PÜTCHI SÜNAINKA SÜTA TÜ REWIISÜTAKAT
¿Eeshiche süpüla aleewain pia nümaa Maleiwa?
«Naʼaleewainre pia Maleiwa, aneerü paaʼin otta aneerü pukuwaʼipa. Jülüjüshi pia naaʼin waneepia otta nücheküin anainjatüin pukuwaʼipa.» (CHRISTOPHER, WANEE JIMAʼAI CHEJEʼEWAI GHANA)
«Nütüjaa aaʼu Maleiwa wanaa sümaa mojuin paaʼin. Makalaka nümülialüin paaʼin sümaa naaʼinmajüin pia suʼunnaa tia.» (HANNAH, WANEE JINTUT 13 SUUYASE CHEJEʼEWAT ESTADOS UNIDOS)
«Talatüsü maʼin taaʼin süka naʼaleewain taya chi Maleiwakai. Kojutüsü maʼin tamüin tia.» (GINA, WANEE WAYUU 45 SUUYASE CHEJEʼEWAT JAMAICA)
Wainma na wayuu anakana akuwaʼipa nümaa Maleiwa maʼaka naaʼin Christopher, Hannah otta Gina. ¿Jama piakai? ¿Müsüche pukuwaʼipa nümaa Maleiwa? ¿Pütüjawee aaʼu kasainjatüin paainjüin süpüla naʼaleewainjachin pia Maleiwa? Eesü maa müle paaʼin püleʼeruʼu: «Nnojoishi süpüla naʼaleewainjachin taya chi Maleiwa Pülashikai maʼin süka wayuuin kaainjarai taya».
EESHII SÜPÜLA NAʼALEEWAIN WAYA MALEIWA
Eeshii süpüla waʼaleewain chi Maleiwakai saashin tü Wiwüliakat. «Chi taʼaleewainkai», müshi Maleiwa nümüin Abraham suluʼu Isaías 41:8. Anuusaʼa tü nüküjakat Maleiwa wamüin waneʼewaire wakua suluʼu Santiago 4:8: «Müleka jürütkaale nünainmüin Maleiwa, arütkaajeechi nia jünainmüin.» Saashin türa pütchikat, eeshii süpüla naʼaleewain waya Maleiwa. ¿Kasakaʼa joo waainjüinjatüin süpüla warütkaain nünainmüin Maleiwa sümaa nnojolin weʼrüin nia?
Jamüsüjaʼa nukuwaʼipa wanee wayuu aleewainjachire nia nümaa wanee yalejee, nüküjüin palajana kasaichin nünülia. Shiasaʼa mapa müleka yootule nia weinshi nümaa chia wayuukai, aleeweechi nia nümaa suluʼujee tia. Aleeweena maʼin naya müleka nakaaliinjiraale waneʼewai nakua. Müsia neʼe tü waainjüinjatkat süpüla naʼaleewainjanain waya Maleiwa. Anashii wekirajaale sooʼomüin süchiki tia.
