“Tum amchem prarthon aikotai. Oskot munis Tuje-xim pavtoloch.”​—Stotr 65:2.

Thoddea lokank dista ki tanchim magnnim Dev aikona. Tori astana tim magnnim kortat. Karonn, oxem korun tanchea monak xanti melltta. Punn, fokot amchea monak xanti mellonk lagon ami magnnem korinant. Bible sangta: ‘Apnnak ulo martolea somestank, khorea monan ulo martat tankam Jehova a sodam laginch asa. To tanchi bob aikota ani tankam nivarta.ʼ​—Stotr 145:18, 19.

Je lok Jehova Devak khorea monan ulo martat tanchem to aikota mhunn ami khatri dovrunk zata. To mhunntta: “Tumi Mhoje-xim ieun Mhaka ulo martat ani prarthon kortat tedna, Hanv tumchem aikotolom.”​—Jeremias 29:12.

“Magnnem korit ravat.”​—Romkarank 12:12.

“Magnnem korit” ravonk, Bible amkam urba dita. Tantunt oxem-i boroilam ki “dor eka vellar” magnnem korit ravat. Hantuntlean, Jehova Devak ami tache lagim magnnem kelʼlem zai mhunn spoxtt dison ieta.—Matev 26:41; Efezkarank 6:18.

Ami Deva lagim uloilʼlem Devak kiteak zai? Ami ek udharonn polloum-ia. Ek bhurgo, dhanvon aplea bapai lagim voita ani mhunntta: “Daddy, daddy, please mhaka modot kor.” Aplea bhurgeak kitem zai tem bapui zannam. Tori astana, tea bhurgeachea tonddantlim tim utram aikon to khub khuxal zata. Aplo bhurgo aplo mog korta ani apunn taka modot kortolo mhunn taka visvas asa hem to pollounk xokta. Teach toren, ami Jehova lagim magnnem kortat tednam to khub khuxal zata. Ami tacho mog kortat ani tacher visvas asa mhunn, tachea lagim modot magtat tem to pollounk xokta.—Mhonnʼnneo 15: 8; Jakob 4:8.

“Tumchea soglea uskeancho bhar tacher ghalat, karonn taka tumchi kallji asa.”​—1 Pedru 5:7.

Dev amcho khub mog korta ani taka amchi kallji asa. Ami koslea poristhitincho fuddo kortat ani amkam kosle uske asat te to bore bhaxen zannam. Dekhun to amkam modot korunk sodhta. Tea pasot, amchea monantle sogle uske ami sanglolem taka zai.

Adlea kallar, ek Devacho sevok aslo, zo sodanch tachea lagim magnnem kortalo ani aple sogle uske taka sangtalo. (Stotr 23:1-6) Tachem nanv David. Dev tacho khub mog kortalo ani sodanch tachim magnnim aikotalo. (Itihas 13:22) Devak amchi pasun khub kallji asa ani amchim magnnim aikonk to axeun ravta.

Zaitim vorsam poilim, Devachea eka sevokan aplea kovitent him utram mhunnttlolim. To Devak aplo ixtt mantalo ani Dev tachem aikota mhunn taka purnn khatri asli. Tea pasot, taka kotthin poristhitincho fuddo korunk dhir mellʼllo.​—Stotr 116:1-9.

Dev amchem aikota mhunn amkam ghott visvas asta tednam ami tachea lagim magnnem korunk fattim soronant. Atam ami Spain-achea utʼtorek ravtolea Pedro-chem udharonn polloum-ia. Tacho 19 vorsancho put, eka accident-an bhair poddlo. Tea vellar, taka khub dukh zalem. Tannem Deva lagim kallzantlean porot-porot magnnem kelem. To sangta: “Jehova Devan, mhojea ixttam udexim, mhaka ani mhoje bailek bhuzvonn dili.”

Magnnem kelʼlean, tancho put porot jivo zaunk na tem khorem, punn tantuntlean Pedro ani tachea kuttumbak khub dhir mellʼllo. Tachi bail, Maria Carmen sangta: “Magnnem kelolean, hanv mhojem dukh sosunk pavlem. Mhaka koxem bhogta tem Jehova Dev bore toren somzota mhunn hanv zannam. Karonn, hanv tachea lagim magnnem kortalim tednam, mhojea monak xanti mellttali.”

Tor, Dev khorench lokanchim magnnim aikota mhunn Bible-antlean ani hea udharonnantlean kollon ieta. Punn Dev soglinch magnnim aikona. Toxem zalear, thoddim magnnim aikota ani thoddim aikona, oxem kiteak?