Umi testígo de Jehová ojapo peteĩ tembiapo iñimportantetereíva oipytyvõ hag̃ua la héntepe mas de 200 país ha territóriope. Péro umívagui 35-nte ikatu okuvripa umi gásto umi kontrivusión oñemeʼẽva rupive umi paíspe. Upéicharõ, ¿mbaʼépa ojejapo ojepagapa hag̃ua umi gásto orekóva umi país imboriahuvéva?

 Pe Kuérpo Governánte oanalisa mbaʼépa oikotevẽ umi testígo de Jehová ko múndo tuichakuére, ikatu hag̃uáicha oadora Jehovápe ha opredika umi notísia porã. Upéicha rupi, ojekalkula porã mbaʼéichapa ojepurúta umi kontrivusión. Peteĩ sukursál orresivíramo hetave pláta pe oikotevẽvagui okuvri hag̃ua umi gásto orekóva iterritóriope, pe hembýva oñemondo umi sukursál oikotevẽvape. Péicha ojejapóvo ojesegi hína umi kristiáno ypykue ehémplo, oñopytyvõmba vaʼekue ikatu hag̃uáicha ‘entéro oreko jojapa’ (2 Cor. 8:14). Haʼekuéra oipuru vaʼekue umi mbaʼe hembýva chupekuéra oipytyvõ hag̃ua umi kristiáno menove orekóvape.

 ¿Mbaʼéichapa oñeñandu umi ermáno orresivíva ajúda umi ótra sukursálgui? Por ehémplo, Tanzániape mas de la mita umi hénte oikóva upépe oreko ménos de 14.000 guarani okonsegi hag̃ua umi mbaʼe oikotevẽva káda diarã. Upépe ojepuru umi kontrivusión oñembopyahu hag̃ua pe Salón del Reino oipurúva kongregasión Mafinga. Umi ermáno upe kongregasionpegua heʼi: “Oñembopyahu rire pe Salón, hetaitereive hénte ou rreunionhápe. Roagradeseterei ningo Jehová organisasiónpe ha umi ermanokuéra oĩvape ko múndo tuichakuére ipojera haguére hikuái, pórke upéicha rupi koʼág̃a roreko peteĩ lugár iporãitereíva roadora hag̃ua Jehovápe”.

 Oĩ vaʼekue umi ermáno Sri Lankapegua ndorekovéimava kuri hoʼu vaʼerã pe pandémia COVID-19 káusare. Ermána Imara Fernando ha imembyʼi Enosh oĩ umíva apytépe. Péro umi kontrivusión oñemeʼẽva rupive umi ótro paíspe, ikatu kuri oñepytyvõ chupekuéra. Upéicha rupi, haʼekueraite voi oskrivi peteĩ tarhéta heʼihápe: “Roagradese ermanokuérape ohechauka haguére orerayhuha koʼã tiémpo ijetuʼuetévape. Rovyʼaiterei ningo roime haguére ko famíliape, ha rosegíta roñemboʼe Jehová oipytyvõ hag̃ua entéro ermánope koʼã ára pahápe”.

 Toiko oikohápe, umi ermáno ha ermanakuéra vyʼápe okomparti umi mbaʼe orekóva. Por ehémplo, Enosh ojapo peteĩ kahíta oñongatu hag̃ua pype ipláta ikatu hag̃uáicha haʼe avei omeʼẽ ikontrivusión oipytyvõ hag̃ua umi família oikotevẽvape. Ermána Guadalupe Álvarez ohechauka avei ipojeraha. Haʼe ningo oiko Méxicope, peteĩ lugár la hénte noganaihápe pe suéldo mínimo ni ndorekói hikuái peteĩ suéldo fího. Upéicharõ jepe, haʼe okontrivui pe ikatumíva. Haʼe oskrivi: “Aagradeseterei ningo Jehovápe imbaʼeporãiterei ha cherayhu haguére. Aikuaa pe che kontrivusionmi oimoirũtaha umi ótro kontrivusiónpe, ha ideprovechotaha oñepytyvõ hag̃ua umi ermáno oikotevẽvape”.

 Umi sukursál oenviáva pláta umi lugár oikotevẽvape ovyʼaiterei ikatu haguére ojapo upéva. Anthony Carvalho, oĩva pe komite de sukursál de Brasílpe, heʼi: “Heta áñore umi ótro país orepytyvõ vaʼekue ekonómikamente, upéicha rupi tuichaiterei okakuaa pe tembiapo ojejapóva koʼápe. Koʼág̃a okambiáma la ore situasión ha iporãvéma ore pórte. Upéicha rupi orehaitéma ikatu roipytyvõ ótrope. Umi ermáno Brasilpegua ohechakuaa pe predikasión ojejapoha ko múndo tuichakuére ha ikatuha oipytyvõ ojejapo hag̃ua ko tembiapo, ha péicha osegi hikuái Jesús disipulokuéra ehémplo”.

 ¿Mbaʼéichapa ikatu ñaipytyvõ porãve umi ñane ermáno ha ermanakuéra oikotevẽvape? Ñaenvia rangue pláta umi sukursál oñatendévape koʼã ermánore, iporãvéta ñameʼẽramo ñane kontrivusión pe óvra mundiálpe. Upearã ikatu ñamoĩ ñane kontrivusión pe káha oĩvape Salónpe hérava “Óvra mundiál”, térã ikatu jajapo upéva donate.mt1130.com rupive. Ore korasõite guive ningo roagradese peẽme pendepojera haguére pemeʼẽvo pene kontrivusión.