Jeremías 23:1-40
23 Jehová heʼi: “¡Aichejáranga umi pastór ohundi ha omosarambíva hína umi ovechakuéra che añangarekóvare!”.+
2 Upévare, péicha heʼi Israel Jára Jehová umi pastór kóntrape, umi oñangarekóva hína ipuévlore: “Peẽ ningo pembodiparapa che ovechakuéra ha peiko pemosarambipa chupekuéra, ha napeñangarekói hesekuéra”.+
Jehová heʼi: “Upéicha rupi pokastigáta umi mbaʼe vai pejapo vaʼekuére”.
3 “Upéi ambyatýta umi che ovechakuéra hembývape, kompletoite umi lugár amosarambi haguégui chupekuéra,+ ha agueru jeýta chupekuéra ipastotýpe,+ ha ifamília retáta ha oñembohetáta hikuái.+
4 Ha che amoĩta umi pastór oñangareko porãtava hesekuéra.+ Haʼekuéra ndokyhyjemoʼãi ni noñemondyimoʼãi, ha ni peteĩ nokañymoʼãi”, heʼi Jehová.
5 “Og̃uahẽta hína pe tiémpo”, heʼi Jehová, “amopuʼãtaha Davídpe peteĩ ifamiliare* ihústova.+ Ha peteĩ rréi ogovernáta+ ha ohechaukáta iñaranduha ha odefendéta umi mbaʼe oĩ porãva ha pe hustísia ko yvy ape ári.+
6 Ha itiémpope Judá ojesalváta,+ ha Israel oikóta pyʼaguapýpe ha ndokyhyjemoʼãi.+ Ha kóicha oñehenóita chupe: Jehová Rupive Jareko Hustísia”.+
7 Péro Jehová heʼi: “Og̃uahẽta hína pe tiémpo, ha peẽ ndapejemoʼãvéima: ‘¡Ahura Ñandejára Jehová oikovévare, upe oguenohẽ vaʼekue Israélpe Egíptogui!’.+
8 Upéva rangue pejéta: ‘¡Ahura Ñandejára Jehová oikovévare, upe oguenohẽ vaʼekue pe puévlo de Israel familiarépe pe yvy opytávagui nórte gotyo, ha kompletoite umi yvy haʼe omosarambi haguépe chupekuéra!’, ha haʼekuéra oikóta ijyvy teépe”.+
9 Umi profétape haʼe:
che korasõ ningo nomeʼẽvéima.
Che kanguekuéra oryryipa.
Ha ahendu rire Jehovápe ha umi iñeʼẽ sagrádo,che ajogua umi okaʼúvape,ha peteĩ kuimbaʼe hoʼu rasa vaʼekuépe víno.
10 Pórke ko yvýpe henyhẽ umi oporomoakãratĩva,*+
ko yvy ningo oñembyasy oñemaldesi rupi,+ha umi pásto oĩva pe ñu perõme ipirupa.+
Umi mbaʼe ojapóva hikuái ivaieterei ha oipuru vai ipodér.
11 Jehová heʼi: “Pe proféta ha avei pe saserdóte jepe ikyʼa che renondépe.*+
Che rógape jepe atopa umi mbaʼe vai ojapóva hikuái”.+
12 Jehová heʼi: “Upéicha rupi umi hapekuéra isỹi ha iñypytũta.+
Oñemyañáta chupekuéra ha hoʼáta,pórke che aguerúta hiʼarikuéra mbaʼe vai,og̃uahẽ vove pe áño ojekastigatahápe chupekuéra”.
13 “Ha ahecha umi proféta oĩva Samáriape+ ojapoha umi mbaʼe oporombojeguarúva.
Haʼekuéra oprofetisa hína Baal rérape,ha ogueraha tape vaíre che puévlo Israélpe.
14 Ha ahecha umi proféta oĩva Jerusalénpe ojapoha umi mbaʼe ivaietereíva.
Oporomoakãratĩ+ hikuái* ha ijapu oikóvo,+omokyreʼỹ* umi mbaʼe vai apohápe,ha ndohejái hikuái hembiapo vaikue.
Chéve g̃uarã haʼekuéra ojogua Sodómape,+ha umi hénte oikóva pe siudápe katu ojogua Gomórrape”.+
15 Upévare Jehová, umi ehérsito yvagapegua ruvicha, heʼi péicha umi proféta kóntrape:
“Haʼukáta chupekuéra ahénhoha y orekóva venéno.+
Pórke umi proféta oĩva Jerusalénpe omboʼe ha omosarambi japu opárupi ko yvýpe”.
16 Jehová, umi ehérsito yvagapegua ruvicha, heʼi péicha:
“Ani pehendu umi mbaʼe oprofetisáva oikóvo umi proféta.+
Haʼekuéra penembotavy hína.*
Pe visión omombeʼúva hikuái osẽ ipyʼapýguinte,+nosẽi Jehová jurúgui.+
17 Heʼi jey jey hikuái umi ndacherrespetáivape:
‘Jehová heʼi péicha: “Peikóta pyʼaguapýpe”’.+
Ha umi hénte tovaʼatãme ojapóvape chupekuéra ogustávante katu heʼi:
‘Mbaʼeve ivaíva ndoikomoʼãi nderehe’.+
18 Pórke, ¿máva piko oñemboʼy Jehová amigokuéra apytépe,ohendu ha ontende hag̃ua iñeʼẽ?
¿Máva piko ojapysaka iñeʼẽre ohendu hag̃ua?
19 Jehová omboúta yvytu atã ipochyetereíva,oúta peteĩ torménta torvellíno reheve ha ojeréta umi iñañáva akã ári.+
20 Jehová ndaipochyjeramoʼãiojapopa ha okumplipa peve umi mbaʼe orekóva ikorasõme.
Ha ág̃a umi ára pahápe peẽ pentende porãta ko mbaʼe.
21 Che namondói kuri umi profétape, upéicharamo jepe haʼekuéra odiparáma voi oho.
Che nañeʼẽi chupekuéra, péro haʼekuéra oprofetisa.+
22 Haʼekuéra oñemboʼýrire che amigokuéra apytépe,ohenduka vaʼerãmoʼã che puévlope umi che ñeʼẽ,ha oipytyvõ vaʼerãmoʼã chupekuéra ojevy hag̃ua hape vaígui ha umi mbaʼe vai ojapóvagui”.+
23 Jehová heʼi: “Che ikatu hína ahecha umi mbaʼe oikóva ápe ag̃uiete ha avei umi mbaʼe oikóva mombyry”.
24 Péicha heʼi Jehová: “¿Ikatu piko peteĩ kuimbaʼe okañy peteĩ lugár isegurohápe ha che ndahechái chupe?”.+
“¿Oĩne piko álgo che ndaikatúiva ahecha, tahaʼe pe yvágape térã yvýpe?”,+ heʼi Jehová.
25 “Che ahendu kuri umi proféta oprofetisávape japu che rérape heʼívo: ‘¡Asoña kuri peteĩ mbaʼe! ¡Asoña kuri peteĩ mbaʼe!’.+
26 ¿Arakaʼe peve piko umi proféta oikóta ijapu? Umi proféta ningo heʼi japu osẽva ikorasõguinte oporombotavy hag̃ua.+
27 Haʼekuéra oipota che puévlo hesarái che réragui umi suéño omombeʼúva rupive ojupe, ojogua hikuái umi ituakuéra ypykue hesarái vaʼekuépe che réragui Baal káusare.+
28 Pe proféta osoña vaʼekue, tomombeʼu upe osoñáva, péro pe orekóva che ñeʼẽ omombeʼu vaʼerã che haʼe hagueichaite”.
Jehová heʼi: “¿Pe trígo rakã piko ovaleve mbaʼe pe isemíllagui?”.
29 Jehová heʼi: “¿Che ñeʼẽ piko ndojoguái mbaʼe tatápe,+ ha peteĩ martíllo omonguʼívape pe ita guasu?”.+
30 Péicha heʼi Jehová: “Upévare che akastigáta umi profétape, umi okambiapávape che haʼe vaʼekue ha omombeʼu umi héntepe haʼekuéra omombeʼusévante”.+
31 “Upévare che akastigáta umi profétape”, heʼi Jehová, “umi oñeʼẽ reívape ha oikóva heʼi: ‘¡Péicha haʼe heʼi!’”.+
32 Jehová heʼi: “Upévare che akastigáta umi proféta osoñávape japu, haʼekuéra omombeʼu umíva che puévlope ha ogueraha chupekuéra tape vaíre, pórke ijapu ha oñemombaʼeguasu hikuái”.+
“Péro che namondói umi profétape ni namandái kuri chupekuéra mbaʼeve. Upévare haʼekuéra ndoguerumoʼãi mbaʼeve iporãva ko puévlope”,+ heʼi Jehová.
33 “Ha ág̃a ko puévlo térã peteĩ proféta, térã peteĩ saserdóte heʼi vove ndéve: ‘¿Máva piko hína Jehová kárga?’,* upépe nde ere vaʼerã chupekuéra: ‘“¡Peẽ hína la kárga! Ha che pomombóta”,+ heʼi Jehová’.
34 Ha pe proféta térã pe saserdóte, térã umi hénte heʼívape oikóvo: ‘¡Kóva haʼe hína Jehová kárga!’,* che akastigáta upe kuimbaʼépe ha hogayguápe.
35 Peẽ ningo péicha peje hína umi pende rapichápe ha pene ermánope: ‘¿Mbaʼe piko okontesta raʼe Jehová? ¿Ha mbaʼe piko heʼi raʼe Jehová?’.
36 Péro Jehová kárga* rehe noñeñeʼẽvéima vaʼerã, pórke káda uno ojapo hína ikargarã* upe heʼíva rupive. Peẽ pekambia Ñandejára oikovéva ñeʼẽ, Ñandejára Jehová, umi ehérsito yvagapegua ruvicha heʼíva.
37 Péicha eréta upe profétape: ‘¿Mbaʼe piko okontesta raʼe ndéve Jehová? ¿Ha mbaʼe piko heʼi raʼe Jehová?
38 Ha haʼekuéra osegíramo heʼi ndéve: “¡Kóva haʼe hína Jehová kárga!”.* Upéicharõ ere vaʼerã, péicha heʼi Jehová: “Pórke peẽ peje: ‘¡Ko ñeʼẽ haʼe hína Jehová kárga!’,* ha che haʼéma kuri peẽme: ‘Aníke peje: “¡Kóva haʼe hína Jehová kárga!”’,*
39 upévare che pojagarra ha pomombóta che renonderãgui, peẽme ha avei pe siuda ameʼẽ vaʼekue peẽme ha umi pende tuakuéra ypykuépe.
40 Ha che pomotĩta pára siémpre ha pejeapoʼíta opa árare, ha avave ndahesaraimoʼãi upévagui”’”.+
Nóta
^ Hebréope: “peteĩ hoky”.
^ Térã: “umi hénte otraisionáva Ñandejárape”.
^ Térã: “oiko chuguikuéra apóstata”.
^ Hebréope: “ombopyapy mbarete”.
^ Térã: “Otraisiona hikuái Ñandejárape”.
^ Térã: “Haʼekuéra penemyenyhẽ hína esperánsa guaʼúgui”.
^ Térã: “mensáhe ipohýiva”. Ko ñeʼẽ hebréope heʼise mokõi mbaʼe: “peteĩ mensáhe ipohýiva oúva Ñandejáragui”, térã “peteĩ mbaʼe pohýi”.
^ Térã: “mensáhe ipohýiva”.
^ Térã: “mensáhe ipohýiva”.
^ Térã: “mensáhe ipohýiva”.
^ Térã: “mensáhe ipohýiva”.
^ Térã: “mensáhe ipohýiva”.
^ Térã: “mensáhe ipohýiva”.
