JÜLÜJATAA paaʼin eere wanee paʼaleewain kojutkai putuma, shiasaʼa müin naainjaka wanee kasa nnojotka piyaawatüin aaʼu. Eeshii na mojukana anüiki süchiki tü naainjakat otta nücheküin müliain wayuu saashin tü wayuukalüirua. ¿Kasaje paainjaka? ¿Punoujamaatüinje tü münakat nüchiki? ¿Paʼatapajataapa nüküjüin shia pümüin? ¿Jama nnojoire yalain nia süpüla nüküjüin pümüin tü naainjakat? ¿Paʼatapüinje nia?

Eesü süpüla müin pünüiki: «¿Teʼraajüinche maʼin chi taʼaleewainkai? ¿Kasache kojutka anainjee nia tatuma?». Shia anaka süpüla paainjüin tia. Otta waainjüinjatü tia süpülapünaa weʼitaain Maleiwa sünain niain kasirüin tü müliaakat.

Eesü kapüleere pümüin jamüin naainjaka Maleiwa waneeirua kasa. Wainma na aküjeenakana pümüin müliain wayuu nutuma Maleiwa otta eejeena na mojukana anüiki süchiki tü naainjakat. Naainjüin tia na wayuukana shiiʼiree mojuinjatüin pünüiki nüchiki Maleiwa. ¿Mojumaateerü pünüiki nüchiki Maleiwa? Tü paainjakat, oʼuneerü süchiirua piʼraajüle jee nnojoire maʼin piʼraajüin Maleiwa. Jülüja paaʼin tüü: «¿Niashi Maleiwa wanee taʼaleewain akaaliinjakai taya?».

Wainmale kasa mojusü alataka pümüin, eesü jülüjüle paaʼin nnojolin aleewain pia nümaa Maleiwa. ¿Niache kasitka Maleiwa tü kasa mojusü alatakat pümüin? ¿Niataapa aapüin pümüin wainma kasa anasü? Watüjaaitpa aaʼu niain Satanaa chi aluwataakai saaʼu tü manoujüinsatkalüirua (Juan 12:31). Makalaka jouluin maʼin tü müliaakat. Eeshiireʼe müliale waya sutuma nnojoluin lotuin wakuwaʼipa otta sutuma sülatalaa sümüin wanee kasa wamüin.

¿Kasa naainjaka wapüleerua Maleiwa? Saashin tü Wiwüliakat nia Kakumalaka tü sirumakat otta tü Mmakat (Aluwataaushikana 4:24). Otta süküjüin wamüin anain maʼin wakumajia nutuma Maleiwa (Salmo 139:14). Shiiʼiyatüin wamüin najapuluʼuin waya (Daniel 5:23). ¿Jamaluʼulu tia?

Katüsü woʼu nutuma (Aluwataaushikana 17:28). Nüsülajala wamüin Jeʼwaa süpüshuaʼa tü kasakalüirua maʼaka saaʼin tü kataakalü oʼuu, anachoin shiyolojo wanee kasa, alin wapüla wayuu, aleewain waya, jemetüin wamüin eküülü, wajuupajirain namaa na wayuu aikana wapüla, waapajüin muusika otta waatüin seejuu süsii wunuʼu (Santiago 1:17). Naapüle wamüin Maleiwa süpüshuaʼa tia, anashi waʼaleewainre nia sümaa alin nia wapüla otta wanoujüin tü nümakat wamüin.

Mayaainjeʼe müin wakuwaʼipa nutuma Maleiwa, eesü isale püchiki punoujüin nünain. Shiajaʼa eera sutuma nnojoluin piʼraajüin nia. Jee shiimainya tia. Nnojotsü süpüla waküjüin sünain pütchikat tüü jamüin alawaaka tü aküjünakat nüchiki Maleiwa sünain niain kasirüin tü müliaakat. Pikirajaa sünain tü Wiwüliakat süpüla piʼraajüin Maleiwa. * Paainjüle tia, pütüjaajeerü aaʼu tü shiimainkat nüchiki Maleiwa. Nnojotsü talatüin naaʼin Maleiwa sutuma müliain tü wayuukalüirua, nnojotsü nüsirüin tü müliaakat, aipürai nia (1 Juan 4:8).