¿Pücheküin kooʼomüin tü pütüjaakalü aaʼu süchiki tü sümakat tü Wiwüliakat? ¿Pütüjawee aaʼu jamaluʼuluin wanee wersiikulo? ¿Pütüjawee aaʼu süchiki nukuwaʼipa wanee wayuu saashajaakai achiki tü Wiwüliakat, wanee mma jee shiale wanee kasa alataka saashin tü Wiwüliakat? ¿Jülüjüirü paaʼin eein süpüla sükaaliinjüin pia tü Wiwüliakat sünain tü alatakat pümüin? Pücheküle tia, eeshi süpüla pikirajaain suluʼu tü biblioteca suluʼukat tü Piichi Outkajaaleekat.

Wainma kasa suluʼuka wanee biblioteca. Eesü nnojorüle pümaʼanain suluʼu pünüiki süpüshuaʼa tü karaloukta nayuʼlakat na aküjüliikana pütchi; akatsaʼa puusüteerüin anain karaloukta jekennuu suluʼu tü biblioteca suluʼukat tü Piichi Outkajaaleekat: eewaisü waneeirua Wiwülia, diccionario jee waneeirua karaloukta anaka süpüla ekirajaanaa anain. Eesü süpüla paashajeʼerüin shia süpülapünaa jee süchikijee tü outkajawaakat. Eesü tü computador eʼitaanakalü aluʼu tü Watchtower Library münakat, wainma karaloukta suluʼu jee mapüleesat achajawaa wanee pütchi wekirajaweekalü anain suluʼu.

Sükaaliinjeena na ekirajaakana sünain Ekirajawaa süpüla Aküjaa Pütchi. Püshajirüle pünülia süpüla pikirajüin sünain tü outkajawaakat Ekirajawaa süpüla Aküjaa Pütchi, eesü süpüla püchajaain suluʼu tü bibliotecakat tü pikirajüinjatkalü anain. Nia jülüjüinjachika aaʼin tü bibliotecakat chi shikiipüʼükai Ekirajawaa süpüla Aküjaa Pütchi, niʼitaainjatü tü karaloukta jeketkalü ojuʼitüin jee jülüjüinjatü naaʼin suulia walakatüin shia. Nieechi akaaliinjaka pia süpüla püntüin sünain tü pütchi pütüjaweekalü aaʼu jee eeshi nieechire chi ekirajakai pia. Nnojotsü süpüla pülüʼüjüin tü karalouktakat; piisalajüinjatü jee nnojotsü pejeerajüinjatüin shia.

Süpüla watüjaain saaʼu tü sümakat tü Wiwüliakat nüchiki Maleiwa, wachajaainjatü shia maʼaka wachajaale wanee korolo kojutsü eekai sunjuluushin (Proverbios 2:1-5). Wousüteerü anain tia suluʼu tü biblioteca suluʼukat tü Piichi Outkajaaleekat.

• ¿Kasa wousüteetka anain suluʼu tü biblioteca suluʼukat tü Piichi Outkajaaleekat?

• ¿Jara akaaliinjeechika pia süpüla püntüin sünain tü pütchi pütüjaweekalü aaʼu?