Apocalipsis 19:1-21
19 Taapakalaka sünüiki watta saalii wayuu chaa sirumatuʼu sünain maa: «¡Anakajaʼa juʼwaajüle Jah!* Niaʼaya oʼtteʼeraka waya chi Wamaleiwasekai, niaʼaya aʼwaajünüinjachika jee niaʼaya pülaka maʼin,
2 lotusü sukuwaʼipa nutuma süsalainjatpa saainjala wayuu jee atüjaana aaʼu aneerüinña sukuwaʼipa nutuma. Keraaitpa tü naaʼinrajatkat sümüin tü wayuu maaʼinsatkat maʼin, tü amojujakat nakuwaʼipa na wayuu eekana sainküinpünaa mma süka suʼluwajiraain sukuwaʼipa* namaa, pasalaainnapa nutuma Maleiwa na nüchepchia suʼutakana aaʼin tia wayuukat».
3 Nasoutamaatakalaka nachikuaʼa sünain maa: «¡Anakajaʼa juʼwaajüle Jah! Ayateeriaʼaya kaittüin waneepia tü sümüsainkat iipünaamüin».
4 Nasapainkashii na piamakana shikii pienchimüin laülaashii jee na pienchishiikana aapiee sünain aʼwaajaa chi Maleiwakai, chi joyotokoi saaʼu tü einasee süpülajatkalü aluwatawaa. «¡Amén!* ¡Anakajaʼa juʼwaajüle Jah!», müshii naya.
5 Taapakalaka wanee pütchi eejee tü einasee süpülajatkalü aluwatawaa: «Juʼwaaja chi Wamaleiwasekai jüpüshuaʼa jia nüchepchiakana, jia kojutukana amüin nia, jia tepichikana jee jia miyoʼuyuukana».
6 Taapakalaka sünüiki watta saalii wayuu maʼaka saaʼin suʼlotuin wüin eekai miyoʼuin maʼin jee maʼaka saaʼin sütürüla juya. Anuu nanüiki: «¡Anakajaʼa juʼwaajüle Jah! Oʼttuichipa sünain aluwatawaa chi Wamaleiwasekai Jehová,* nia Pülaka maʼin.
7 Talatüinjatü maʼin waaʼin jee waʼwaajüinjachi Maleiwa süka süntüitpain tü kaʼi kasaalüinjachikalü oʼu chi Anneetchonkai jee yapaitpa tü nuʼwayuusekat.
8 Ooʼulaanüsü saʼatüinjatüin sünain tü kuluut anakat maʼin aainjuushikat süka lino, jorottusü maʼin shia jee wulesü maʼin tia kuluutkat. Tia kuluutkat shiyaawase tü kasa lotokalü akuwaʼipa natuma na aneekuushikana».
9 Anuujeseʼe nünüiki chi aapieekai tamüin: «Anuu tü püshajüinjatkat: ‹Anakuwaʼipalii na wayuu ounejaanakana sünain tü ekawaa aipaʼajatkat, tü shikiirakat kasaalüinjachin chi Anneetchonkai›». Anuu sooʼomüin nünüiki: «Shiimainña tia nünüikikat Maleiwa».
10 Tasapainkaka taya nümülatuʼu chi aapieekai süpüla taʼwaajüinjachin nia. Anuujeseʼe nünüiki tamüin: «¡Jalian! Nnojo müin pia. Achepchieʼeraa neʼe taya wanaa pümaa maʼaka naaʼin na puwalayuukana, na eʼitaanakana ajapuluʼu naküjainjanain pütchi nüchiki Jesús. Anashi niale puʼwaajüin Maleiwa. Tü aküjünakat süchiki tü kasa alatajatkat naashin Maleiwa süpülajatü süküjünüin tü pütchi shiimainkat nüchiki Jesús».
11 Teʼrakalaka jutatüin tü sirumatuʼukat jee wanaa maʼin sümaa tia, niweetaaka wanee ama kasuutai, chi Oonookai sümaa Nünüiki Maleiwa jee chi Shiimainshikai, münüshi chi naajuchikai. Lotusü nutuma sukuwaʼipa süsalainjatpa saainjala wayuu nutuma jee lotusü sukuwaʼipa tü kasa naainjakat sünain wanee atkawaa.
12 Müsü aka saaʼin sikoʼu tü noʼukot jee watta maʼin saalii kotse saaʼu nikii, ashajünüsü nünain wanee anüliee, niaʼala neʼe atüjaaka saaʼu tia anülieekat.
13 Isharutsü nüsheʼin. Nünüiki Maleiwa, münüshi nia.
14 Oʼunushii na surulaat iipünaajeejanakana nüchiirua, kasuutannuu tü ama neʼejenakat, aainjuushi süka lino tü nasheʼinkat. Anasü maʼin tia kuluutkat, kasuusü maʼin nasheʼin jee wulesü shia.
15 Sujuʼitakalaka nuwaraluʼujee wanee chajaruuta miyoʼu maʼin jee kasasü maʼin. Tia süpülajatü nushutuinjachin naaʼu na wayuukana sainküinpünaa mma, meena nürüleejakai naaʼin süka kachueera jee nüchüüjeerü tü uuwakat eere tü achüüjüleekat. Tia shiyaawase jashichin maʼin chi Maleiwa Pülakai Maʼin.
16 Aluwataashi nia naaʼu na aluwataaliikana jee Naseñotse nia na sülaülakana mma, müsü sünain tü nüsheʼinkat wanaa maʼin sümaa tü nüpüʼükat.
17 Teʼrataalaka joo wanee aapiee shaʼwatüin pasanain sünain nuwarala chi kaʼikai, emetutkalaka maʼin nünüiki sünain neenajüin tü wüchii waawatakat iipünaapünaa. Anuu nünüiki: «¡Jürütkaa yaamüin! Juutkajaa sünain tü ekawaa eekat nutuma chi Maleiwakai.
18 Jika neʼiruku na sülaülajanakana mma, na shikiipüʼükana surulaat, na wayuu kojutukana atumawaa. Jika shiʼiruku ama sümaʼaleeya neʼiruku na saajunakana, jika neʼiruku napüshuaʼaleʼeya, jika niʼiruku chira wayuu eekai taashin akuwaʼipa, jika niʼiruku chira wayuu eekai achepchieein, chira eekai jintülin jee chira wayuu eekai miyoʼuin».
19 Teʼrakalaka tü wüchii wünaʼapüjatkat, na sülaülashiikana mma jee na nasurulaatsekana. Outkajaashii naya süpüla natkaainjanain nümaa chi naajuchikai chi ama kasuutaikai jee natkaainjanain namaa na surulaat iipünaajeejanakana.
20 Ataʼünnüsü tü wüchii wünaʼapüjatkat, ataʼünnüshiaʼaya wanaa sümaa chi nünüikimaajachiaakai Maleiwa, chi aainjakai kasa pülasü suʼupala jee chi emeejakai na eʼitaanakana anain sejeetse tü wüchii wünaʼapüjatkat jee na aʼwaajakana shiyaakua. Ojutünüshii naya piamaleʼeya kataiwaʼaya noʼu suluʼu tü laa chuwatakat maʼin, tü ajaʼttaleekalü atuma wanee kasa.
21 Oʼutuna aaʼinchii naya süka tü chajaruuta miyoʼukat maʼin ojuʼitaka nuwaraluʼujee chi naajuchikai chi ama kasuutaikai. Emirakalaka maʼin tü wüchiikalüirua süka shiküin neʼiruku.
Noota
^ Jee shiale «¡Aleluya!». Tü pütchikat Jah shiʼipa nünülia Jehová.
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
