Mateo 4:1-25
4 Upéi, Ñandejára espíritu ogueraha Jesúspe desiértope ha pe Diablo+ ou omoñuhã hag̃ua chupe.+
2 Jesús ndoʼúi mbaʼevete 40 día aja, ha iñembyahyieterei.
3 Upémarõ pe Diablo+ oñehaʼãmbaite oity chupe ñuhãme heʼívo: “Ndéramo añete Ñandejára raʼy, ejapo koʼã itágui pan”.
4 Ha haʼe okontesta chupe: “Ñandejára Ñeʼẽme heʼi: ‘Yvypóra noikotevẽi pan añónte oikove hag̃ua, síno oikotevẽ opaite mbaʼe Jehová* heʼíva’”.+
5 Upémarõ pe Diablo ogueraha Jesúspe Jerusalénpe*+ ha ohupi chupe pe témplo murálla ári, pe ijyvatevehápe,+
6 ha heʼi chupe: “Ndéramo añete Ñandejára raʼy, ejepoi koʼágui. Ñandejára Ñeʼẽme heʼi: ‘Haʼe omandáta hiʼanhelkuérape oñangareko hag̃ua nderehe’. Ha heʼi avei: ‘Haʼekuéra nderupíta ipópe ani hag̃ua reñepysanga ni peteĩ itáre’”.+
7 Jesús okontesta chupe: “Ñandejára Ñeʼẽme heʼi avei: ‘Ndovaléi redesafia Jehová* nde Járape’”.+
8 Upéi pe Diablo ogueraha Jesúspe peteĩ montáña ijyvatetereívape, ha ohechaukapaite chupe umi goviérno oĩva ko múndope ha umi rrikésa orekóva,+
9 ha heʼi chupe: “Koʼã mbaʼe ameʼẽmbaitéta ndéve reñesũramo che renondépe ha una ves jepe cheadora”.
10 Upémarõ Jesús osẽ heʼi chupe: “¡Tereho koʼágui Satanás! Ñandejára Ñeʼẽme heʼi: ‘Ñandejára Jehovápe* readora vaʼerã+ ha chupe añoite reservi vaʼerã’”.+
11 Upémarõ pe Diablo oheja Jesúspe,+ ha ou umi ánhel oñatende hese.+
12 Upéi Jesús oikuaa ojegueraha hague préso Juánpe,+ ha oho Galiléape.+
13 Ha osẽ rire Nazarétgui, oho oiko Capernaúmpe+ pe mar kóstape, Zabulón ha Neftalí territóriope.
14 Péicha oñekumpli Ñandejára heʼi vaʼekue proféta Isaías rupive:
15 “Galilea, pe lugár oikohápe heta extranhéro, reĩva Zabulón ha Neftalí yvýpe. Nde reime pe tape ohóvape mar gotyo, Jordán oéste gotyo.
16 Umi hénte oĩva pytũmbýpe ohecha peteĩ lus hesakã porãva. Upe lugárpe pe ñemano ojagarrapa, péro umi hénte oguapýva upépe, upéi ohecha peteĩ lus+ ohesapeha hesekuéra”.+
17 Upe ára guive Jesús oñepyrũ opredika ha heʼi: “Peñarrepentíke, pórke pe Rréino yvagapegua hiʼag̃uimbaitéma”.+
18 Upéi, oguatávo ohóvo pe Mar de Galilea kóstare, Jesús ohecha mokõi kuimbaʼe oñoermánova: Simón hérava avei Pedro,+ ha Andrés. Haʼekuéra ningo peskadór ha oity hína irréd márpe.+
19 Ha haʼe heʼi chupekuéra: “Peju chemoirũ ha pomboʼéta pejagarra hag̃ua hénte, pejagarraháicha pira”.+
20 Upepete oheja hikuái irréd ha oho hendive.+
21 Ohomiévo upégui ohecha Santiago ha Juánpe, haʼéva oñoermáno avei. Haʼekuéra Zebedeo raʼy+ ha oĩ peteĩ varkoʼípe itúandi, orremenda hína hikuái umi rred. Jesús ohenói chupekuéra.+
22 Upepete haʼekuéra oheja pe varkoʼi ha itúape, ha oho Jesús ndive.
23 Jesús oho Galilea tuichakuére,+ omboʼe umi sinagogahárupi+ ha omombeʼu umi notísia porã oñeʼẽva Ñandejára Rréinore. Avei omonguera opaichagua mbaʼasy orekóva umi hénte.+
24 Ha umi mbaʼe Jesús ojapóva ojekuaa Siria peve. Ha ojegueru hendápe entéro umi osufríva, umi orekóva opaichagua mbaʼasy,+ endemoniádo,+ epiléptiko+ ha paralítiko, ha haʼe omonguera chupekuéra.
25 Upévare omoirũ chupe hetaiterei hénte oúva Galilea, Decápolis,* Jerusalén ha Judéagui, ha avei umi oikóva ojehasávo pe Rrío Jordán.
