Tü nüshajalakat Juan 17:1-26
-
Tü chiiruaajatkat nünüiki Jesús sünain oʼuraajaa namaa na nikirajüinkana (1-26)
17 Shiasaʼa süchikijee nüküjain tia, niirakaakalaka Jesús iipünaamüin sünain maa: «Tashikalee, antüitpa tü kaʼikat. Kojuta putuma chi püchonkai süpüla kojutuinjachin pia nutuma.
2 Paapüin laülawaa nümüin saaʼu wayuu süpüshuaʼa, kateetkalaka noʼu waneepia nutuma na wayuu piʼitaakana najapuluʼu.
3 Na wayuu kateekana oʼu süpüla kaʼikat süpüshuaʼa choʼujaasü namüin neʼraajüinjachin pia, chi waneeshikaijaʼa suluʼu Maleiwain otta choʼujaasü neʼraajüinjachin Jesucristo, chi püjünalakai.
4 Kojutushi pia tatuma yaa mmapaʼa otta tekeraajüin süpüshuaʼa tü kasa puluwataakalü anain taya.
5 Tashikalee, anashi taikalaale paʼatoʼu süpüla kojutajachin taya putuma, maʼaka kojutapuʼuin taya putuma süpülapünaa sukumajünüin wayuu.
6 »Teʼraajirüin pünülia na wayuu piʼitaakana tajapuluʼu. Püchepchiapuʼu naya, piʼitaapejeʼe naya tajapuluʼu otta naaʼinrüinña tü puluwataakalü anain.
7 Nayaawatüitpa saaʼu piain kamaʼanajeejachin süpüshuaʼa tü kasa paapakat tamüin,
8 jama taküjain namüin tü pütchi pümaʼanajeejatkat, naapaa amaalü shia jee nayaawatüitpa saaʼu tantüshin pünülialuʼu otta nanouja anainrü püjünalain taya.
9 Achuntushi taya pümüin napüleerua, nnojoishi taya achuntushin süpüleerua wayuu. Achuntushi taya napüleerua na wayuu piʼitaakana tajapuluʼu, jama püchepchiain naya.
10 Pukorolo süpüshuaʼa tü kasa eekat tamaʼana, takorolokalaka süpüshuaʼa tü kasa eekat pümaʼana otta kojutushi taya atumawaa naʼakajee.
11 »Nnojolitchipa taya yaain saʼaka wayuu, anaayüliipejeʼe naya saʼaka wayuu otta aleʼejüinjachi taya pümaʼanamüin. Tashikalee, pia chi wuleshikaijaʼa maʼin akuwaʼipa, paaʼinmaja naya saaʼujee tü pünüliakat. Tü anüliee piʼitaakat tanain süpüla paaʼinwainjanain naya maʼaka paaʼinwain taya pümaa.
12 Taaʼinmajüin naya yaaiwaʼaya taya namaa saaʼujee tü pünüliakat, tü anüliee piʼitaakat tanain. Taaʼinmajüin naya otta nnojoishi eein wanee amülouikai naʼakajee, waneeshipejeʼe neʼe chi ajaʼttinneechikai naʼakajee süpüla shikeraajüinjatüin tü pütchi aküjünatüjütkalia suluʼu tü Karaloʼuta Nüchikimaajatkat Maleiwa.
13 Oʼunajachi taya pümaʼanamüin, taküjainsa tüü yaaiwaʼaya taya namaa saaʼu tü mmakat süpüla talatüinjatüin maʼin naaʼin wanaa tamaa.
14 Taküjain namüin tü pünüikikat, aʼürülaapejeʼe wayuu nanain süka nnojoluin wanaawain naaʼin namaa maʼaka nnojoluin wanaawain taaʼin namaa na manoujainsaliikana.
15 »Nnojotsü tachuntuin pümüin piyuʼluinjanain naya saʼakajee wayuu, shia tachuntaka pümüin paaʼinmajüinjanain naya nuulia chi Yolujaakai.
16 Nnojotsü wanaawain naaʼin sümaa wayuu maʼaka nnojoluin wanaawain taaʼin sümaa wayuu manoujainsat.
17 Shiimain tü pünüikikat, pükatala naya sükajee tü shiimainkat süpüla naʼyataainjanain pümüin.
18 Anaa joo naya tajütüin saʼakamüin wayuu, maʼaka püjütüin taya paala saʼakamüin wayuu.
19 Akatannüshi taya süpüla aʼyatawaa pümüin napüleerua, akaataajaʼa neʼe nayakana, akatannüshii sükajee tü shiimainkat süpüla naʼyataainjanain pümüin.
20 »Nnojoishi neʼe taya achuntuin pümüin napüleerua, achuntushiaʼaya taya pümüin napüleerua na wayuu anoujeenakana tanain, sünainjee tü pütchi naküjakat na tekirajüinkana namüin.
21 Paaʼinweenakalaka naya napüshuaʼa maʼaka paaʼinwain pia tamaa Tashikalee, paaʼinweenaʼaya naya wamaa. Sunoujeetka wayuu sünain püjünalain taya.
22 Kojutushii naya tatuma maʼaka kojutuin taya putuma, paaʼinwakalaka naya maʼaka paaʼinwain waya.
23 Paaʼinwashi taya namaa maʼaka paaʼinwain pia tamaa, wanaaweetka naaʼin suluʼujee tia. Sütüjaajeetka aaʼu wayuu püjünalain taya otta alin naya püpüla maʼaka alin taya püpüla.
24 Tashikalee, tachuntuin pümüin eeinjanain tamaa na wayuu piʼitaakana tajapuluʼu chaa eeinjachire taya, neʼraiwa tü kasa kojutukalü akajee taya putuma, jama aitüjülin taya püpüla süpülapünaa shiʼitaanüin shikii wayuu.*
25 Loto akuwaʼipachi maʼin pia Tashikalee, nnojoishi shiʼraajüin maʼin pia wayuu, aluʼuinjaʼa tayakai teʼraajüin pia. Natüjaaitpa aaʼu na tekirajüinkana püjünalain taya.
26 Teʼraajirüinnapa naya tü pünüliakat otta ayateeria teʼraajirüin shia süpüla alinjatüin wayuu napüla maʼaka alin taya püpüla. Ayateechikalaka paaʼinwain taya namaa».
Noota
^ Shia soʼujeʼereeya kachooin Adán sümüin Eva.
