Apocalipsis 13:1-18
13 Shaʼwatakalaka chi wüi miyoʼukai maʼin saaʼu tü jasai sotpünaajatkat tü palaakat.
Teʼrüinjeseʼe wanee wüchii wünaʼapüjeejatü ojuʼitakat shirokujee tü palaakat, poloosü suʼuwa jee akaratshisü shikii. Sünain tü suʼuwakat eejatü poloosü kotse jee süshajünakalaka sünain shikii wanee pütchi mojutuka atuma Maleiwa.
2 Tü wüchii wünaʼapüjatü teʼrakat müsü aka naaʼin wanee leopardo, tü suuʼuikat müsü aka saaʼin nuuʼui wanee oso jee tü saanükükat müsü aka saaʼin naanükü wanee león. Kapülainka tü wüchii wünaʼapüjatkat nutuma chi wüi miyoʼukai, naapüin sümüin tü niinase süpülajatkalü aluwatawaa jee naapüin laülawaa sümüin.
3 Teʼrakalaka shiʼikaain maʼin wanee shikii tü wüchii wünaʼapüjatkalü ajachijünakat paala, ashatapejeʼe tia sülioʼukat mapa. Soonooko wayuu sainküinjeejatü mmakat sümaa tü wüchii wünaʼapüjatkat jee ponusü maʼin shia naaʼin.
4 Naʼwaajakalaka na wayuukana chi wüi miyoʼukai maʼin süka naapüin laülawaa sümüin tü wüchii wünaʼapüjatkat jee suʼwaajünakalaka tü wüchii wünaʼapüjatkat natuma sünain maa: «Nnojotsü eein wanee kasa eekai müin aka saaʼin tü wüchii wünaʼapüjatkat, ¿jaraiche maʼin chi eejiraajeechikai sümaa?».
5 Saapünakalaka laülawaa sümüin tü wüchii wünaʼapüjatkat süpüla suʼwaataainjatüin suluʼu tü pütchi sujuʼitirakat jee mojuinjatüin sünüiki nüchiki chi Maleiwakai, aapünüsiaʼaya laülawaa sümüin süpüla saaʼinrüin tü saaʼinreekalü amüin soʼu pienchi shikii piamamüin kashi.
6 Sujuʼitirüinjeseʼe pütchi mojutukai atuma Maleiwa* jee mojutuka atuma chaa eere kepiain nia, mojutushiʼiya sutuma na kepiakana chaa sirumatuʼu.
7 Suuʼulaanakalaka tü wüchii wünaʼapüjatkat süpüla sütkaainjatüin namaa na aneekuushikana jee sükanajakalaka naya, aapünüsü laülawaa sümüin saaʼu wayuu saʼakajeejatü tü eʼirukuukat süpüshuaʼa, naatayaa makalü anüiki, sainküinjeejatü pueulo süpüshuaʼa jee sainküinjeejatü mmakat.
8 Suʼwaajünaka tü wüchii wünaʼapüjatkat natuma na wayuu kepiakana sainküinpünaa tü mmakat. Soʼujeʼereeya shiʼitaanüin shikii wayuu,* nnojotyülia ashajünüin nanülia naya wayuukana suluʼu tü rooyo nanüliamaajatkat na wayuu katüinjanakana oʼu. Tia rooyokot nia kamaʼanaka shia chi Anneetchon oʼutunakai aaʼin.
9 Chi eekai kacheʼein anakajaʼa naapajüle tü pütchikat.
10 Eere wanee wayuu ataʼünnüinjachikai, ataʼünneechijaʼaya nia. Eere wanee wayuu oʼutakai saaʼin wayuu süka chajaruuta, oʼutuneechiaʼaya aaʼin nia süka chajaruuta. Müsüjeseʼe nachecherüinjatüin naaʼin na aneekuushikana jee kanoulainjana naya.
11 Teʼrakalaka joo wane wüchiʼiya wünaʼapüjatü, ojuʼitaasü shia shiinaluʼujee tü mmakat. Piamasü suʼuwa maʼaka nuʼuwa wanee anneetchon, mapajeʼe sünüiki maʼaka saaʼin sünüiki wanee wüi miyoʼu maʼin.
12 Shiiʼiyatüin tü wüchii wünaʼapüjatkat sümüin tü eetüjütkalia süpüleerua, wanaawain süpülain sümaa. Sootuin na wayuu sainküinjeejanakana tü mmakat süpüla naʼwaajüinjatüin tü palajatkat wüchii wünaʼapüjatü, tü ashatakalü alioʼu süchikijee sajachijuuin sutuma outaa.
13 Aainjasü kasa pülasü tü wüchii wünaʼapüjatkat, süshakatirüin sikoʼu iipünaajee mmapaʼamüin suʼupala wayuu.
14 Shimeejüin na wayuu kepiakana saaʼu tü mmakat süka tü kasa pülasü saainjakat suʼupala tü palajatkat wüchii wünaʼapüjatkat jee suchuntuin namüin na wayuu kepiakana saaʼu tü mmakat süpüla naainjainjatüin shiyaakua tü wüchii wünaʼapüjatkat, tü ashatakalü alioʼu süchikijee sajachijuuin süka chajaruuta.
15 Suuʼulaanaka saapüinjatüin kataa oʼuu* sümüin shiyaakua tü wüchii wünaʼapüjatkat süpüla saashajaainjatüin shiyaakua tü wüchii wünaʼapüjatkat jee suʼutirüinjatüin naaʼin napüshuaʼa na ayoutajaakana sümaa naʼwaajüinjatüin shiyaakua tü wüchii wünaʼapüjatkat.
16 Suchuntuin sümüin wayuu maʼleekalia shiʼitaanüinjatüin wanee jeerü sünain tü najapü nekiakat jee shiale sünain neʼipoʼu, suchuntuin tia namüin na tepichikana, na miyoʼuyuukana, na washinnuukana, na maʼletsekana, na taashikana akuwaʼipa jee na achepchieekana.
17 Tia süpülajatü nnojoluinjatüin shiyaʼlajüin wanee wayuu jee suiküinjatüin wanee kasa, aluʼusaʼa eere tü jeetkat sünain, tü sünüliakat tü wüchii wünaʼapüjatkat jee shiale sunuumerose tü sünüliakat.
18 Kekiinjachi wanee wayuu süpüla niyaawatüinjatüin saaʼu tia. Chi wayuu ayaawatakai saaʼu wanee kasa niyaawajüinjatü sunuumerose tü wüchii wünaʼapüjatkat, jama sunuumerosein shia wayuu, 666 tü sunuumerosekat.
Noota
^ «Airuʼutsü sünüiki nümüin Maleiwa jee airuʼutsü sünüiki sümüin nünülia» maluʼulu tia suluʼu griego.
^ Shia soʼujeʼereeya kachooin Adán sümüin Eva.
^ «Sütchin saaʼin» maluʼulu tia suluʼu griego.
