Süchikijee 4026 Sü.W.

Nnojoishi keraain Jehová süpüla aluwatawaa saashin «tü wüikat» otta matüjainsai nia aluwatawaa. Nüküjain Jehová eejeechin wanee suuʼuliwoʼu tü jietkat achuwerajaajeechikai nikii Satanás, chi makai aka saaʼin wüi (Génesis 3:1-5, 15, noota). Nuuʼulaain Jehová süʼlaülaajaain wayuu jee suʼunirüin sukuwaʼipa wanaapünaa sümaa tü nüchekakat Satanás.

Juyakat 1943 Sü.W.

Nüpansaajüin Jehová nümüin Abrahán niainjachin wanee nülüin chi «suuʼuliwoʼu tü jietkat», chi aküjünatüjüikai achiki paala (Génesis 22:18).

Süchikijee 1070 Sü.W.

Nüpansaajüin nünüiki Jehová nümüin David otta nümüin Salomón süchiki niainjachin wanee nalüin chi «suuʼuliwoʼu tü jietkat», chi aküjünatüjüikai achiki paala (2 Samuel 7:12, 16; 1 Reyes 9:3-5; Isaías 9:6, 7).

Juyakat 29 So.W.

Nüküjain Jehová niain Jesús chi «suuʼuliwoʼu tü jietkat», chi aküjünatüjüikai achiki paala otta niainjachi aluwataaka nüchikumüin David (Galacia 3:16; Lucas 1:31-33; 3:21, 22).

 Juyakat 33 So.W.

Oʼutinna aaʼinchi Jesús nutuma Satanás, chi wüi nümaiwajachikai, müshi nüchotokai saaʼin shiineʼe nuuʼui suuʼuliwoʼu tü jietkat. Asoʼireʼenna aaʼinchi Jesús nutuma Jehová, amaanüshi iipünaamüin otta nüntaka eemüin Maleiwa sümaa nüsha mayaainjeʼe maainjalain nia. Eeitpaka süpüla katüin noʼu nüikeyuu Adán jee sülaʼajaanüin naainjala noulia (Génesis 3:15; Aluwataaushikana 2:32-36; 1 Corinto 15:21, 22).

Soʼutpünaa 1914 So.W.

Ojunaanüshi nutuma Jesús yaa mmapaʼamüin chi wüi nümaiwajachikai, chi Satanás münakai. Motsoʼoinjatü neʼe nümaa saaʼu tü mmakat (Apocalipsis 12:7-9, 12).

Tü alateetkat mapeena

Asürünnüshi Satanás nutuma Jesús soʼu miit juya otta najaʼttireechi nia süchikijee tia. Meerü nuchuwerajaakai saaʼin nikii Satanás. Ekeraajeerü tü nüchekakat Jehová süpüleerua wayuu jee süpüleerua tü mmapaʼakat. Kojuteechi Maleiwa, nnojoleerü mojuin pütchi nüchiki jee atüjaaneerü aaʼu niain anain süpüla aluwatawaa (Apocalipsis 20:1-3, 10; 21:3, 4).