¿Jamüsü wanoujainjatka sünain shikeraajeerüin tü nümakat Maleiwa? Nunouja anainrü Jesuu tia otta nükatsüinrüin nanoula na aapajakana nünüiki süpüla neʼitaain naaʼin sünain nikeraajeerüin Maleiwa tü nümakat. Anuujeseʼe wanee shiyaawase nutuma Jesuu wanaa sümaa nikirajüin wainma wayuu saaʼu wanee namüna, müshi nia: «Eesüjaʼa shiale ajaʼlajaain palajana tü kasairua chakat iipünaa jee yaa mmapaʼa suulialeʼeya nnojoluin shikeraajüin wanee leetüra joʼuuchon jee wanee ejeettuushi suluʼuka tü Pütchi aapünakat nümüin Moisés» (Mateo 5:18, TNM).

Saʼakajee tü leetüra ashajünakalü aka tü pütchikat hebreo, shia joʼuuchonkat tüü: י (yod). Shia tü palajatkat leetüra ashajünaka aka nünülia chi Maleiwakai, Jeʼwaa. * Tetragrámaton münüsü tia. Jülüjasü maʼin naaʼin na karaloʼutamaajanakana jee na fariseokana süpüshuaʼa tü ashajünakat sünain tü Pütchi aapünakat nümüin Moisés, jaʼitairü pütchin shia, wanee leetüra jee «wanee ejeettuushi».

Naashin Jesuu, eesü süpüla sajaʼttüin tü kasairua chakat iipünaa jee tü yaakat Mmapaʼa, ekeraajeetpejeʼe waneepia süpüshuaʼa tü Pütchi aapünakat nümüin Moisés. Nnojotpejeʼe ajaʼttajatüin tü Mmakat jee tü kasairua chakat iipünaa saashin tü Wiwüliakat (Salmo 78:69). Sükajee tü nümakat Jesuu, niiʼiyatüin sünain nnojoleerüin kasain apütaain sümaa mekeraajüin suluʼujee tü Pütchi aapünakat nümüin Moisés.

¿Jülüjasüche naaʼin Jeʼwaa kasa süpüshuaʼa jaʼitairü müin malaachonkai saaʼin? Jamüsaʼa shia. Jülüjataa paaʼin tüü: Aküjünüsü namüin na israeliitakana nnojoluinjatüin nashateʼerüin niipüse chi anneerü noʼutuinjachikai aaʼin sünain tü Pascuakat (Éxodo 12:46). Müsü malaachonkai saaʼin tia. Eesüjaʼa nnojorüle natüjaain saaʼu na israeliitakana jamüin nnojoluinjatka nashateʼerüin niipüse chi anneetkai. Nütüjaapejeʼe saaʼu Jeʼwaa shiyaawasein tia tü alatajatkat nümüin chi Mesíaskai: nnojoluinjatü ashateʼennüin niipüse nükachennapa sünain tü wunuʼukot süpüla nuʼutunüin aaʼin (Salmo 34:20; Juan 19:31-33, 36, TNM).

¿Kasa watüjaka sünainjee tü nümakat Jesuu? Shia weʼitaainjatüin waaʼin sünain shikeraajeerüin süpüshuaʼa tü nümakat Jeʼwaa, jaʼitairü müin malaachonkai saaʼin. Sutuma tü leetüra joʼuuchonkat saʼakajee tü pütchikat hebreo, watüjaa aaʼu shikeraajeerüin tü nümakat Jeʼwaa.