔ gwa pɛli tinaa Yálá ŋɔ mɛinɛɛɠaa hɔlɔɓoi la, kpɛɛ hwa kɛ ma, dɔn nwooɠaa tii da yili lɛ guɔ. Yii Yálá ɓə gu pɛli, maanɛɛ gu lɛɛ nwoo mu, yɛ gu tənəndɔɔ.​—Somə 19:7, 11, TMN ; Kulɔ ponoŋa 4:11 ɓo.

Biblə ŋɔ tɔn nwoo taɠaa da gu túwɔ́ pələ lɛ guɔ mɛni tamaa hu a ɉaŋaa. Dakpɛliɠaa da hwilɛn gu yii pələ taɠaa diɛ kpɔlɔ sói (Túwɔ́ pələ 15:29). Maanɛɛ guɔ gu kiliŋahiɛ, ə gɛ pələi maanɛɛ gu tɔn nwooɠaa pɔ túwɔ́ ɓo la, gu bələ kaa (Haŋɔn 2:10-12, TMN). Gwa gɔɔmaa həɠə : Biblə yɛ, nukanŋaa di wɔ yɛnɛɛ kaa a Yálá ŋɔ mɛinɛɛ. Dɔn nwoo tii a gu tənəndɔɔ kóló kɛɛna, pɛlɛ laaləi, gwa kɛ hiɛhɛn mɛi. Yili a kpɔnmaa tɛɛ gu pɔ, gu kɛ gili-gili, ə gɛ gu ho pa nuta maa mɛni pili ɉu.​—Túwɔ́ pələ 17:28 ɓo.

Zesu ə tɔn nwoo hweelɛ ɓo, diɛi di maa mɛni wala-walaa. Dɔlɔɔ a nukanŋaa kɛ mɛni yɛnɛɛ nwun nɛ, ya ɓaa : di Yálá kɔlɔn, di nwɛlilakɛ, diɛ ti ma  təlimo laa hu. Maanɛɛ gu gu kili lɛɛ dɔn nwoo tii hu, gu kɛmɛniɠaa kəlee hu (Haŋɔn 3:6, TMN). Nua da dɔn nwoo tii pɔ túwɔ́ ɓo a di nii kəlee, da Yálá ŋɔ ɓəlan naa hɔlɔɓo, kwəinɛɛ kpɔkpɔ, ə lɛɛ yɛnɛɛ yii kpɛɛ ho ma.​—Matie 22:36-38 ɓo.

Dɔn nwoo veelɛnaa a pɛli gɛi, liilaa da nɛɛlaa di kɛ gwa nu takpɛliɠaa gu lowai (Kɔlɛntə dɔlɔɔ 13:4-7). Ya kɛi dɔn nwoo veelɛnaa pɔ túwɔ́ ɓo, akɛtii ə́ kaa nua hon ɉii yɛ pələi Yálá a di hon na.​—Matie 7:12 ; 22:39, 40 ɓo.

Pələi wɛlikɛmaa a pɛlɛn nua yee lɔ la gee, Biblə ŋɔ tɔn wooɠaa da yili kalan (Kɔlɔsə 3:12-14). Yálá lawoo a tɔn nwoo takpɛli kalan pɛlɛn ɲii ɓo nua diɛ, ya ɓaa : maa ho nɛɛli hulɔnu da nɛa di taɠa. Yili a pɛlɛn ɲii ɓo nua maakpɛ.​—Malikə 10:7-9 ɓo.

Yii Biblə a galan, gwa bɔ túwɔ́ ɓo, gwa gu yəi hɛnŋaa maakpɛ, ə lɛɛ gwa kɛ liilaa hu. Gɔɔmaa ɓaa : kɛlɛ-kɛlɛ hu, nua di təlimoɔ, ə lɛɛ di hwa kóló yali, di wɛli kaa kóló namu ɓa, mahɔlɔɓo, da Biblə ŋɔ tɔn nwooɠaa pɔ túwɔ́ ɓo (Haŋɔn 10:4, 26, TMN ; Hebulu 13:18). Yálá lawoo kaa kɛi guɔ, hɛn gu maakpaan gaa ma, gwa ɉɔlɔɓo, gu gu ɲɛi lɛɛ yili ɓa. Biblə yɛ gu Yálá ŋɔ ɓəlan naa ɓɛlɛkɛma, gu dɛɛ gu yəi hɛnŋaa diɛ.​—Matie 6:24, 25, 33 ; Timɔtə dɔlɔɔ 6:8-10 ɓo.

Biblə ŋɔ tɔn nwooɠaa da gu maakpɛ ɲɔn ɲəi (Haŋɔn 14:30 ; 22:24, 25, TMN). Gɔɔmaa ɓa : Yálá aa tɔn dɔɔ lɔɔhon naa ɓa, gwa yili maawiɛ, gwa gu kpɔɔ maakpɛ ɲɔn ɲəi, yii a nu paa, ə lɛɛ nwɔnɔ gwa gu maakwea hiɛhɛn ŋɔ kɛɛkalaa ɓa (Rɔmu 13:13). Zehova ho tɔn dɔɔ li lɔɔkpəlɛɛ ɓa, kɛlɛɛ, yɛ nu ho gbələ ho ɲee tɛɛ ma (Somə 104:15, TMN ; Kɔlɛntə dɔlɔɔ 6:10). Yálá ŋɔ tɔn nwooɠaa da kpɔnmaa tɛɛ gu pɔ, maahɔlɔɓo, da gu kalan, ə gɛ guɔ gu kpɔɔ mɛikaa gu túwɔ́ pələɠaa da gu wɔ kiliŋahiɛɠaa hu (Somə 119:97-100, TMN). Kɛlɛɛ, kilistalea kpɔkpɔɠaa di hwa Yálá ŋɔ tɔn nwooɠaa maawiɛ lɔ dɔlɔ kulɔ mɛni ɓa. Da gɛ Yálá maawiɛ mɛni ɓa.​—Matie 5:14-16 ɓo.