Korintkarank Poili Chitt 7:1-40
7 Atam hanv tumkam tea prosnanche zobab ditam je tumi mhaka boroun vicharlole. Ek munis bailek hat laina zalear* borem zatolem.
2 Tori astana onoitik kuddicho sombond* dovrop atam chaltem zalʼlem asa dekhun, dor eka dadleak tachi bail aschi ani dor eke bailek ticho ghov ascho.
3 Ghovan aplea bailecheo kuddicheo gorzo purnn korcheo, ani bailen aplea ghovacheo kuddicheo gorzo* purnn korcheo.
4 Bailek aplea kuddicher odhikar na, punn tichea ghovak asa. Tech toren, ghovak aplea kuddicher odhikar na, punn tachea bailek asa.
5 Eka-mekacheo kuddicheo gorzo purnn korunk nakarum nakat. Magnnem korunk lagon tumi oxem korunk tharaitat zalear tumi dogaimnim toiar zaun thoddea vella pasot oxem korchem. Punn tea uprant tumi porot ektthaim ieunchem, na zalear tumkam svotacher tabo na dekhun Soitan tumkam tallnnent ghalit.
6 Hanvem sanglam tem tumi korunk zata, punn ho kaido oso nhoi.
7 Hanv asa toso sogle zann asche oxi mhoji itsa asa. Punn, dor ekleak Deva thaun aplem dennem mellʼllam, konnank hea torechem, ani anik konnank dusre torechem.
8 Atam hanv kazar zaunk nasloleank ani vidvank oxem sangtam ki tim hanv asa toxim ravlear tankam boreak poddttolem.
9 Punn tim svotacher tabo dovrunk xokonant zalear, tannim kazar zaunk zata. Karonn kuddichea itsank lagon lasot ravchea bodlek tim kazar zalim zalear chodd borem.
10 Kazar zaleant tea lokank hanv hi suchounni ditam, khorem mhunnttlear hanv nhoi punn Somi dita: Eke bailen aplea ghova thaun veglli zaunk zaina.
11 Punn ti veglli zali zalearui, tinnem dusrea lagim kazar zaina astana ravonk zai vo aplea ghova sangata xanti korun porot tachea sangata ravonk zai, ani eka ghovan aplea bailek soddunk zaina.
12 Atam dusreank Somi nhoi, punn hanv sangtam: Eka bhavachi bail bhavarthant na ani tori astana ti tachea sangata ravonk toiar asa zalear tea bhavan aplea bailek soddchi nhoi.
13 Ani eke bailecho ghov bhavarthant na ani tori astana to aplea baile sangata ravonk toiar asa zalear te bailen aplea ghovak soddcho nhoi.
14 Karonn bhavarthant na tea ghovak tachea baile lagim zalʼlea kazarak lagon povitr mhunn lekhtat, ani bhavarthant na tea bailek tichea ghova lagim zalʼlea kazarak lagon povitr mhunn lekhtat. Oxem naslem zalear, tumchim bhurgim oxudʼdh zaupachim, punn atam tim povitr asat.
15 Punn bhavarthant na to sangati soddun vochonk* sodhta zalear, taka soddun vochom-di. Oslea poristhitint eka bhavan vo bhoinnin aplea kazari sangatea borabor ravonkuch zai oxem na. Devan tumkam xantin jieunk apoileant.
16 Karonn baile, tum tujea ghova sangata ravli zalear, konn zannam tum ghoddie tujea ghovak salvar korit? Vo ghova, tum tujea baile sangata ravlo zalear, konn zannam tum ghoddie tujea bailek salvar korit?
17 Jehovan,* dor ekleak jem dilam ani dor ekleak jea poristhitint apoila, tannem toxench cholchem. Tor soglea sobhank hanv hi suchounni ditam.
18 Khoinchea-i munxak sunot zalea uprant apoilʼlo kai? Toxem zalear, tannem toxench ravchem. Khoinchea-i munxak sunot zaunk na tednam apoilʼlo kai? Toxem zalear, tannem sunot korchi nhoi.
19 Sunot zalea vo sunot zaunk na, hem mhotvachem nhoi, punn Devachi adnea pallop mhotvachem.
20 Dor ekleak jea poristhitint apoila, tannem toxench ravchem.
21 Tum chakor aslo tednam tuka apoilo kai? Tor tea pasot uskenaka, punn tuka suttka mellonk xokta zalear ti sondhi soddinaka.
22 Karonn zaka chakor astana Somiachea ekvottant apoilo to svotontr zalo ani to Somiacho zaun asa. Toxench, zaka svotontr astana apoilo to Kristacho chakor zaun asa.
23 Mol farik korun tumkam vikte ghetleat, dekhun munxanchi chakri korpachi bond korat.
24 Bhav-bhoinnimno, dor ekleak jea poristhitint apoileam, tannim Deva mukhar toxench ravchem.
25 Atam ankvar* lokam vixim sangchem mhunnttlear, tanchea vixim Somia koddlean mhaka koslich adnea mellonk na, punn hanv mhojem mot sangonk sodhtam. Somian mhaka doia dakhoili dekhun hanv sangtam tacher tumi visvas dovrunk zata.
26 Aichi kotthin poristhiti polloun, ek munis asa tosoch ravlear ekdom borem zatolem oxem mhaka dista.
27 Tum kazarachea ekvottant bailek bandlolo asa kai? Toxem zalear, svotontr zauncho proitn korinaka. Tum kazarachea ekvotta thaun svotontr zala kai? Toxem zalear, ek bail sodhop bond kor.
28 Punn tum kazar zata zalear pasun, tum koslench patok korina. Ani ek ankvar munis kazar zata zalear, to koslench patok korina. Tori astana, je kazar zatat tankam kuddiche dukh-tras sosunk poddttole. Punn hanv tumkam tantuntlean vattaunk sodhtam.
29 Tea bhair bhav-bhoinnimno, hanv tumkam hem sangonk sodhtam, thoddoch vell urlolo asa. Taka lagon, zankam bailo asat tannim atam thaun tankam bailo na zalʼlea bhaxen ravchem,
30 ani jim roddttat tannim roddonant tanchea bhaxen ravchem, ani jim khuxalkai monoitat, tannim khuxalkai monoinant tanchea bhaxen ravchem, ani jim viktim ghetat tannim viktem gheunk naslolea bhaxen ravchem.
31 Toxench, hea sonvsaracho faido ghetat tannim tacho purnn faido ghenant tanche bhaxen zaunchem, karonn hea sonvsarant ghoddttat teo vostu bodlot asat.
32 Khorem mhunnttlear, tumi uskea mekllim aslolim mhaka zai. Kazar zaunk naslolo munis Somiache sevek zuddlolea vostuncho usko korta, ki to koso Somiak khuxal kortolo.
33 Punn kazar zalʼlo munis sonvsari vostum vixim usko korta, ki apunn aplea bailek koso khuxal kortolo,
34 tachem dhean ek koddem asona. Tea bhair, kazar zaunk naslole bailek toxench ankvar asloleank, aplea kuddin ani monan povitr ravchea pasot Somiachea sevek zuddlolea vostuncho usko asta. Punn, kazar zalʼle bailek sonvsari vostuncho usko asta, ki apunn aplea ghovak koxi khuxal kortoli.
35 Punn hanv hem tumchea faideak lagon sangtam, tumkam khoinchech ritin addaunk* nhoi. Khorem mhunnttlear, hanv tumkam sarkem asa tem korunk urba ditam, jea udexim tumi tumchem dhean haloinastana Somiachi seva korit ravonk pavtolim.
36 Punn kazar zaunk naslolea khoinchea-i* munxak apunn sarke ritin vagona oxem dista zalear, ani tachi tornni pirai zaun gelea zalear, tannem kazar zaum ieta. Oxem kelear to koslench patok korina. Tor oslea munxamnim kazar zaunchem.
37 Punn konnui aplea kallzant apunn kazar zaunchona* mhunn tharav gheta, karonn taka kazar zaupachi goroz asa oxem disona, ani to aplea anvddeancher tabo dovorta ani apnnem ghetlolea nirnnoi-a pormonnem ghott ravta zalear to borem korta.
38 Tea pasot, zo kazar zata to borem korta, punn zo kazar zaina to chodd borem korta.
39 Ek bail ticho ghov jivo aso poriant kazari ekvottant taka bandloli urta. Punn ticho ghov morot zalear,* ti apleak zai tea dadlea lagim kazar zaunk xokta, punn fokot Somiant aslolea lagim.*
40 Punn ti asa toxich ravli zalear chodd khuxal astoli oxem mhaka dista. Ani mhaka purnn khatri asa ki oxem mhunnonk Devache povitr xoktenuch mhaka margdorxon dilam.
Footnotes
^ Mhunnche, kuddicho sombond dovrunk.
^ Hem kazari sombonda vixim zaun asa.
^ Vo “vegllo ravonk.”
^ Vo “kednanch kazar zaunk na toslea.”
^ Utran utor, “fas ghalunk.”
^ Vo “Punn khoinchea-i ankvar.”
^ Vo “ankvar ravtolo.”
^ Utran utor, “mornnachea nhident nhidlo zalear.”
^ Vo “Somiachea ekvottant aslolea lagim.”
