Korintkarank Poili Chitt 10:1-33
10 Bhav-bhoinnimno, atam tumi hem zannam zalʼlem mhaka zai, ki amche sogle purvoz kupa khala asle ani te sogle doria par korun gele.
2 Te kupa khala asle ani doriantlean gele tednam tannim Moizesachea ekvottant bautizm ghetlo.
3 Sogle Deva thaun mellttalem tem ekuch torechem jevonn jevle,
4 ani te sogle Deva thaun mellttalem tem ekuch torechem udok piele. Karonn te Devachea tea khoddpa thaun pietale jem tanchea borabor choltalem, ani tem khoddop mhunnttlear Krist.*
5 Punn, tanchea modlea choddxea zannancher Devachi maniotai nasli dekhun tankam oronnʼnneant* marun uddoile.
6 Tannim vaitt vostunchi axa dhorli toxi ami dhorchi nhoi mhunn heo vostu amkam xittkaunni zaun asa.
7 Tanchea modle thodde zann murti-puza kortale, toxi ami korchi nhoi. Tanchea vixim oxem boroilʼlem asa: “Lok khaunk ani pieunk bosle. Ani uprant utthon mouza-mosti korunk lagle.”
8 Toxench, tanchea bhaxen ami onoitik kuddicho sombond* dovorchem patok korchem nhoi. Tanchea modlea thoddeamnim oxem kelem dekhun ekach disak 23,000 lok mele.
9 Tanchea modlea thoddeamnim keli toxi ami Jehovachi* porikxa korchi nhoi. Karonn tannim toxem kelem dekhun sorpamnim tankam chable ani te mele.
10 Toxench, tanchea bhaxen ami gunngunnonk zaina, tanchea modle thodde gunngunnle, ani nas kornnarean tancho nas kelo.
11 Tankam ghoddleat teo vostu amkam udharonn zaun asa. Ami sonvsarachea xevottak pavleant ani amkam xittkaunni diunk heo vostu boroun dovorleat.
12 Taka lagon, jea konnank apunn ubo asa oxem dista, tannim poddona zaunk chotrai dhorchi.
13 Dusrea munxancher ailea tachea poros veglli porikxa tumcher ieunk na. Punn Dev visvaxi, ani tumchean sosunk zaina tosli koslich porikxa to tumcher ieunk diunchona. Punn, porikxechea vellar tantuntlean bhair soronk to vattui toiar kortolo, jea udexim tumi ti sosunk pavtolim.
14 Taka lagon, mhojea mogachea ixttamno, murte-puje thaun pollon vochat.
15 Tumkam ontor korpachi tank asa oxem somzon hanv tumchea lagim uloitam. Hanv jem uloitam tem sarkem vo chukichem tem tuminch tharaiat.
16 Axirvadacho pelo zaka lagon ami magnneant upkar attoitat, tantuntlean pielea uprant ami Kristachea rogtache bhagidar zainant kai? Ani zo unddo ami moddttat, to khalea uprant ami Kristachea kuddiche bhagidar zainant kai?
17 Unddo ek asa dekhun ami zaite asonui ekuch kudd zaun asat, karonn ami sogle to ekuch unddo khatat.
18 Zolma thaun Izraelitkar asat tea lokam vixim chintat: Je bhettoilʼlea bolidanantlem khatat, te vedi lagim bhokti korunk bhagidar zainant kai?
19 Tor, murtek vo tichea mukhar bhettoilʼlea bolidanak mhotv asa, oxem hanv mhunnonk sodhtam kai?
20 Na. Tachea bodlek, hanv mhunnonk sodhtam ki videxi raxttrantle lok jim bolidanam bhettoitat tim Devak nhoi punn noxttea dutank bhettoitat. Ani tumi noxttea dutam sangata bhagidar zalʼle mhaka naka.
21 Tumi Jehovachea* peleantlem ani teach borabor noxttea dutanchea-i peleantlem pieunk zaina. Toxench, tumi “Jehovachea* meza voilem” ani teach borabor noxttea dutanchea-i meza voilem jevunk zaina.
22 Vo ‘ami Jehovak* ragan* bhorcho proitn kortat kai’? Ami tachea poros chodd xoktivont asat kai?
23 Sogleo vostu korum ieta,* punn sogleoch vostu faideacheo asat oxem nhoi. Sogleo vostu korum ieta, punn sogleoch vostu urba ditoleoch oxem nhoi.
24 Dor eklean, aplea faidea vixim nhoi punn dusreachea faidea vixim chintunk zai.
25 Masachea bazarant jem viktat tem khaiat, ani tumchea ontoskornnak lagon koslich choukoxi korinakat,
26 karonn “prithum ani ticher asa tem soglem Jehovachem.”*
27 Bhavarthant naslolea eklean tumkam jevnnak apoilim, ani tumkam vochonk zai zalear tumchea mukhar jem dovortat tem khaiat, ani tumchea ontoskornnak lagon koslich choukoxi korinakat.
28 Punn konnem-i tumkam oxem sanglem, “Hem bolidan mhunn bhettoilʼlem.” Tor tannem sanglem dekhun ani ontoskornnak lagon, tem khainakat.
29 Hanv tumchea ontoskornna vixim nhoi, punn tea dusrea munxachea ontoskornna vixim uloitam. Dusreachem ontoskornn mhaka guneanvkari mhunn tharaina zaunk hanv mhoji svotontrtai uzar korunk sodhina.
30 Hanv magnneant upkar attoun khatam, tori astana konn tori mhaka hanv chuk kortam oxem mhunntta zalear hanvem tem khavop sarkem zatolem kai?
31 Taka lagon, tumi khatat, pietat vo jem kitem kortat tem soglem Devak mhoima mellonk korat.
32 Tumi Judevank, Grik lokank ani Devache sobhek addkholl zaum nakat.
33 Zaitim zannam salvar zaunchim mhunn, hanv zoso mhozo nhoi punn zaitea zannancho faido polloitam, ani tankam sogleank khuxal korpacho proitn kortam, toxench tumi-i korat.
Footnotes
^ Vo “tem khoddop Krist.”
^ Hem utor choddxe pavtt eka oslea zageak uzar kelam zoim chodd lok ravonant, kainch roinant ani thoim chodd zhaddam ani udokui asona.
^ Grik bhaxent, hem utor ovisvaxiponnak lagon ragar zata taka uzar kelam.
^ Vo “Sogleo vostu korunk mhaka porvangi asa.”
