Eesüjaʼa püsakirüirüle paaʼin sünain tü pütchikalüirua. Watta naalii na wayuu atüjaweekana saaʼu tia. ¿Eesüche süpüla watüjaain saaʼu tia?

«Jamüsaʼa», watta naalii na makana anüiki. ¿Jarat aküjaka namüin tü nasakirakalü achiirua? Shia tü Wiwüliakat. ¿Pütüjawee aaʼu tü sümakat tü Wiwüliakat? Müle shia, eeshi süpüla nekirajüin pia na aküjüliikana pütchi nüchiki Jeʼwaa sünain tü Wiwüliakat. Nnojoleena achekajüin pümüin. *

Eeshii wayuu mmotkana seema ekirajawaa sünain tü Wiwüliakat, eeshii na nnojoliikana ekirajaweein sutuma kupaain naya naashin, sutuma matüjaajuuin aaʼu tü sümakat tü Wiwüliakat jee müsia sutuma wainmeerüin kasa apülajüneetka noulia naainjüle tia naashin. Wekirajaa sünain tü namakat waneeinnua wayuu ekirajaaka sünain tü Wiwüliakat:

• «Oʼunapuʼusü taya suluʼu tü iküleesia katoolikakat, namaa na wanjeelikakana, suluʼu tü iküleesia sij münakat, namaa na budistakana jee müsia ekirajaasü taya sünain Teología suluʼu wanee eʼikülee miyoʼu. Nnojotpejeʼe aküjünayaain tamüin tü tasakitkat maʼin achiirua. Shiasaʼa soʼu wanee kaʼi, antüsü wanee aküjüt pütchi tepialuʼumüin, süküjakalaka tamüin tü tasakitkalü anain sükajee tü Wiwüliakat. Ponusü maʼin taaʼin tia, müsüjeseʼe tekirajaain sünain tü Wiwüliakat sümaa.» (Gill, Inglaterra.)

• «Wainma tü kasa tatüjaweekalü aaʼu, nnojotpejeʼe müin pansaakai saaʼin tamüin tü nümakat tamüin chi pastootkai süchiki tü tasakitkalü anain nia. Shiasaʼa naashajaapa tamaa wanee aküjüi pütchi, nüküjüin tamüin sükajee tü Wiwüliakat tü tasakitkalü anain. ‹Aa›, tamaka nümüin süpüla nikirajüinjachin taya sünain tü Wiwüliakat.» (Koffi, Benín.)

• «Tatüjaweepuʼu aaʼulu kasain wayuu alataka namüin na ouktüshiikana. Mmotpuʼushi taya neema süka eein süpüla namaʼülapalain taya taaʼinruʼu. Jee müsia tatüjaweepuʼu aaʼu jamüin sünüiki tü Wiwüliakat nachiki na ouktüshiikana. Müshijeseʼe tekirajaain sünain tü Wiwüliakat nümaa wanee taʼaleewain aküjüikai pütchi.» (José, Brasil.)

• «Wanaa sümaa taashajeʼerüin tü Wiwüliakat, nnojotsü kasain tayaawatüin aaʼu. Shiasaʼa soʼu wanee kaʼi, antüshii na aküjüliikana pütchi nüchiki Jeʼwaa tepialuʼumüin jee nekirajaka taya sünain tü sümakat tü Wiwüliakat süchiki waneeirua kasa. Ponusü maʼin taaʼin tia.» (Dennize, México.)

• «‹Aisüche taya nüpüla chi Maleiwakai›, mapuʼusü taya suluʼu taaʼin. Süka tatüjaweein saaʼu tia, oʼuraajüsü taya jee tachuntaka kaaliinwaa nümüin Maleiwa. Shiasaʼa waneemüin kaʼi süchikijee tia, antapaatüshii waneeinnua aküjülii pütchi nüchiki Jeʼwaa tepialuʼumüin. Tekirajaaka sünain tü Wiwüliakat namaa.» (Anju, Nepal.)

Pansaasü maʼin tü namakat naya wayuukana sümaa tü nümakat Jesuu sünain maa: «Anataʼaleeshiijaʼa maʼi jia eʼrakana sünain cheʼojaain chi Maleiwakai jümüin» (Mateo 5:3). Müsüjeseʼe naapüin Maleiwa wamüin tü Wiwüliakat süpüla watüjaainjatüin saaʼu tü wakuwaʼipainjatkat jee talatüinjanain waya.

¿Jamüsü sukuwaʼipa shikirajia wayuu watuma sünain tü Wiwüliakat? ¿Kasa sükaaliinjeechi anain pia tia? Wekirajaa sünain tia.