Müsü wamüin tü Wiwüliakat: «Yarüttüle naaʼin wane wayuu, kachiiruasü naaʼin waneepia kasa mojusü, maa aka oʼutaa saaʼin wayuu, maa aka amaʼüjawaa sümaa wayuu nnojotkat nuʼwayuusein otta nnojoikai suʼwayuusein, maa aka aʼluwajirawaa akuaippaa sümaa wayuu jierü otta wane jierü nümaa wane toolo, maa aka aʼluwajaa, maa aka aküjaa alawaa süchiki wane wayuu, je maa aka mojuu anüiki sümüin wayuu» (Mat. 15:19). Eeshii süpüla shimeejüin waya tü waaʼinkat süpüla anain saaʼin wamüin tü kasa mojukat nümüin Maleiwa. Eesü wayaawataleere saaʼu mojuin tü waainjakat süchikijee waainjüin shia. ¿Kasa waainjüinjatka süpüla wayaawatüin saaʼu tü suchuntaakat waaʼin süpülapünaa waainjüin wanee kasa mojusü?

Waashajeʼera weinshi tü Wiwüliakat sümaa nnojoluin motuin waaʼin tü sümakat.

Müshi Pablo süchiki tü Wiwüliakat: «Tü nünüikikat chi Maleiwakai, jaʼyasü maʼi wamüin süpüla watüjaainjatüin saaʼu müleka woonoole sümaa je moonooinre waya sümaa. Müleka kaainjarale waya, shiiʼiyatüin wamüin. Je sütüma, wayaawata aaʼut tü jülüjakat waaʼin» (Heb. 4:12). Wekirajaapa sünain tü Wiwüliakat, wayaawatüinjatü aaʼu tü keeʼireekat waaʼin otta tü waaʼinrajatkat. Waainjüle tia, watüjaajeerü aaʼu kasain suluʼuin waaʼin. Choʼujaasü maʼin waashajeʼerüin shia weinshi sümaa jülüjüin waaʼin tü sümakat. Waainjüle tia, pansaajeerü tü jülüjakat waaʼin sümaa tü jülüjakat naaʼin Jeʼwaa süchiki wanee kasa.

 Woonoole sümaa tü sümakat tü Wiwüliakat, watüjaajeerü aaʼu anale jee mojule tü waainjakat; nnojoleerü anain wamüin wanee kasa eekai mojuin (Roma 9:1). Wanta anain suluʼu tü Wiwüliakat nachikimaajatü na wayuu nnojoliinjanakana woʼunüin achiirua akuwaʼipa (1 Cor. 10:11). Wekirajaale nachiki, nnojoleena waya aainjüin kasa mojusü. Wainkeerü tia wapüshuaʼa.

Woʼuraaja nümüin Maleiwa.

Nünaʼlüin Jeʼwaa kasain suluʼuin waaʼin (1 Crón. 29:17). «Miyoʼu [...] Maleiwa suulia tü waaʼinkat otta niʼraajüin süpüshuaʼa tü kasakalüirua.» (1 Juan 3:20, NM.) Makalaka nnojolin süpüla wemeejüin nia. Waküjüle kasain shapaain atuma waaʼin otta kasain keeʼireein waaʼin, nükaaliinjeena waya süpüla wayaawatüin saaʼu tü suluʼukat waaʼin. Eesü süpüla wachuntüin nümüin Maleiwa wulein nutuma tü waaʼinkat (Sal. 51:10). Choʼujaasü maʼin woʼuraajüin nümüin Maleiwa, watüjaajeerü aaʼu jalamüin suʼunirüin waya tü waaʼinkat.

Eeja waaʼin sünain tü outkajawaakat.

Waainjüle tia, wayaawateerü aaʼu tü suluʼukat waaʼin. Mayaapejeʼe nnojoluin eiwaʼalüin waapajüin wanee pütchi sünain tü outkajawaakat, anasü eejüle waaʼin sünain. Süka jamüin, watüjaa aaʼu sünain tü outkajawaakat jamaluʼuluin tü sümakat tü Wiwüliakat otta wayaawata aaʼu kasain wanoukteʼerüinjatüin suluʼu wakuwaʼipa. Otta sükaaliinjüin waya nanüiki na wawalayuukana nayalerapa najapü sünain tü outkajawaakat (Prov. 27:17). Nnojoliire woutkajaain, shieerü waaʼinmaaka neʼe tü alatakat wamüin otta nnojoleerü anain watuma süneekia wanee kasa (Prov. 18:1). Makalaka anain jülüjüle waaʼin tüü: «¿Matüjüinsai makataa taya suulia tü outkajawaakat? ¿Eejüsü taaʼin sünain?» (Heb. 10:24, 25).

Wainma tü kasa sumojujeʼereetkalü atuma wakuwaʼipa tü waaʼinkat. Wekirajaa sünain pienchisü: kachiiruaa aaʼin washirüü, asawaa, na waʼaleewajaakana amaa otta tü waapajakat sümaa tü wanajakat.

Kachiiruaa aaʼin washirüü.

Nnojotsü mojuin aʼyatawaa süpüleerua tü kasa choʼujaakat wamüin. Shia mojuka aluʼu shiale maʼin palajanain watuma tia naashin Jesuu. Aashajaashi nia nüchiki wanee wayuu washirü epirajaakai süpülee nüpünajüin makalaka nnojoluin jalainjatüin niʼitaain süpüshi tü nüpünajüinkat. Nuwasajeʼeraka shia süpüla nukumajirüin wanee eekai miyoʼushaatain. Majiraashi chi wayuukai: «Tanaajaainjatü [...] süpüshua takorolo je tü tapünajüinkat yaa suluʼu. Je kettaapa tü miichikat, talateerü taaʼin sünain maa: ‹Watta saalin korolo tamaʼana jooluʼu, tü tepijaajeetkat atüma süpüla wainma juya. Anakaja jooluʼu teemeraale, sümaa tekaain, sümaa tasaain sümaa talataa aaʼin›». Eetaayaai süntapünaain suluʼu nikii chia wayuukai ouktüinjachin nia soʼuleʼeya aikat tia (Luc. 12:16-20).

Sutuma wataralaain, eesü shapaale waaʼin süka nnojoleerüin nneerü wamaʼana laülaapa waya. Makalaka wachajaain sukuwaʼipa süpüla waʼyataain maʼin sükalioʼu tü outkajawaakat. Otta eesü nnojorüle kachipünaain waaʼin tü waʼyataainkat suluʼu tü outkajaaleekat. Nnojotsü anain waainjüle tia. ¿Kaseerü naainjaka na jimaʼalii otta majayünnüü atüjaakana saaʼu anain maʼin aʼyatawaa waneepia nümüin  Maleiwa? ¿Nnojoleena pürekutsoolüin süka naʼyataweein palajana süpüla kanneetsee? Shia anaka aluʼu wachajaale sukuwaʼipa süpüla waʼyataain maʼin nümüin Maleiwa; watüjaa aaʼuche joo tü alatajateetkat wamüin.

Asawaa.

«Nnojo namaain pia na asüliikana», müsü Proverbios 23:20, NM. Chi eekai nüseein maʼin, eeshi süpüla nüsawalin pejeewa; nnojotsü süpülajatüin epeʼrüin nia naashin süpülajatü neʼe nüsamatüin naaʼin. Waainjüle tia, anasü jülüjüle waaʼin kasain suchuntaain waaʼin.

Na waʼaleewajaakana amaa.

Nanainpünaashii waya waneepia na manoujüinsaliikana, weʼrüin naya sünain koleejiaa, aʼyatawaa jee sünain aküjaa pütchi. Shia mojuka aluʼu wachajaale sukuwaʼipa süpüla kottiraain waya namaa otta waʼaleewajaain namaa. Müle shia, eesüjaʼa süpüla suwataain suluʼumüin waaʼin wayuuin anamia naya. Nnojotpejeʼe müin sünüiki tü Wiwüliakat wamüin, müsü shia: «Nnojo jimeejiraain jukuwaʼipa; amojujaajeerü jukuwaʼipa natuma na wayuu nnojoliikana anain süpüla jaʼaleewain» (1 Cor. 15:33, NM). Jaʼitairü wulein paala wanee wüin, yarütteerü shia süpalirajaanüle sümaa kasa eekai yarüttüin; müsia wanoula waʼaleewajaale namaa na wayuu nnojoliikana aʼyataain nümüin Maleiwa, eesü süpüla yarüttüin shia natuma. Woʼuna achiiruat mapa tü nachekakat, tü naʼanaayakat, tü nanüikipalakat otta tü nakuwaʼipakat.

Tü waapajakat otta tü wanajakat.

Wainma maaʼulu tü kasa akumajünakat süpüla waapajüinjatüin otta wanajüinjatüin wanee kasa. Nnojoishii waya yootuinjanain süchiki kasa eekai yarüttüin (Éf. 5:3, NM). ¿Kasa waainjüinjatka suchuntaale waaʼin aapajaa jee anajaa kasa eekai yarüttüin? Eeshii na jülüjakana aaʼin choʼujaain nashaittüin jee naainjüin wanee kasa süpüla neemeraain makalaka nnojoluin jaralüinjatüin aneeküin shia nooʼopünaa naashin. Shiimain tia, akatsaʼa nnojoluinjatüin weʼrayaain amüin tü nümakat Pablo süpüla nnojoluinjatüin weʼrüin otta waapajüin kasa yarüttüsü.

Mayaapejeʼe shimeejüin paala waya tü waaʼinkat otta waainjüin wanee kasa mojusü sutuma, nnojo wayüülajaain; kepisü tia (Éf. 4:22-24). Waashajaa nachiki piamashii wayuu alatakana amüin tia.

Shia suchuntaapuʼuka naaʼin Miguel * tü washirüükat. Müshi nia: «Tayakai sümaa taʼwayuuse otta chi tachonkai, kepiashii waya suluʼu wanee mma eere süchajaain maʼin wayuu wainmeein kasa sümaʼana otta nnojotsü kasain choʼujaweein sümüin. Aʼyataashi maʼin taya sümaa nnojolin toʼunüin süchiirua tü washirüükat taashin. Nnojoishi eemeraain wayuu suulia oʼunaa süchiirua tü washirüükat, müshi aka puʼunakai aaʼin suluʼu wanee wopu matüjüinka ajaʼttaa. Tachuntaka kaaliinwaa nümüin Jeʼwaa süpüla teeʼiratüin tü suchuntaakat taaʼin. Taküjüin nümüin taʼyataweein nümüin waneepia sümaa tapüshi. Tooʼulaaka suulia kachiiruain taaʼin washirüü otta takolojooka sümaa tapüshi eere choʼujaain aküjülii pütchi. Mapa pürekutsootshii waya, wayaawatüitpa aaʼu eein süpüla talatüin naaʼin wanee wayuu, jaʼitaichi nnojolin washirüin nia.»

Tü alatakat nümüin Leo shikirajüin waya sünain wayaawatüinjatüin saaʼu tü keeʼireekat waaʼin. Müshi nia: «Sünain tü taʼyataainkat antiraʼawalinjachi taya namaa na oikkaalii wattajeʼewaliikana. Mayaapejeʼe tatüjaain saaʼu amülaain maʼin yootshi suʼunnaa tia, kamalainsü maʼin tamüin oʼunaa sünain. Eeshi puluwatawaire taya namaa otta mojuwaisü taaʼin sutuma tia. Tayaawatüinjatü aaʼu kasain maʼin suchuntaain taaʼin. Naküjüin tamüin na laülaashiikana sükajee tü Wiwüliakat müin takuwaʼipa süka namaain taya na wayuu nnojoliikana alin apüla Jeʼwaa. Aluʼusaʼa jooluʼu, yootowaishi taya namaa suluʼupünaa teleepono, nnojoliichipa taya antiraʼawalin namaa.»

Nnojotsü wemeejiraainjatüin wakuwaʼipa süpüla wayaawatüin saaʼu tü suchuntaakat waaʼin. Wachunta kaaliinwaa nümüin Jeʼwaa süka nütüjaain saaʼu kasain suluʼuin waaʼin (Sal. 44:21). Otta eesü wamaʼana tü Wiwüliakat; müsü aka saaʼin wanee rouya süka shiiʼiyatüin wamüin tü kasa suluʼukat waaʼin (Sant. 1:22-25). Nüchiaain waya Jeʼwaa sünain tü outkajawaakat otta sükajee tü karaloukta suluʼujeejatkat tü Wiwüliakat. Naapüin Jeʼwaa wamüin tia süpüla waaʼinmajüin tü waaʼinkat otta süpüla talatüin naaʼin Jeʼwaa wamaa.