ADLEA tempar konnui kazar zatalim tednam novro vo tachi famil vhoklechea familik moladik vostu, zonvaram vo poixe diun mol farik kortalim. Ani thodde pavtti novro vhoklechea famili pasot kam pasun kortalo, zoxem Jakoban kelem. Tannem Rakela lagim kazar zaunk sat vorsam porian tachea bapai pasot kam kelem. (Ut. 29:17, 18, 20) Tor hem mol kiteak farik kortalim tem polloum-ia.

Bible-acho zannar Carol Meyers sangta: “Adlea tempar choddxeo famil xetkamti aslim. Tor ek dhuv kazar zaun dusreachea ghora voitali tednam, tancho ek vavraddi unno zatalo. Hea toren zata tem luksonn bhorun kaddunk ghoddie vhoklechea familik, novro vo tachi famil mol farik kortalim.” Toxench hem mol dilolean, novreachea ani vhoklechea famili modem ixttagot ghott zatali ani hea toren kotthin vellar tim eka-mekak modot korunk xoktalim. Tea bhair, hem mol dilolean tea cheddvachem utor zalam ani hea fuddem tachi kallji gheunchi ani rakhchi zobabdari tachea bapaichi nhoi, punn ghovachi mhunn kollon ietalem.

Punn vhoklechea familik mol farik korop, hacho orth, tea cheddvak viktem gheunk zatalem vo vikunk zatalem oxem nhoi. Karonn Ancient Israel—Its Life and Institutions, hem pustok oxem sangta: “Tem mol farik kelolean, tea cheddvak viktem ghetat oxem disonk puro. Punn hem vhoklechea familik zalʼlem luksonn bhorunk dilʼlem mol mhunn kollon ieta.”

Aiz pasun, thoddea desamnim, novreachi famil mol farik korpachi rit palltta. Punn eka cheddvachea Kristi avoi-bapain cheddea lagim chodduch maglem zalear novreak itlem vhoddlem mol farik korunk, kazar zaunk ravchem poddttolem vo to pioneer seva korta zalear taka tachi seva soddun, chodd vell kam korchem poddttolem. Tor Kristi avoi-bapui oxem korinant. Hea toren, tim ‘girestkaieche axechim’ nhoi mhunn tim dakhoun ditat ani ‘tanchi somjikai sogleank dixtti poddtta’.​—2 Tim. 3:2; Filp. 4:5, NW; 1 Kor. 10:32, 33.

Thoddea desamnim vhoklechea familik kitlem mol farik korunk zai tea vixim kaide asat. Ani tea desantlim Kristi avoi-bapui he kaide pallttat. Karonn Kristanvamnim ‘sorkari odhikariank khalti ravchem’ ani Devachea kaideam add vochonant tosle sorkarache kaide pallunk zai mhunn Bible sangta.​—Rom. 13:1; D.I. 5:29.