New York-achea Staten Island-ar WBBR radio station bandunk, Bethel-antle bhav ek voros maiz vavr korit asle. Thoim zago saf kelea uprant tannim kamdarank ek vhoddlem ghor bandlem ani sadhonam dovrunk anik ek bildding bandlem. Bandkam somplea uprant, radio vorvim broadcasting korunk tannim goroz tim sadhonam haddlim. Punn broadcasting suru korchea poilim tankam thoddea oddchonneancho fuddo korcho poddlo.

Radio station-acho main antenna bosounk bhavank kotthin zaunk laglem. Karonn ho antenna 91 metr lamb aslo ani to 61 metr lamb aslolea don lakddachea khambeam modem lambounk zai aslo. Bhavamnim poilech pavtti proitn kelo tednam, te to bosounk pavonk nant. Punn uprant tannim Jehova lagim modot magli ani dusrea pavtti proitn kelo. Tednam te to antenna bosounk pavle. Hea project-acher kam korpi bhav Calvin Prosser-an hea vixim oxem mhunnttlem: “Ami ekach dhopkeak to antenna bosounk pavlole zalear, ami amchich vhoddvik kortole asle.” Punn tannim sogli mhoima Jehovak dili. Tori astana, tankam anikui oddchonneancho fuddo korunk poddlo.

Bhavamnim poilech pavtti radio vorvim broadcasting suru kelʼlem. Tea vellar goroz tim sadhonam mellonk ekdom kotthin aslem. Tor bhavamnim anik konnem toiar kelʼlo 500 watts-ancho transmitter haddlo. Ani microphone vikto gheunchea bodlek, tannim eka sadea fonacho microphone uzar kelo. Febrerache eke ratik tannim him soglim sadhonam test korunk chintlem. Tor kitem tori broadcasting korunk zai aslem dekhun te Raj-gitam gaunk lagle. Tanchea modlo ek bhav Ernest Lowe-an tea ratik kitem comedy zali tem sanglem. Bhav gitam gaitale tednam tankam Judge Rutherford-acho b fon  ailo. Te bhav gitam gaitale tem tannem Brooklyn-a thaun radio vorvim, tem mhunnttlear sumar 25 kilometr pois thaun aikolem.

Bhav Rutherford-an tankam mhunnttlem: “Bond korat tumcho khell! Tumi mazram bhaxen zhogoddttat distat.” Tednam bhavank loz bhogli ani tannim transmitter rokddoch bond kelo. Punn radio bore bhaxen cholta, ani atam thaun te broadcasting suru korunk xoktat mhunn tankam kollʼllem.

1924-achea Febrer 24 tarker thaun, poilem broadcasting suru zaunchem aslem. Tednam bhav Rutherford-an sanglem ki amcho Raza Jezun amkam dilʼlem kam korunk hem radio station uzar zatolem. Toxench soglea lokank, tim khoinchea-i zati-katichim asum, tankam Bible, toxench ami jietat tea kalla vixim somzonni mellop hem radio station bandpacho udʼdhex asa mhunn tannem kolloilem.

Hea poilea broadcasting-a udexim zaito ies mellʼllo. Ani hem radio station, 33 vorsam poriant Jehovachea lokancheo kariavolli broadcast korunk uzar zalem.

1924-achea Julay mhoineant, sonvsarbhorchim Bible vidʼdhearthi Columbus Ohio-nt eka odhivexonak hajir zalim. Tannim Arabic, Inglez, French, German, Greek, Hungarian, Italian, Lithuanian, Polish, Russian, Scandinavian, ani Ukrainian hea bhasamnim bhaxonnam aikolim. Hea odhivexonache thodde bhag radio vorvim broadcast kele, ani Ohio State Journal hea newspaper-ant dor disa odhivexona vixim lekh chhapunk manddavoll keli.

Brestar, Julay 24 tarker 5,000-am poros chodd bhav-bhoinnamnim odhivexon zalem tea xarant porgottnni keli. Tannim sumar 30,000 pustokam dilim ani hozaramnim Bible obheas suru kele. Tea disa vixim eka Pahrogopur masikent oxem sanglolem: “Odhivexonacho ho sogleam-von khuxalkaiecho dis aslo.”

Sukrar, Julay 25 tarker bhav Rutherford-an aplea eka bhaxonnant ek dokument vachlo. Tea dokumentant dhormik fuddari kosleo fotti sangtale tem ukteponnim boroilʼlem. Bhav Rutherford-an sanglem ki jea Rajea vorvim Dev munxakullak besanvam diuncho asa, tea Rajea vixim dhormik fuddari, rajki fuddari ani veapar-dhondo korpi, lokank sot xikonk dinant. Toxench, he munis League of Nations-ak tenko ditat ani hea songottnne vorvim Dev raz choloita oxem sangtat, jem ekdom chukichem asa mhunn bhavan sanglem. Tor hi khobor lokank sangonk Bible Vidʼdheartheank dhirachi goroz asli.

Hea odhivexonacho bhav-bhoinnancher kitlo boro porinnam zalo tea vixim Pahrogopur-achea eka  lekhant oxem sanglem: “Hea odhivexonak hajir zalʼlea bhav-bhoinnancho bhavarth anikui ghott zalo . . . Ani kitlo-i virodh aslear pasun porgottnni korit ravonk tankam dhir mellʼllo.” Tea odhivexonak hajir zalʼlo bhav Leo Claus-an oxem sanglem: “Odhivexon zalea uprant bhav Rutherford-an jem sanglolem tem amchea vattarant sangonk ami soglim urben aslim.”

Bhav Rutherford-an tachea bhaxonnant jem sanglolem ti mahiti Ecclesiastics Indicted hea ttrekttant chhapun aili. Ani Otumbr mhoineant Bible vidʼdheartheamnim hem ttrektt lakʼkhamnim lokank diunk suru kelem. Cleveland Oklahoma-chea eka lhanxea xarant, Frank Johnson lokank him ttrekttam vanttʼttalo. Tim diun zalea uprant, thoddim bhav-bhoinnam taka vhoronk ieunchim aslim. Tankam ieunk azunui 20 minttam aslim. Punn bhavan thoim bhair ravop dhokeachem aslem, karonn tea xarantle thodde munis to porgottnnechem kam korta dekhun tacher ekdom ragar asle ani te taka sodhunk bhonvtale. Tor apunn sampoddna zaunk bhav laginch aslolea eka igorjent liponk gelo. Tea igorjent konn naslo mhunnttoch bhavan tea ttrekttachi ek kopi pastor-achea Bible-ant ghatli ani dor eka boskacher ek-ek kopi dovorli. Hem kam tannem soddsoddit korun kaddlem. Torui tache lagim anik vell urlolo mhunnttoch, tannem anik don igorzamnim vochon oxench kele.

Uprant Frank begin-begin tea zagear gelo zoim bhav-bhoinnam taka vhoronk ieunchim aslim. Taka dhorunk bhonvtale tea munxank mellona zaunk, to eka petrol pump-achea fattlean vochon liplo. Te munis thoinchean pasar zale, punn tankam Frank dixtti poddonk na. Tor te thoinchean gelea uprant, thoim laginch porgottnni kortalim tim bhav-bhoinnam Frank-ak vhoronk ailim ani tim thoinchean gelim.

Hea vixim ugddas kortana tanchea modlea eka bhavan oxem sanglem: “Thoinchean bhair sortana ami tea tinui igorzam koddlean pasar zalim. Tednam dor ek igorje bhair 50 zannam tori ubim aslim tem ami polloilem. Tantuntlim thoddim zannam tem ttrektt vachtalim, ani her zannam tem ttrektt pastor-ak dakhoitalim. Tor ami trasant poddpachim borim suttlim. Sampoddnastana tim ttrekttam lokank pavounk Jehovan amkam zannvai dili ani tannem amchi rakhonn keli dekhun ami tache upkar attoile.”

Dusrea desamnim pasun Bible Vidʼdheartheamnim bhienastana porgottnni keli. France-achea utʼtore vatten bhav Jozef Krett-an Poland-a thaun ailʼlea mining kortolea kamdarank porgottnni keli. Bhav Krett tea vattarant ek bhaxonn diuncho aslo, zacho vixoi, “Meloleank Beginuch Jivontponn Astolem.” Bhav-bhoinnamnim thoinchea lokank amontronnam dilim tednam, tea ganvchea padrin lokank thoim vochonakat mhunn sanglem. Punn tannem sanglolem tachem portench zalem. 5,000-am poros chodd lok, ani to padri pasun bhavachem bhaxonn aikonk ailo. Apnnem jem kitem sanglem tem sarkem na zalear sang mhunn bhav Krett-an tea padrik sanglem. Punn tea padri lagim kainch zobab naslo. Thoinchea lokank Devachea Utrachi bhuk asa ti polloun bhav Krett-an aplea lagim aslolim soglim prokaxonam tankam dilim.—Am. 8:11.

Toxench, Claude Brown nanvacho ek bhav bori khobor porgottunk Afrikechea Gold Coast desant gelo, zaka atam Ghana mhunnttat. Tannem thoim zaitim prokaxonam vanttlim ani zaitim bhaxonnam pasun dilim, jea vorvim zaitea lokank bori khobor porgott zali. John Blankson nanvacho ek munis zo tednam pharmacy iskolant xiktalo, to bhav Brown-achea eka bhaxonnak hajir zalo. Tannem bhaxonnant jem aikolem tea vorvim hench sot mhunn taka rokddench kollʼllem. To sangta: “Mhaka sot mellʼllem tednam hanv ekdom khuxal  zalom ani mhojea borabor iskolant xiktolea zaitea lokank hanvem tea vixim sanglem.”

Dev Trindad mhunn Bible khoinch xikoina hem John-ak kollon ailem. Tor ek dis hea vixim eka padrik vicharunk to igorjent gelo. Padrin tacher ragar zaun oxem mhunnon taka dhanvddailo: “Tum ek Kristanv nhoi, tum ek Lucifer. Voch hangasorlo!”

Ghora vochon John-an tea padrik chitt boroili, ani ami bhair mellon Trindadi vixim uloum-ia mhunn sanglem. Punn padrin John-achea iskolantlea mukhel lecturer-ak complain keli. Tea lecturer-an John-ak aplea ofisant apoilo ani taka vicharlem: “Tunvem khoreaninch padrik chitt boroilʼli?”

John-an “Hoi” mhunn zobab dilo.

Tednam lecturer-an taka padrik chitt boroun sorry mhunnonk lailem. Tor John-an chittint oxem boroilem:

“Mhojea sir-an mhaka hi chitt boroun tuka sorry mhunnonk laila. Punn tum khotteo xikounneo xikoita mhunn manun gheta zalearuch hanv tuka sorry mhunnonk toiar asam.”

Sir-an ragar zaun taka vicharlem: “Blankson! Hanvem hench borounk sanglem tuka?”

Tednam John-an mhunnttlem: “Sir, hachea bhair hanv anik kitem borounk xoktam?”

Hem aikon sir-an mhunnttlem: “Tum sorkarachea igorjechea padri add uloitolo ani hea iskolant urtolo oxem tuka dista? Ami tuka hea iskolantlean bhair kaddttole.”

Tednam John-an vicharlem: “Punn sir, tum amkam xikoita tednam amkam kitem somzona zalear, ami tuka prosn vicharinant kai?”

“Hoi vichartat,” oxem sir-an mhunnttlem.

Tednam John-an mhunnttlem: “Sir, thoim oxench kitem zalem. To munis amkam Bible-antlean xikoitalo ani hanvem taka ek prosn vicharlo. Punn to mhojea prosnacho zobab diunk xokona zalear, hanvem taka kiteak sorry mhunnonk zai?”

Xevottak Blankson-ak iskolantlean bhair kaddunk na ani taka sorry pasun mhunnonk poddonk na.

Tea akʼkhea vorsak kitem ghoddlem tea vixim eka Pahrogopur-ant thoddea utramnim oxem sanglolem: “Davida bhaxen ami pasun oxem mhunnonk xoktat: ‘Zhuzak Tunvem bollacho komorbond mhojea penkttak bandloi.’ (St. 18:39) Khorench hem voros khub urbebhorit aslem, karonn Jehovan amkam bhienastana bori khobor porgottunk koxi modot keli tem ami polloilem . . . ani tachim visvaxi sevokam . . . khuxalkaien ti bori khobor porgottit asat.”

Tem voros sompot ailem toxem, bhavamnim anik ek radio station bandunk manddavoll keli. Hem radio station Amerikechea Chicago xarant bandlolem ani taka UTOR hem nanv dilʼlem. Tea station-ak hem nanv divop sarkem aslem. Karonn 5,000 watts-ancho transmitter uzar korun Rajeachi khobor hozaramnim kilometr pois, tem mhunnttlear Canada-chea utʼtorechea vattarant pasun porgott zatali.

1925 vorsa, Bible Vidʼdheartheank Prokasovnni odheai 12 vixim novi somzonni mellʼlli. Punn hea somzonnek lagon thoddea zannamnim Jehovachi seva korop bond keli. Torui, zaitim zannam hi novi mahiti zannam zaun khub khuxal zalim. Karonn sorgar kosleo ghoddnneo ghoddleo ani tea vorvim prithumer aslolea Devachea lokancher koslo porinnam zalo tem tankam kollʼllem.