Palajatka karaloʼuta nüshajalaka Juan 4:1-21
4 Tawalayuu aishiikana tapüla, nnojotsü junoujaʼayatüinjatüin wanee pütchi eekai müin nümaʼanajeejatkai saaʼin Maleiwa. Jütüjaainjatü aaʼu palajana shiimainrejeʼeya nümaʼanajeejatüin shia, jama wattainnapain naalii sainküin mmakat na wayuu nünüikimaajanayaakana Maleiwa.
2 Anuu tü kasa jiyaawateetkalü akajee nümaʼanajeejatüin Maleiwa wanee pütchi: süpüshuaʼa tü pütchi nümaʼanajeejatkat Maleiwa, aküjasü süchiki nüntüin Jesucristo suluʼu wayuuin nia.
3 Nnojotpejeʼe nümaʼanajeejatüin Maleiwa wanee pütchi eekai süküjain nnojolin nüntüin Jesús suluʼu wayuuin nia. Tia pütchikat nümaʼanajeejatü neʼe chi niʼipolokoi Cristo, chi jaapakai achiki sünain nüntajachin otta chi yaaichipakai saʼaka wayuu.
4 Tachonniichein, nümaʼanajeejana jia Maleiwa otta jiyamülüinnapa na nünüikimaajanayaakana Maleiwa, jama miyoʼuleeinña maʼin chi paaʼinwakai amaa jia nuulialeʼeya chi paaʼinwakai amaa na manoujainsaliikana.
5 Naya wayuu nünüikimaajanayaakana Maleiwa, namaʼanajeejana na wayuu manoujainsaliikana, müshiijeseʼe naashajaain süchiki tü kasa namaʼanajeejatkat na manoujainsaliikana otta saapaa amaalü wayuu tü namakat.
6 Nümaʼanajeejana waya Maleiwa. Chi wayuu eʼraajakai Maleiwa kacheʼeshi sümüin tü wamakat, niasaʼa chi wayuu nnojoikai nümaʼanajeejachin Maleiwa nnojotsü kasajatüin nümüin tü wamakat. Wayaawatakalaka sükajee tia shiimainrejeʼeya nümaʼanajeejatüin Maleiwa wanee pütchi jee alawaataapa neʼe shia.
7 Tawalayuu aishiikana tapüla, ayataʼaya aijiraain jia, jama niain Maleiwa chi palajachikai alin apüla wayuu. Nüchon Maleiwa chi aikai apüla wayuu otta eʼraajünüshi Maleiwa nutuma.
8 Chi wayuu nnojoikai alin apüla wayuu nnojoishijaʼamata niʼraajüin Maleiwa, jama aipüralin maʼin chi Maleiwakai.
9 Anuu tü wayaawatakalü akajee alin waya nüpüla Maleiwa: nuluwataain chi Waneeshikai Nüchon saʼakamüin wayuu shiiʼiree katajatüin woʼu nünainjee.
10 Nuluwataain Maleiwa chi Nüchonkai süpüla outajachin nia shiiʼiree anajiraainjatüin wayuu nümaa Maleiwa, naaʼinrüin tia süka alin waya nüpüla, nnojotsü shiain sünainjee alin nia wapüla.
11 Tawalayuu aishiikana tapüla, naaʼinrülejeʼeya Maleiwa tia süka alin waya nüpüla, akaainjanaʼaya neʼe waya, aijiraainjana waya.
12 Nnojoishi eeichin wanee wayuu eʼrakai chi Maleiwakai. Ayatüleʼeya aijiraain waya eejeechi Maleiwa waneepia wamaa otta weʼreerü sülanaʼaleeinña maʼin tü waalinkat nüpüla.
13 Anuu tü wayaawatakalü anainjee ayatüinña paaʼinwain waya nümaa jee ayatüinña paaʼinwain nia wamaa: naapüin tü nüpülainkat wamüin.
14 Weʼrüinña nüjütüin chi Washikai Maleiwa chi Nüchonkai süpüla nuʼtteʼerajatüin wayuu, shiakalaka waküjain achiki tia.
15 Nüküjale wanee wayuu niain Jesús chi Nüchonkai Maleiwa, ayateechiaʼaya paaʼinwain chi Maleiwakai nümaa otta ayateechiaʼaya paaʼinwain chia wayuukai nümaa Maleiwa.
16 Watüjaa aaʼu alin waya nüpüla Maleiwa otta watüjaa aaʼu shiimain tü waalinkat nüpüla.
Aipürai maʼin chi Maleiwakai, niasaʼa chi aikai apüla wayuu waneepia ayatüshia paaʼinwain nümaa Maleiwa otta ayateechiaʼaya paaʼinwain chi Maleiwakai nümaa.
17 Alanaʼaleesia maʼin waalin nüpüla Maleiwa, nnojoleetkalaka mmoluwaain waaʼin sünain aashajawaa soʼu tü kaʼi kasalajaneetkalü oʼu saainjala wayuu sümüin, jama müin wakuwaʼipa saʼaka wayuu maʼaka nukuwaʼipa Jesucristo.
18 Chi wayuu aikai apüla Maleiwa nnojotsü mmoluwaain naaʼin, sülanaʼaleere maʼin naalin Maleiwa wapüla nnojoleerü mmoluwaain waaʼin. Jamüshijaʼa mmorüle wanee wayuu müsü sütaʼülüükai saaʼin nukuwaʼipa sutuma tia. Mmotkuʼu sümüle naaʼin wanee wayuu, nnojotsü alanaʼaleeinña naalin Maleiwa nüpüla.
19 Aipüralii waya süka aitüjüliinña waya nüpüla Maleiwa.
20 «Aishi tapüla Maleiwa» nümataarale wanee wayuu sümaa nüʼürülain nuwala, wayuu alaa chia makai. Chi wayuu maalinkai apüla nuwala eerejeʼeya niʼrüin nia, niaka aijeematüin Maleiwa nüpüla eerejeʼe nnojolin niʼrüin nia.
21 Anuu tü nuluwataakalü anain waya Maleiwa: chi wayuu aikai apüla Maleiwa alinjachi nuwala nüpüla.
