Apocalipsis 21:1-27
21 Jeketü tü sirumatuʼu teʼrakat otta jeketü tü mmakat, jama nnojoluitpain tü sirumatuʼukat otta tü mma eejatkat paala jee nnojoluitpa tü palaakat.
2 Teʼrüinña Jerusalén, shia tü Jeketükat Jerusalén, ashakatüsü shia iipünaajee nümaʼanajee Maleiwa. Yapajüsü maʼin shia maʼaka yapajüin wanee wayuu nüpüla chi suʼwayuuseinjachikai.
3 Taapakalaka wanee pütchi eejee tü einasee süpülajatkalü aluwatawaa, emetutsü maʼin tia pütchikat sünain maa: «Pasanainsü sünain wayuu tü miichi aʼwaajüleekat Maleiwa. Kepieechi Maleiwa naʼaka na wayuukana otta nüpüsheena naya, eejeechi Maleiwa namaa.
4 Meerü nülaʼajaakai saaʼin Maleiwa naʼwüira naya wayuukana, nnojoleerü outaa, nnojoleerü mojuu aaʼin, nnojoleerü aʼyalajaa jee nnojoleerü saalin wanee kasa. Alatüitpa tü kasa müliapuʼukalü atuma waaʼin».*
5 «Jeketüitpa tatuma sukuwaʼipa kasa süpüshuaʼa», müshi tamüin chi joyotokoi saaʼu tü einasee süpülajatkalü aluwatawaa. «Anashi püshajüle tia pütchikat, jama shiimain shia otta ayateeria shia ekeraajüin» müshi niaya.
6 Jee nümakalaka tamüin: «Ekeraajüitpa süpüshuaʼa tia. Taya chi Shikiishikai wanee kasa otta taya Sajaʼttakai akajee wanee kasa.* Eere wanee wayuu eeka wüinñaasüin, tasiʼreechi nia tü wüin katakalü atuma soʼu wayuu, tü aparatkalü eejeere süparalüin wüin, nnojoleechi tachekajüin amüin nia saaʼu tia.
7 Aapüneerü süpüshuaʼa tia nümüin chi wayuu eekai nükanajüin, Nümaleiwaseechi taya otta tachonjeechika nia.
8 Eekajasaʼa na wayuu mmoleʼekana, na manoulakana, na wayuu yarüttakana maʼin akuwaʼipa, na aainjakana kasa eekai keemain maʼin, na oʼunnuliikana saaʼin wayuu, na aʼluwajiraakana nakuwaʼipa, na aaʼinrakana tü saaʼinrakat ouutsü, na aʼwaajakana shiyaakua maleiwayaasü jee napüshuaʼa na wayuu aküjakana naʼalain, ojutüneena naya suluʼumüin tü laa chuwatakat maʼin, tü ajaʼttaleekalü atuma wanee kasa, tia shiyaawase tü chiiruaajatkalü outaa».
9 Nüntakalaka wanee aapiee naʼakajeejachi na akaratshishii aapiee kajapuluʼukana tü iita kaluʼukalü akaratshisü kasa mojusü eeka atuma müliaa, shia sajaʼttiamüinka kasa mojusü tia. «Jalaichi yaamüin, teeʼiyataiwa pümüin tü nuʼwayuuseinjateetkat chi Anneetchonkai» nümakalaka tamüin.
10 Toʼuninnakalaka nutuma sükajee tü nüpülainkat Maleiwa, nümaakalaka taya saaʼumüin wanee uuchi miyoʼu maʼin jee niiʼiyatakalaka tamüin Jerusalén tü pueulo aneekuushikat. Ashakatüsü shia iipünaajee nümaʼanajee Maleiwa
11 otta eejatiaʼaya nuwarala chi Maleiwakai saaʼu. Jorottusü maʼin shia maʼaka saaʼin wanee ipa eekai anain maʼin sünoʼu, müsü shia maʼaka saaʼin tü ipa kanüliakat «jaspe», jorottokot maʼin sümaa chuwatüin maʼin shia.
12 Yaletüsü maʼin tü süsepükat sümaa miyoʼuin shia, poloo piamamüin soʼu, eejana poloo piamamüin aapiee aaʼinmajakana soʼu tia pueulokot otta ashajünüsü sünain soʼu tia pueulokot nanülia na polookana piamamüin nüchonnii Israel.
13 Apünüinsü soʼu tia pueulokot wüinpejeeruʼu, apünüinsü soʼu palaajeeruʼu, apünüinsü soʼu uuchijeeruʼu otta apünüinsü soʼu wopujeeruʼu.
14 Ashaʼwaleʼennüsü süsepü tü pueulokot saaʼu poloosü piamamüin ipa otta ashajünüsü sünain tia ipakat nanülia na polookana piamamüin aluwataaushi, na aluwataaushikana nutuma chi Anneetchonkai.
15 Eejatü wanee emeriijia najapuluʼu chi aashajaakai tamaa, aainjuushi süka ooro tü wunuʼu* nimeriijakalü aka tü pueulokot, tü soʼukot otta tü süsepükat.
16 Pienchisü süshekein tia pueulokot, wanaawasü sajaʼapüin sümaa tü seeruluinkat. Nimeriijaka tü pueulokot süka tü wunuʼu aainjuushikat süka ooro, wanaawasü seeruluin, tü sajaʼapüinkat otta tü sajaʼapüinkat chaa iipünaamüin eesü maʼaka saaʼin 2.220* kilómetro.
17 Nimeriijainña süsepü tü pueulokot, eesü maʼaka saaʼin 64 metro* sajaʼapüin, nimeriijain shia chi aapieekai süka tü shimeriijakalü aka wayuu.
18 Akumajünüsü süsepü tü pueulokot sükajee tü ipa kanüliakat «jaspe» otta akumajünüsü tü pueulokot süka ooro, jorottosü maʼin shia maʼaka jorottoin wanee rouya.
19 Eejatü ipa anasü maʼin sünain suuʼui süsepü tia pueulokot. Akumajuushi tü palajatkat suuʼui süka tü ipa kanüliakat «jaspe», tü wane süka «zafiro», tü wane süka «calcedonia», tü wane süka «esmeralda»,
20 tü wane suuʼuikalü akumajuushi süka «sardónica», tü wane süka «sardio», tü wane süka «crisólito», tü wane süka «berilo», tü wane süka «topacio», tü wane süka «crisoprasa», tü wane süka «jacinto» otta akumajuushi tü chiiruaajatkat suuʼui süka «amatista».
21 Poloo piamamüin soʼu tia pueulokot jee aainjuushi shia süka poloo piamamüin kaaʼürüla,* waneʼewai sukua tia soʼukot, aainjuushi süka waneesia kaaʼürüla otta tü wopu jerutkat aainjuushi süka ooro, jorottosü maʼin shia maʼaka saaʼin wanee rouya.
22 Nnojotsü teʼrüin wane miichi aʼwaajülee suluʼu tia pueulokot, jama müichipain Jehová,* chi Maleiwa Pülakai maʼin maʼaka saaʼin wanee miichi aʼwaajülee otta müsia neʼe nukuwaʼipa chi Anneetchonkai.
23 Nnojoluitpa choʼujaain sümüin tia pueulokot nuwarala chi kaʼikai otta warattuulinjatüin saaʼu sutuma tü kashikat, jama warattuuitpain saaʼu sutuma nuwarala chi Maleiwakai otta müshi chi Anneetchonkai maʼaka saaʼin wanee ranpara sümüin.
24 Meerü waraittakai saaʼin wayuu sainküinjeejatü tü mmakat soʼu tü nawaralakat otta kojuteerü tia pueulokot namüin na sülaülajanakana mma.
25 Nnojoleerü asürünnüin soʼu tia pueulokot soʼukai, jama nnojoleerüin saʼwalin saaʼu.
26 Meerü suʼwaajünakai aaʼin tia pueulokot sutuma wayuu jee kojuteerü shia sümüin.
27 Nnojoleerü ekeroluin suluʼumüin tia pueulokot wanee kasa eekai yarüttüin, nnojoleechiaʼaya ekeroluin wanee wayuu eekai naaʼinrüin wanee kasa eekai keemain maʼin otta eekai nimeejüin wayuu. Nayeena neʼe ekeroloka na wayuu ashajünakana anülia suluʼu tü rooyo nanüliamaajatkat na wayuu katüinjanakana oʼu, tia rooyokot nia kamaʼanaka shia chi Anneetchonkai.
Noota
^ «Alatüitpa tü kasa sümaiwajatkat» maluʼulu tia suluʼu griego.
^ «Alfa otta Omega, suʼttiajeekai otta sajaʼttiamüinkai wanee kasa» maluʼulu tia suluʼu griego.
^ «Kainñaruushi» maluʼulu tia suluʼu griego.
^ «12.000 estadio» maluʼulu tia suluʼu griego. 185 metro tü waneekat estadio. Pünaʼla tia suluʼu tü kanüliakat «Sooʼomüin pütchi B14».
^ «Eesü maʼaka 144 codo» maluʼulu tia suluʼu griego. Pünaʼla tia suluʼu tü kanüliakat «Sooʼomüin pütchi B14».
^ «Perlas» maluʼulu tia alijunaikiruʼu.
^ Pünaʼla tia suluʼu tü kanüliakat «Sooʼomüin pütchi A5».
