Nnojoishi aainjirüin niyaakua Jesuu. Wainmapejeʼe maʼin niyaakuayaa atumawaa maaʼulu otta eesü eekai kakaliairüin aainjünüin.

Nnojotsü natüjaain saaʼu na akumajakana tia ayaakuaakat jetchin maʼin Jesuu. Tü niyaakuayaakat natuma oʼunüsü süchiirua tü nakuwaʼipakat, tü nanoujakalü anain jee shiale tü nuchuntakat chi akumajirakai shia. Sutuma tia, naata neʼe tü jülüjakat saaʼin wayuu nüchiki Jesuu otta süchiki tü nikirajakalü anain.

Eeshii na akumajakana niyaakuayaa Jesuu sümaa aürülüin nia, kaʼwaloulein, palitchoin nüliima otta mojuin maʼin naaʼin. Shiasaʼa sünain waneirua ayaakuaa, müshi aka naaʼin wanee aapiee, eesü wanee kasa jorottusü nüraloʼu jee müshi nnojoikai süpüla nürütkaanüin anainmüin. ¿Shiimainche mapuʼuin nia? ¿Jamüsü süpüla pütüjaain saaʼu tü shiimainkat nüchiki? Anashi pikirajaale sünain tü wetsiikulo aashajaakat nüchiki. Pansaajeetka tü jülüjakat paaʼin süchiki niyolojo, nütapaʼa, nuʼupünaa otta tü nukuwaʼipakat Jesuu.

Nünüiki Jesuu tia sünain oʼuraajaa nümüin Maleiwa, eesü shiale soʼu woutiisain nia (Hebreokana 10:5, TNM; Mateo 3:13-17). ¿Jamapuʼusüche tü nütapaʼakat Jesuu? Maʼaka 30 juya süpülapünaa tia, aashajaashi chi aapieekai Gabriel sümaa María, müshi nia sümüin: «Ipooleerü joo pia. Jemeyuleerü pia nümaa wane joʼuu toolo [...]. ‹Pia Tachon Maainjalasaikai›, süpüla nümünüinjachin chi joʼuukai nütüma Maleiwa» (Lucas 1:31, 35). Anakajasaʼa maʼin nütapaʼa sümaa niyolojo Jesuu. Lotusü nukuwaʼipa maʼaka naaʼin Adán nukumajaiwaʼaya nia Maleiwa (Lucas 3:38; 1 Corinto 15:45). Eeshijaʼa süpüla meematüin nia aka saaʼin María tü niikat, judía shia.

Kaliimapuʼushi Jesuu maʼaka naaʼin na wanee judíokana, naya maliimapuʼukana na romaanokana. Shiapuʼusu nojutka na tooloyuukana tü naliimakat, müsüjeseʼe wulein sümaa aüjüüshin shia natuma. Mapuʼusü nutuma Jesuu. Jee wulesü nuʼwala otta epeinajuushisü nutuma. Naya nnojoliipuʼukana aüjüin naʼwala na nazareokana maʼaka naaʼin Sansón (Números 6:5; Jueces 13:5).

Eeshijaʼa laütale Jesuu sümaa katsüin maʼin nia, malaaka joo kakaliain niʼyataain sünain akumajaa kasairua süka taapüla otta nnojotpuʼusü eein nümaʼana tü aʼyataaya eekat maaʼulu (Marcos 6:3). Jekechiiwaʼaya nia sünain tü aküjaakat Nünüiki Maleiwa, niipiijüin napüshuaʼa na oikaliikana suluʼu tü aʼwaajüleekat Maleiwa «ooʼulaka tü mürütkalüirua, paaʼa je anneerü, suluʼujee süpaatiase tü aʼwaajüleekat. Nuʼwalakajakalaka nanneetse na aʼwanajüliikana neerü sümaa nujunaain tü nemeesainkat» (Juan 2:14-17). Nnojotsü saainjain tia wayuu eekai matsüin. Sutuma anain maʼin Jesuu otta anain tü nütapaʼakat nutuma Maleiwa, naaʼinrüin tü ajütünakat apüla nia yaa Mmapaʼamüin, müshi nia: «Acheküshi taküjüinjachin tü pütchi anasükat suluʼupünaa tü pueulokat süpüshua, süchiki nukuaippa Maleiwa sünain aluwatawaa, süka shiain ajütünüin apüla taya» (Lucas 4:43). Nnojotsüje naaʼinrüin tia matsüinre nia, süka jamüin, waraitüinjachin nia suluʼupünaa süpüshuaʼa tü mmakat Palestina sünain aküjaa Nünüiki Maleiwa.

Sutuma anamiain maʼin otta kamaneein Jesuu, anasü naaʼin na shapaakana aaʼin otta na mapüsakana  soʼu naapüin pütchikat tüü (Mateo 11:28-30). Saaʼu müin nukuwaʼipa Jesuu, natüjaa aaʼu na aapajakana nünüiki shiimain naapüinjatüin eemerawaa namüin na ekirajaweekana nüchiki. Jaʼitakajeʼe na tepichikana, anasü naaʼin nümaa Jesuu, anuujeseʼe sünüiki tü Wiwüliakat: «Naapaakalaka na tepichikana nütünaluʼumüin» (Marcos 10:13-16).

Mayaapejeʼe müliain maʼin Jesuu sümaa shapaain naaʼin süpülapünaa outuin nia, nnojoipuʼushi maajüin nia süpülapünaa tia. Jamüshijaʼa nia, chajachi Caná sünain wanee miʼiraa shikiirajatü kasaalüü, wiinojaasü wüin nutuma süpüla ayatüinjanain talatüin aaʼin na chajanakana sünain tia (Juan 2:1-11). Sünain waneirua ekawaa ounejaanaka anain nia, nikirajüin na eejanakana (Mateo 9:9-13; Juan 12:1-8).

Talatüsü maʼin naaʼin na aapajakana nünüiki Jesuu süka nüküjain namüin eein süpüla katüin noʼu waneepia (Juan 11:25, 26, TNM; 17:3). Soʼu naleʼejüin na 70 nikirajüinkana Jesuu süchikijee aküjaa pütchi, talatüsü maʼin naaʼin Jesuu sutuma tü naküjakat nümüin. «Talata jia saaʼu ayateenain jia nümaa Maleiwa süpüla kaʼikat süpüshua», müshi nia (Lucas 10:20, 21).

Nachajaain maʼin sukuwaʼipa na fariseokana süpüla kapülain naya saaʼin wayuu otta süpüla sütüjaanüin aaʼu laülaashin naya atumawaa chaa Israel (Números 15:38-40; Mateo 23:5-7). Nüküjapejeʼe Jesuu namüin na nikirajüinkana nnojoluinjanain laülaain naya saaʼu wayuu (Lucas 22:25, 26). Anuu sooʼomüin nünüiki namüin: «Jalia jia suulia ashataa nakuaippa na karalouktamaajanakana waraitteekana maʼi aaʼin chaʼaya metkaaraluʼupünaa sünain kasheʼiin naya kuluulu anasü shiiʼiree nasaküneein sütüma wayuu» (Marcos 12:38).

Nnojotpejeʼe müin nukuwaʼipa Jesuu, saʼakapuʼushi nia wayuu otta eeshi nnojoire jaralüin ayaawatüin nia (Juan 7:10, 11). Eetaayaai niyaawatünüin aaʼu naʼaka na 11 nikirajüin. Müshijeseʼe nutuʼlüin nia Judas nuwalapaʼa süpüla nütüjaanüin aaʼu sutuma tü wattakat saalii wayuu achajaaka nüchiki (Marcos 14:44, 45).

Wainma kasa nnojotka watüjaain aaʼu nüchiki Jesuu, watüjaapejeʼe saaʼu nnojoluin müin nia maʼaka saaʼin tü niyaakuayaakalü atumawaa. Nnojotsü choʼujaain maʼin watüjaain saaʼu jamapuʼuin maʼin niyolojo, nütapaʼa otta nuʼupünaa Jesuu, shia choʼujaaka watüjaain saaʼu tü nukuwaʼipakat maaʼulu.

Nünüiki Jesuu tia wanee ai süpülapünaa nuʼutunüin aaʼin (Juan 14:19). Aapajiraashi nia nikii «süpüla taashinjatüin wayuu wainma suulia saainjala» (Mateo 20:28). Apünüin kaʼi süchikijee tia, nüsoʼireʼerüin Maleiwa naaʼin sünain meʼrujuin nia otta «niiʼiyateʼerüin nia» namüin noʼutku na nikirajüinkana (1 Pedro 3:18; Aluwataaushikana [Hechos] 10:40). Naatajatshaana nuʼupünaa otta niyolojo Jesuu soʼu tia, müshijeseʼe nnojoluin nayaawatamaatüin nia naʼaleewainyuu. Wayuuyaa aʼyataai neʼe suluʼu tü apainkat saaʼinruʼu María Magdalena. Otta naaʼinruʼu na piamashiikana nikirajüin chaʼwaliikana Emaús, niaya wanee wayuu suluʼujeejachi mma naatajatü (Lucas 24:13-18, TNM; Juan 20:1, 14, 15).

¿Jamüsüche niyolojo otta nütapaʼa Jesuu maaʼulu? Sülatapa suulia 60 juya süchikijee nüsoʼiraain aaʼin Jesuu, kojuyatua niʼrüin nia chi aluwataaushikai Juan. Nnojoishi niʼrüin nia kentüin naaʼin sünain wane kuruusa, niʼrüin wanee Aluwataai Pülashi maʼin ajaʼlajeʼerüinjachikai napüshuaʼa na nüʼünüükana Maleiwa maʼaka saaʼin tü yolujaakalüirua otta na mojulaakana. Niainjachi anaka atuma sukuwaʼipa wayuu yaa Mmapaʼa süpüla kaʼika süpüshuaʼa (Alateetkat Mapeena [Apocalipsis] 19:16; 21:3, 4).