Tü palajatkat oora süchikijee jemelin wanee joʼuu sünainpünaasü tü nukuwaʼipainjatkat. Jamüsüjaʼa talatüle jee mojule saaʼin tü niikat nümaa chi joʼuukai, oʼuneerü nukuwaʼipa süchiirua tia. *

¿Jamüshi aika maʼin süpüla süchon wanee wayuu? Saashin Jeannette Crenshaw, süchikijee jemeyuluin wanee wayuu shiyuujachoin chi süchonkai, shiirakaa amüinchi, sutujeʼerüin nia otta aʼireeshia maʼin süpüla. Tia, shia sutuma wanee hormona oxitocina sünülia. Eesü waneʼeya hormona aijiraaka maʼin anainjee wanee wayuu nümaa süchon otta nnojotka jaʼleein atuma shia nuulia (The Journal of Perinatal Education). ¿Jamüsüche anaka maʼin tia?

Süka niain Jeʼwaa Kakumalain wayuu, niʼitaain shikii süpüla aijiraainjatüin maʼin wanee wayuu nümaa süchon. * Naapüin analuʼut chi aluwataaikai David nümüin Jeʼwaa saaʼu katüin noʼu nutuma jee anain naaʼin shiyuujapa nia nii. Niyaawata aaʼu David naaʼinmajünüin nutuma Jeʼwaa soʼujeʼereʼeya joʼuuin nia. Müshi nia nümüin: «Pia chi Tamaleiwasekai süleʼeruʼujee tei» (Salmo 22:9, 10).

JÜLÜJA PAAʼIN TÜÜ: Niʼitaale Maleiwa sukuwaʼipa süpüla aijiraainjatüin wanee wayuu nümaa süchon jee keeʼireeinjatüin saaʼin saaʼinmajüin nia, wayakajaʼa nnojoleematüin naaʼinmajüin, nüchonnii waya (Aluwataaushikana [Hechos] 17:29).

Niʼraajüin maʼin Jesuu nukuwaʼipa chi Kakumalakai kasa süpüshuaʼa, müshi nia: «¿Aashin suikünüin piamasü wüchii gorrión saaʼu wanee nneerü kachueerachen neʼe? Nütüjaapejeʼe saaʼu chi Jüshikai Maleiwa jamüle nakuwaʼipa. Akaʼaya neʼe jiakana, yaawasü tü juʼwalakat nutuma waneʼewai sukua. Nnojo shapaain jaaʼin alanaʼaleesia maʼin jujutü nümüin Maleiwa suulialeʼeya tü wüchiikalüirua süpüshuaʼa» (Mateo 10:29-31).

Wainma wayuu nnojotka kasajatüin amüin tü wüchiikalüirua, shialeekajaʼa suʼttüle mmoluʼumüin. Kojutpejeʼe nümüin Maleiwa tü wüchiikalüirua waneʼewai sukua. Shialeekajaʼa nnojoleematüin jülüjain naaʼin wayuu, jaʼitairü wainmain maʼin wüchii, nnojotsü alanaʼaleein sujutü nümüin Maleiwa suulialeʼeya nujutü wanee wayuu. Naaʼinmajüin pia Maleiwa otta kapülasü naaʼin pukuwaʼipa.

Tü sümakat tü Wiwüliakat:

• «Nünanajüin Jeʼwaa süpüshuaʼa tü mmakat süpüla nükaalinjain süka nütchin na oonookana sümaa nünüiki süka süpüshuaʼa naaʼin» (2 CRÓNICAS 16:9).

• «Naaʼinmajüin Jeʼwaa na lotokana akuwaʼipa jee naapajüin nanüiki süpüla nükaalinjain naya» (SALMO 34:15).

• «Talateerü maʼin taaʼin süka anamiain pia tamüin, süka piʼrüin tamüliala otta pütüjaain saaʼu tü shapaakalü atuma taaʼin» (SALMO 31:7).

Watüjaale saaʼu alin waya nüpüla Maleiwa jee naaʼinmajüin waya, eesüjaʼa suʼwanajaajeerüle wakuwaʼipa. Anuu tü sümakat Hannah, * chejeʼewat shia Inglaterra:

«Jülüjapuʼusü taaʼin nnojoluin alin taya nüpüla Maleiwa otta nnojoluin nusoutuin shiʼipajee tü tachuntakat nümüin süka müin matsüinkai tanoula. Niaya taaʼinruʼu Maleiwa müliaka atuma taya sümaa nnojoluin jülüjain taya naaʼin süka mojutuin taya. Müsü nnojotkai kasajatüin taya nümüin».

Aʼwanajaapejeʼe tü jülüjakat saaʼin Hannah. Maaʼulu yaa, sütüjaaitpa aaʼu alin shia nüpüla Jeʼwaa otta nücheküin süpüleerua anainjatüin sukuwaʼipa. ¿Kasa suʼwanajaaka atuma tü jülüjapuʼukat saaʼin? Müsü shia: «Nnojotsü aʼwanajaʼalaa müin neʼe tü jülüjakat taaʼin, kakalia paala taapüin wanee pütchi aashajaaka süchiki naapajiraain nikii Jesuu waaʼu, antüsü suluʼumüin taaʼin tia pütchikat otta tayaawataka saaʼu alin taya nüpüla Maleiwa. Shiasaʼa nusoutapa Maleiwa shiʼipajee tü tachuntakat nümüin, aʼyalajüsü taya süka tayaawatüitpain saaʼu alin taya nüpüla. Sükajee tekirajaain sünain tü Wiwüliakat otta toʼunawalüin sünain tü outkajawaakat, teʼraajüin nukuwaʼipa Jeʼwaa otta tayaawata aaʼu kapülain waya naaʼin. Shiimain alin waya nüpüla otta naaʼinmajeein waya».

Atütülaasü maʼin waaʼin sutuma tü sümakat Hannah. ¿Nütüjaa aaʼuche Maleiwa tü müliakalü atuma pia jee tü shapaakalü atuma paaʼin? Pütüjaajeerü aaʼu tia paashajeʼerüle tü wane pütchikat.