Ekeraajüsü tü aküjünakat nüchiki chi Mesíaskai suluʼu tü karalouktakat Miqueas setesiento juya süchikijee süshajünüin. Joʼuushi Jesuu chi Mesíaskai chaa Belén. Apünüin shikii juya süchikijee, ekeraajüsü tü nümakat Daniel. Eeʼiyataashi chi Mesíaskai soʼu tü juyakat piama shikii mekietsalümüin soʼu wakalia. Woutiisashi nia otta naapüin Maleiwa nümüin chi naaʼinkai. Ekeraajüsü tü pütchi aküjünakat paala nüchiki.

Oʼttamaatüshi Jesuu sünain aküjaa «tü pütchi anasükat sümüin wayuu, süchiki nukuaippa Maleiwa sünain aluwatawaa» (Lucas 8:1). Wayuu anamia nia sümaa jülüjüin naaʼin nakuwaʼipa na wayuukana maʼaka süküjünüin paala. Nikirajüin wayuu sünain tü anakat süpüla naaʼinrüin otta süka eein Maleiwa nümaa, «anasü nütüma wainma wayuu eekai ayuulin sütüma ayuulii eekai eein neʼe» (Mateo 4:23). Na wayuu laülaayuukana, na jimaʼaliikana otta na tepichi oʼunakana nüchiirua Jesuu, müshii naya: «Wantüichipa anain chi Mesíaskai» (Juan 1:41).

Naashin Jesuu jouluinjatü kasachiki, akutkujaainjatü tü Mmakat otta alatajatü waneeirua kasa mojusü süpülapünaa nuluwataain saaʼu tü Mmakat. Makalaka nümüin: «Ee jumata jaaʼin tapüla» (Marcos 13:37).

Mayaapejeʼe maainjalain Jesuu, oonooshi nia waneepia nümaa Maleiwa. Akaisaʼa nuʼutünüin aaʼin natuma na nüʼünüükana. Sükajee ouktüin nia, eeitpa süpüla katüin soʼu wayuu waneepia suluʼu wanee mma anasü.

Ekeraajüsia tü aküjünatüjütkalia süchiki ouktajachin sümaa süsoʼiraainjatüin naaʼin Jesuu apünüin kaʼi süchikijee ouktüin nia. Süchikijee süsoʼiraain naaʼin, eeʼiyataashi nia namüin watta naalii nikirajüin, eejana maʼaka kiniento wayuu. Shiasaʼa süpülapünaa nuʼunüin sirumatuʼumüin, nuluwataain na nikirajüinkana sünain aküjaa pütchi nüchiki otta süchiki Nuluwataaya (Mateo 28:19). ¿Jalamüinshii naya aküjüin pütchi?

(Suluʼujeejatü Mateo, Marcos, Lucas, Juan otta 1 Corinto.)