«¿Akumajuushiiche neʼe waya süpüla washaittüinjanain, waʼyataainjanain, kaʼwayuusein waya, kachonniin waya jee laülaain waya?», eesüjaʼa müirüle pünüiki. (Job 14:1, 2). Saashin tü Wiwüliakat, jaʼitainna na wayuu kekiikana maʼin asakireʼetshii naaʼin sünain tia. (Paashajeʼera Eclesiastés 2:11.)

Süpüla watüjaainjatüin saaʼu kasapülajanain yaaka waya yaa mmapaʼa, wekirajaainjatü anain palajana jamakuwaʼipalüin süpüla katüinjatüin woʼu. Watta naalii wayuu ayaawatakana saaʼu kekiin maʼin Chi kakumalakai waya. Natüjaa aaʼu tia sutuma anain maʼin wakumajia jee sukumajia tü wekiisholoinkat. (Paashajeʼera Salmo 139:14.) Eesü tü nukumajakalü apüla waya Maleiwa. Watüjaapa saaʼu tia, talateena maʼin waya.

Wanaa sümaa nukumajüin Maleiwa chi palajaikai wayuu toolo jee tü palajatkat wayuu jierü, nukumajüin naya süpüla katüinjatüin noʼu süpüla kaʼikat süpüshuaʼa. Nukumajüin naya süpüla jouluinjanain na nooʼuliwoʼukana sainküin Mmakat, paʼaraiisüinjatüin shia natuma otta katüin noʼu süpüla kaʼikat süpüshuaʼa. (Paashajeʼera Génesis 1:28, 31.)

Eʼrüliijaashii wayumüin nümüin Maleiwa naya wayuukana. Nnojotpejeʼe nuʼwanajaain Maleiwa tü keeʼireekat naaʼin otta nnojoishii niyüülajüin waya. Saashin tü Wiwüliakat, niʼitaatüjülia Maleiwa sukuwaʼipa süpüla nuʼtteʼerüin na aʼyataashiikana nümüin jee müsia süpüla saainjünüinjatüin tü keeʼireekat naaʼin yaa Mmapaʼa. Keeʼireesüle naaʼin Maleiwa katüinjatüin poʼu waneepia sümaa talatüin paaʼin yaa saaʼu mmakat. (Paashajeʼera Salmo 37:29.) Süküjüin wamüin tü Wiwüliakat tü waaʼinrajatkat süpüla pansaainjatüin wakuwaʼipa sümaa tü keeʼireekat naaʼin Maleiwa.