Nuʼtteʼerüin Jesús napüshuaʼaya na wayuu waneepiakana nümaa Maleiwa wanaa sümaa naapajiraain nikii naaʼu (Mateo 20:28). Saashin tü Bibliakat nuʼtteʼerüin Jesús wayuu süpüshuaʼa (1 Juan 4:14). Anuu sooʼomüin tü sümakat tü Bibliakat: «Jee nnojoishi eein wanee wayuu yaa mmapaʼa aapünakai amüin laülawaa nutuma Maleiwa kanoulainjanaka anain waya süpüla woʼtteʼennajanain» (Aluwataaushikana [Hechos] 4:12).

 Outushi Jesús naaʼu napüshuaʼaya na kanoulakana nünain (Hebreokana 2:9; Juan 3:16). Asoʼireʼennüsü naaʼin Jesús nutuma Maleiwa naʼakajee na outushiikana süpüla nuʼunajachin iipünaamüin sümaa meʼrujuin nia (Aluwataaushikana 3:15). Jamüshijaʼa nia «asoukteechi waneepia nümüin chi Maleiwakai saaʼu tü wayuukolüirua arütkaakat nünainmüin Maleiwa [...] nuuntüin nuʼtteʼerüin tü wayuukolüirua süpüla katüinjatüin soʼuya süpüla kaʼikat süpüshua» (Hebreokana 7:25).

¿Jamüsü choʼujaaka naashajaainjachin Jesús wooʼopünaa nümüin Maleiwa?

 Joʼuujiraashii waya wapüshuaʼaya sümaa kaainjalaa (Roma 3:23). Outushii waya sutuma tü kaainjalakat otta nnojoishii waya anajiraain nümaa Maleiwa sutuma (Roma 6:23). Asoutushi Jesús naaʼu na wayuu kanoulakana sünain naapajiraain nikii naaʼu (1 Juan 2:1). Sükajee naapajiraain nikii Jesús waaʼu eeshi süpüla naashajaain nümaa Maleiwa wapüleerua süpüla naapüin wanüiki woʼuraajapa nümüin Maleiwa otta süpüla motuin naaʼin tü waainjalakat (Mateo 1:21; Roma 8:34). Asoutushi Maleiwa sümüin tü nuchuntakat Jesús süka pansaain nukuwaʼipa sümaa tü nüchekakat Maleiwa. Ajütünüshi Jesús nutuma Maleiwa chaa iipünaajee «süpüla suʼttaainjatüin wayuu nünainjee» (Juan 3:17).

¿Shiache neʼe choʼujaaka nunoujain wanee wayuu nünain Jesús süpüla katüinjatüin noʼu?

 Nnojo. Mayaasüjeʼe wanoujainjanain nünain Jesús süpüla woʼttaainjanain, eesiaʼaya wanee kasa waaʼinrajatka (Aluwataaushikana 16:30, 31). Müsü tü Bibliakat: «Maa aka wane ouktüsü, watüjaa aaʼulu sünain nnojolüin katüin soʼu süka nnojolüin sükutulaain sünain aaʼinraa wane kasa. Akaajaa chi wayuu nnojotkai kasain anain apüla tü nünoulakat nuʼupala Maleiwa, watüjaa aaʼulu sünain manoujain nia süka nnojolüin naaʼinrüin tü kasa anasü nüchekakat chi Maleiwakai nüpüleerua» (Santiago 2:26). Anuu tü watüjaainjatkalü aaʼu süpüla woʼtteʼennüin:

•   Neʼraajüinjachi Jesús otta Jehová (Juan 17:3).

•   Kanoulainjana waya nanain (Juan 12:44; 14:1).

•   Weeʼiyatüin kanoulain waya woonoole sümaa tü nümakat Maleiwa (Lucas 6:46; 1 Juan 2:17). Nüküjain Jesús nnojoleenain noʼttaain na «Señotkalee» makana nümüin. Aluʼujasaʼa naaʼinrüle tü nüchekakat chi Nüshikai (Mateo 7:21).

•   Ayatüinjana kanoulain waya jaʼitairü weʼrüin wamüliala. Anuu nünüiki Jesús: «Chi wayuu achechetkai naaʼin nieechi oʼttaaka sajaʼttapa tü kasa alatakat sainküin mma» (Mateo 24:13).