Aijiraashii maʼin na aküjaliikana pütchi nüchiki Jehová sainküin mmakat süpüshuaʼa (1 Pedro 2:17). Woʼutku wayakana eesü müle waaʼin saaʼin tü wawalakat Tannis, kepiasü shia chaa Keenia. Müsü sünüiki: «Anasü maʼin taaʼin tatüjaale saaʼu nachiki na wawalayuukana sainküin mmakat süpüshuaʼa». ¿Jamüsü süpüla natüjaain saaʼu na aküjaliikana pütchi nüchiki Jehová tü alatakat namüin na wawalayuukana sainküin mma? Soʼujee tü juyakat 2013 ashajünüsü suluʼu jw.org süchiki tü alatakat namüin na wawalayuukana.

 Suluʼu jw.org eere «Süchiki tü alatakat» sümüin, aküjünüsü süchiki tü naaʼinrakat na aküjaliikana pütchi nüchiki Jehová, maʼaka saaʼin sukumajünüle karaloʼuta, nakaalinjain sülatalaʼa sümüle wanee kasa, sukumajünüle piichi süpüla aʼwaajaa Maleiwa jee süchiki waneirua kasa naaʼinrakat. Aküjünüsü yala nachiki na wawalayuu püreesakana saaʼu nanoula otta süchiki tü kasa anasü alatakat namüin na wawalayuukana sünain aküjaa pütchi otta sünain ounejawaa wayuu sünain Tü Outkajawaakat eere Sotuin Waaʼin Outuin Jesús. ¿Jara jülüjaka aaʼin sukuwaʼipa tü eʼitaanakat suluʼu jw.org süchiki tü alatakat?

 Na wawalayuu aʼyataakana suluʼu Oficina de Información Pública naya jülüjaka aaʼin tü eʼitaanakat suluʼu jw,org süchiki tü alatakat namüin na wawalayuukana. Aʼyataashii naya eere sukumajünüin tü waʼyataainkat, jülüjasü naaʼin tü namakat na wawalayuukana aʼyataakana suluʼu Comité de Coordinadores, alatüshii suulia 100 wawalayuu aʼyataakana eere kepiain naya. Naʼakajee na wawalayuukana eeshii na ashajakana karaloʼuta investigadores, na akumajakana dibujo, na ashajakana pütchi suluʼu naata anüikii, eeshii na aashajaakana namaa na aʼyataakana namüin na sülaülashiikana mma, namaa na atüjakana maʼin otta na periodistakana. Alatüsü suulia 80 Weteet sainküin mmakat eere nakaaliinjünüin na wawalayuu suluʼukana Oficina de Información Pública, natuma na wawalayuu aʼyataakana suluʼu Sección de Información Pública.

 Süpüla shiʼitaanüin wanee notiisia jeketü suluʼu jw.org na wawalayuu aʼyataakana suluʼu Oficina de Información Pública, aʼyataajiraashii namaa na suluʼukana Sección de Información Pública. Nayaawatüle saaʼu anale naküjain süchiki wanee kasa alatakat namaa wawalayuukana, nachajaain maʼin sukuwaʼipa süpüla natüjaain saaʼu shiimainre tü alatakat otta nasakirüin na atüjakana süpüleerua tia. Natüjaapa saaʼu tia, nashajüin, nakumajüin, nanouteʼerüin, eʼitaanüsü ayaakua sünain otta aluwataanüsü shia namüin na wawalayuu aʼyataakana suluʼu Comité de Coordinadores süpüla naküjain anale shia süpüla shiʼitaanüin suluʼu jw.org.

 ¿Jamüsü naaʼin na wawalayuukana sutuma tü notiisia eʼitaanakat suluʼu jw.org? Anuu tü sümakat wanee wawala kepiakat chaa Filipinas, Cheryl sünülia, müsü shia: «Kamalainsü maʼin tamüin taashajeʼerawalin soʼukaiwai süchiki tü alatakat namüin na wawalayuukana otta süchiki tü Nupueulosekat Jehová».

 Noʼutku na wayuu aashajeʼerakana tü suluʼukat jw.org, nayaawatüin saaʼu naatain suulia tü nashajakat na periodistakana. Tatiana, kepiaka chaa Kazajistán, müsü shia: «Tatüjaa aaʼu shiimain tü notiisia eeka suluʼu jw.org». Anuu sünüiki wanee wawala kepiakat chaa México, Alma sünülia, müsü shia: «Sütütüleʼerüin maʼin taaʼin tü eʼitaanakat suluʼu jw.org suulialeʼeya tü naküjakat na periodistakana süchiki wanee kasa».

 Wainma wawalayuu akooʼomüinraka nanoula sutuma tü eʼitaanakat suluʼu JW Notiisia. Wanee wawala kepiaka chaa Kenia, Bernard nünülia, müshi nia: «Sutuma tü notiisia taashajeʼerakat suluʼu jw.org müshi taashajeʼeraka nachiki na tapüshikana, müsüjeseʼe eein süpüla tachuntüin nanülia jee tü kasa alatakat namüin toʼuraajapa nümüin Jehová». Wanee wawala kepiaka chaa Kenia, Bybron sünülia, müsü shia: «Talatüsü maʼin taaʼin taashajeʼerüle suluʼu jw.org, süshajünüin tü Bibliakat suluʼu waneirua anüikii naata. Sutuma tia, sotusü taaʼin nnojoluin koʼuin nukuwaʼipa Jehová».

 Akatchinraasü wanoula waapapa nachiki na wawalayuuka apüleeruaanaka aaʼin. «Akatsüinraasü maʼin tanoula sutuma jülüjain taaʼin yalayalain maʼin naaʼin na wawalayuukana, jülüjasü taaʼin tü kasa akaalinjaka na wawalayuukana süpüla katsüinjatüin nanoula, shia noʼuraajüin, naashajeʼerüin tü Bibliakat otta neeʼirajüin jayeechi nümüin Jehová», müsü sünüiki Jackline, kepiaka chaa Kenia.

 Wanee wawala kepiaka chaa Costa Rica kanüliakat Beatriz, atütülaasü saaʼin saashajeʼerapa süchiki tü saaʼinrakat nupueulose Jehová, süsetüle wüin otta sukutkujaale maa, müsü shia: «Sutuma tü notiisia eʼitaanakat suluʼu jw.org, teʼrüin anain maʼin tü saaʼinrakat tü nupueulosekat Jehová, süka aijiraain maʼin na wawalayuukana jee nakaalinjamaatüin na wawalayuu müliakana, sutuma tia, tayaawatüin saaʼu anain maʼin tü nupueulosekat Jehová».

 Anashaatasü maʼin süka watüjaain saaʼu tü alatakat namüin na wawalayuukana sainküin mmakat süpüshuaʼa. Wountuin waaʼinrüin tia süka tü nneerü jüsülajakat süpüla aküjaa pütchi sainküin mmakat süpüshuaʼa. Asülajünawaisü shia suluʼupünaa donate.mt1130.com. Waapüin analuʼutkat jümüin süka jüsülajüliin maʼin.