Shia wanee aluwataaya nüikale’eraka Jehová. «Tü aluwataaya sirumatuʼujeʼewatkat» münüsü sutuma tü Bibliakat süka chain shia iipünaa (Marcos 1:14, 15; Mateo 4:17, TNM). Wainma tü kasa meemetakalü aaʼujee Nuluwataaya Maleiwa sümaa naluwataaya na wayuukana, shiapejeʼe anain maʼin nuluwataaya Maleiwa suulia suluwataaya wayuu.

•   Na aluwataainjanakana. Aneekünüshi Jesús nutuma Maleiwa süpüla Nuluwataain suluʼu nuluwataaya otta laülaashi nia nutuma saaʼu kasa süpüshuaʼa (Mateo 28:18). Süka pülain Jesús, naaʼinrüin tü kasa anasükat. Nia wanee aluwataai anakai süpüla weʼitaain waaʼin nünain otta amüliajüi wayuu nia (Mateo 4:23; Marcos 1:40, 41; 6:31-34; Lucas 7:11-17). Akaalinjünüshi Jesús nutuma Maleiwa süpüla nüneeküin waneinnua wayuu aluwataainjanakana nümaa saaʼu tü mmakat. Nüneeküin naya saʼakajee tü eʼirukuukat süpüshuaʼa (Alateetkat Mapeena [Apocalipsis] 5:9, 10).

•   Waneepiainjatü. Mamaʼasat naluwataaya na wayuukana, aluʼusaʼa Nuluwataaya Maleiwa, «shiainjatü eeka waneepia» (Daniel 2:44).

•   Na nuluwataainjanakana aaʼu. Nayeena nuluwataaka aaʼu Maleiwa na wayuu aaʼinrakana tü nüchekakat, jaʼitainna jalejeekualüin naya otta naatain nakuwaʼipa (Aluwataaushikana 10:34, 35).

•   Suluwataaka anain. Tü nuluwataayakat Maleiwa süchiaain na wayuukana suulia naaʼinrüin kasa mojusü otta sükaaliinjain naya süpüla wulein nakuwaʼipa. Müsü tü Bibliakat: «Maleiwa, chi Pümaleiwasekai, anashi aire püpüla waneepia süka süpüshua paaʼin. Anashi jülüjüle paaʼin Maleiwa waneepia. Alanaʼaleesia maʼi tüü saʼakajee süpüshua tü nuluwataakat anain jia Moisés. Je eesü waneʼeya alanaʼaleesia maʼi sünain anain, müsü mayaa: Anasü aire püpüla wayuu süpüshua maa aka alin pia püpülajiraa» (Mateo 22:37-39). Na suluʼuinjanakana Nuluwataaya Maleiwa, aishi Maleiwa napüla otta aisü wayuu napüla. Süka müin nakuwaʼipa, naaʼinrüin kasa anasü sümüin wayuu süpüshuaʼa.

•   Shikirajaka anain. Tü Nuluwataayakat Maleiwa nnojotsü neʼe süküjain wuleinjatüin nakuwaʼipa na wayuu suluʼuinjanakana, shikirajüin naya süpüla nountuin tia (Isaías 48:17,18).

•   Saaʼinrajatka. Tü Nuluwataayakat Maleiwa nnojotsü süpülajatüin washirüin na aluwataainjanakana suluʼu, süpülajatü nekeraajüin tü keeʼireekat naaʼin Maleiwa. Nekeraajeerü tü nümakat Maleiwa sünain katüinjatüin noʼu waneepia na wayuu aikana apüla Maleiwa (Isaías 35:1, 5, 6; Mateo 6:10; Alateetkat Mapeena 21:1-4).