AMCHO MOGACHO MORTA TEDNAM DUKH SOSUNK MODOT

Dukhantlean Bhair Soronk Tumkam Koxim Modot Zatoli

PLAY

APLIM MOGACHIM MORTAT TEDNAM KITLEM DUKH ZATA TEA VIXIM HALINCH ZAITEA LOKAMNIM SODH KELA. Ami poilim polloilem toxem, dukhantlean koxem bhair soronk zai, tea vixim lok veg-veglle solʼle ditat. Punn pollounk gelear sogleam-von bore solʼle amkam Bible-ant mellttat. Hantuntlean amkam kollon ieta ki hea adlea zannvaiechea pustokant dilʼle solʼle amkam aiz pasun faideak poddttat. Amchea dukhantlean bhair soronk Bible-ant bore solʼle dileat te khorem, punn hachea bhair, hantunt asloli mahiti amkam anik khoinch mellchina. Hea udexim, dukhant aslolea zaitea lokank bhuzvonn mellonk xokta.

Amchim mogachim melolim koslech tras sosnant.

Bible sangta, “Meloleank koslich khobor asona.” (Upodexok 9:5) ‘Tancheo manddnnio fiskottun voitat.ʼ (Stotr 146:4) Bible-ant, mornnak nhidek sor kelam.—Juanv 11:11.
Devacher visvas dovorlolean amkam bhuzvonn melltta

Bible sangta: ‘Jehovache a dolle borea munxancher asat, tanchea magnneachi bob tachea kanar pavta.’ (Stotr 34:15) Magnnem korop mhunnttlear fokot aplea monachem vojem unnem korop, vo aplea chintnancher tabo dovropuch nhoi. Punn amchea kallzant kitem asa tem ami ukteponnim Devak sangop. Oxem kortat tednam sovkas-sovkas korun tachea sangata ixttagot zoddunk amkam modot zata ani to amkam bhuzvonn dita.
Fuddarak amchem jivit khub borem astolem

Aiz je lok mornnant nhidleat, te fuddarak hea prithumer jivont zatole mhunn Bible sangta! Ani hea vixim Bible-ant zaite pavtti boroilam. Tea vellar Dev, amchea “dolleantlim soglim dukam pusun kaddttolo, hea fuddem moronn anik aschem na, dukh anik korchimnant vo roddnnem anik aschem na, ani koslech tras aschenant.”—Prokasovnni 21:3, 4.

Aplim mogachim moron geleant tim jivont zatolim mhunn zaitea lokamnim, Jehovachea hea utrancher bhorvonso dovorla. Ani tea pasot, tankam aplem dukh sosunk xokti mellʼllea. Ami Ann nanvache eke bailechem udharonn polloum-ia, jicho ghov bhair poddlo. Tanchea kazari jivitak 65 vorsam zalʼlim. Ann mhunntta: “Bible vachlolean mhaka khatri mellʼlli ki amchim mogachim moron geleant tim koslech tras sosnant, punn tim Devachea ugddasant asat ani ek dis to tankam jivont kortolo. Jitle pavtti mhaka mhojea ghovacho ugddas ieta, tednam hea bhorvonxea udexim mhaka ghottai melltta. Ani tea pasot mhaka mhojea jivitantlem sogleam-von vhoddlem dukh sosunk modot zata.”

Tina, zachea vixim ami hea masikent poilim ulʼlekh kelʼlo ti sangta: “Tom melo tednam thaun Jehova sodanch mhojea adarak pavla mhunn hanvem onnbhovlam. Hanv dukhant aslem tednam to mhojea adarak pavla. Moron gelʼlea amchea mogacheank to jivont kortolo mhunn mhaka tachea bhasaunnecher purnn khatri asa. Hea karonnak lagon hanv mhojea Tom-ak porot polloitolem tea mhunnosor, mhojem dukh sosunk ani dor ek dis sarunk mhaka modot zata.”

Lakʼkhamnim lokank Bible-antlea bhasaunneantlean bhuzvonn mellʼllea. Punn tumkam ghoddie disot, hem soglem ek sopon zaun asa ani tem kednanch zaunchem na. Tori astana, Bible-ant asa tem soglem sot mhunn zaiteank khatri zalea. Tor tantunt dilʼlea solʼleancher ani bhasaunneancher tumi kiteak visvas dovrunk zata, tea vixim sodh korunk ami tumkam ieukar ditat. Ghoddie, tumkam pasun tantuntlean tumchem dukh sosunk modot mellonk xokta.