Sümaʼanasü Hulda tü keeʼireekat saaʼin
SOʼU tü apünüin juya alatüitpakat eejana apünüinshii wawalayuu jieyuu chajanakana sotpaʼa tü palaa kanüliakat Sangir Besar (Indonesia). Müleka puwaraijaatüjüire chamüin wanaajiraashiijeʼe naya pümaa. Eʼraajünüshii maʼin naya sutuma nekirajüin wayuu sünain tü Bibliakat. Naatapejeʼe tü naaʼinrakat sotpaʼa tü palaakat, ¿kasa naainjaka yala?
Isla de Sangir Besar (palaajeeruʼusü sünain Indonesia).
Emetüshii naya shirokumüin tü palaakat süpüla nachajaain süchiki ipa miyoʼuyuu, müsü aka saaʼin sajaʼapüin wanee balón tia jee nalüʼüjüin shia sotpaʼamüin tü palaakat. Aikalaashii naya sümaa nasoʼlojuin tü ipakat süka wanee mattiia, nanoutachon shia süpüla joʼuuchoinjatüin shia suulia wanee sushuku kaliina. Neʼitaa namüsia shia suluʼu wanee waatte, nalüʼüjüin shia nepialuʼumüin otta oʼotooshii naya saaʼupünaa kaleera süpüla nantüin nepialuʼumüin. Nanaajaain tü ipakalüirua suluʼu toleeka, anta müsüjaʼa wanee kemion süpüla süsaajüinjatüin shia. Ipakat tia süpülajatü sukumajünüin karateet süka.
Hulda sünain akotchojoo ipa sotpaʼa tü palaakat.
Hulda sünülia noʼutku na wawalayuu aʼyataakana süka ipa. Aʼyataasü shia waneepia sotpaʼa tü palaakat noulia na waneinnua. Tü sükanainkat sünain tia aʼyatawaakat, süpülajatü saapüin tü kasa choʼujaakat sümüin süpüshi. Saapaweepejeʼe süpüshi tü sükanainkat süpüla shiyaʼlajüin wanee tableta. Sümaʼanale tia, eesü süpüla shikirajaain sükajee JW Library®. Sütüjaa aaʼu Hulda jalouijeerüin sümüin tü video otta tü pütchi eʼitaanakat suluʼu JW Library süpüla sütüjain aküjaa pütchi otta süpüla shiyaawatüin saaʼu tü sümakat tü Bibliakat.
Aʼyataasü Hulda piama oora wattaʼa maalü waneepia. Saaʼinrüin tia soʼu wanee kashi shiatapünaa. Sükajee tü ipa süsoʼlojokot, wotusü wanee kemion sutuma. Shiyaʼlajüinjeseʼe wanee tableta sükajee tü sükanainkat.
Sajapuluʼusü Hulda tü tabletakat.
Müsü Hulda: «Mapüsawaisü taya jee aijawaisü taya sutuma tasoʼlojuin tü ipakalüirua. Motopejeʼe taaʼin tü tamüliala teʼrakat sünain tia aʼyatawaakat tamaʼanapa tü tabletakat. Ekirajaasü taya sükajee tü tabletakat süpüla tatüjain maʼin aküjaa pütchi otta mapüleesat tamüin tekirajaain süpüla tü outkajawaakat». Süküjain Hulda jaloulin sümüin tü tabletakat soʼunnaa tü ayuuliikat COVID-19, shiʼrajüin tü outkajawaakat suluʼupünaa. Talatüsü maʼin waaʼin sümaa Hulda sutuma eeitpain sümaʼana tü keeʼireekat saaʼin.
