KAPÍTULO 37

¿Ajevautisáma vaʼerã?

Emarka oimépa verdadéro o fálso:

Kristianokuéra ojevautisa vaʼerã katuete.

□ Verdadéro

□ Fálso

Umi ojevautisáva ojapo upéva ani hag̃ua hoʼa pekádope.

□ Verdadéro

□ Fálso

Rejevautisáramo nepytyvõta ikatu hag̃uáicha rejesalva.

□ Verdadéro

□ Fálso

Nderejevautisáiramo, Ñandejára nandehusgamoʼãi umi mbaʼe rejapóvare.

□ Verdadéro

□ Fálso

Ne amigokuéra ojevautisáramo heʼise nde reimemaha preparádo avei.

□ Verdadéro

□ Fálso

¿REIKÓPA hína la Biblia heʼiháicha? ¿Reñehaʼãpa reiko Ñandejára amígoramo? ¿Remombeʼúpa ótrope umi mbaʼe regueroviáva? Oimérõ mbohapyve porandúpe rembohovái si, ikatu repensáma hína rejevautisávo, péro upe mboyve tekotevẽ rehecha reimémapa hína preparádo. Upearã ikatu rehecha oĩ porãpa umi mbaʼe remarka vaʼekue oñepyrũvo ko kapítulo.

 ● Kristianokuéra ojevautisa vaʼerã katuete.

Verdadéro. Jesús omanda vaʼekue idisipulokuérape ojevautisa hag̃ua (Mateo 28:19, 20). Haʼe voi omeʼẽ pe ehémplo ojevautisávo, upévare resegi hag̃ua iñehémplo, nde avei tekotevẽ rejevautisa reñandu vove reĩmaha preparádo ha neakãguapymaha.

● Umi ojevautisáva ojapo upéva ani hag̃ua hoʼa pekádope.

Fálso. Pe vautísmo rupive entéro ikatu oikuaa nde reñemeʼẽma hague Jehovápe. Upéva rupive ikatu rehechauka Jehovápe reikoseha haʼe oipotaháicha, ha ndahaʼéi rejapóva upéva reñandúguinte oĩha ndeovligáva remboyke hag̃ua umi mbaʼe vai ikatúva ndestira.

● Rejevautisáramo nepytyvõta ikatu hag̃uáicha rejesalva.

Verdadéro. Ikatu hag̃uáicha jajesalva la Biblia heʼi iñimportantetereiha jajevautisa (1 Pedro 3:21). Upéicharõ jepe ndajajapói vaʼerã ñapenságui upéva ñandeprotehetaha oimeraẽ mbaʼe ikatúvagui ojehu ñandéve. Jadesidi vaʼerã jajapotaha upéva jahayhúgui Jehovápe ha jaserviségui chupe ñande pyʼaite guive opa ára g̃uarã (Marcos 12:29, 30).

 ● Nderejevautisáiramo, Ñandejára nandehusgamoʼãi umi mbaʼe rejapóvare.

Fálso. Santiago 4:17 heʼi: “Oĩramo oikuaáva mbaʼépa pe oĩ porãva péro ndojapói, upéva opeka hína”, tahaʼe ojevautisámava térã nahániri. Upévare tekotevẽ rentende porã mbaʼépa Jehová ohaʼarõ ndehegui, ha avei tekotevẽta neakãguapy ikatu hag̃uáicha rehechakuaa oimépa rejapo hína upéva. Oimérõ upéicha, ikatu reñeʼẽ nde tuakuérandi térã ótro kristiáno iñexperiensiavéva ndive, haʼekuéra nepytyvõkuaa reg̃uahẽ hag̃ua pe vautísmope.

● Ne amigokuéra ojevautisáramo heʼise nde avei reimemaha preparádo rejevautisa hag̃ua.

Fálso. Ndete redesidi vaʼerã nde pyʼaite guive rejevautisataha (Salmo 110:3). Redesidi vaʼerã upéva entende porã rire ae mbaʼépa heʼise oiko ndehegui testígo de Jehová, ha reime rire segúro reĩmaha preparádo rejagarra hag̃ua pe rresponsavilida (Eclesiastés 5:4, 5).

 Peteĩ desisión iñimportantetereíva

Pe vautísmo haʼe peteĩ mbaʼe iñimportantetereíva ñande rekovépe ha upéva rupive ikatu jahupyty heta vendisión. Péro avei haʼe tuicha rresponsavilida, pórke ñakumplipaite vaʼerã umi mbaʼe ñapromete vaʼekue Jehovápe.

¿Reimémapa preparádo rejevautisa hag̃ua? Oimérõ upéicha, katuete revyʼaiterei. Ndaipóri ningo priviléhio tuichavéva ikatúva rehupyty: reservi Jehovápe nde pyʼaite guive opa ára g̃uarã (Mateo 22:36, 37).

MBAʼÉPA JAHECHÁTA PE ÓTRO KAPÍTULOPE

Eñehaʼã emoĩ méta ikatútava rehupyty reaprovechapaite hag̃ua nde rekove.

KEY SCRIPTURE

“[Pemeʼẽ] pende rete ha pende rekove pemeʼẽrõguáicha peteĩ ofrénda sagráda, Ñandejára oaseptátava. Ha peipuru pene akã ha pene pensamiénto peservi hag̃ua chupe” (Romanos 12:1).

PETEĨ KONSÉHO

Ikatu ejerure nde tuakuérape heʼi hag̃ua ndéve mávapa ikatu avei nepytyvõ kongregasiónpe reg̃uahẽ hag̃ua pe vautísmope (Hechos 16:1-3).

¿REIKUAÁPA RAʼE?

Pe vautísmo nepytyvõ reguereko hag̃ua pe “márka” reikotevẽva rejesalva hag̃ua (Ezequiel 9:4-6).

UMI MBAʼE AJAPÓTAVA

Ikatu hag̃uáicha ag̃uahẽ pe vautísmope, ¿mbaʼe enseñánsa bíblicapa tekotevẽ antende porãve? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa repensa pe vautísmo haʼeha peteĩ desisión isériova?

● ¿Mbaʼérepa heta mitãrusu ha mitãkuña ojevautisa jepi oĩ mboyve preparádo?

● ¿Mbaʼérepa oĩ jepi mitãrusu ha mitãkuña ohaʼarõitereíva oñemeʼẽ hag̃ua Ñandejárape ha ojevautisa?

[Komentário oĩva páhina 306-pe]

“Siémpre chemanduʼa ajevautisamaha, péva chepytyvõ ani hag̃ua adesidi vai ha upéi asufri umi konsekuénsia” (Noemí).

 [Taʼanga ha rrekuádro oĩva páhina 307-pe]

Umi mbaʼe ikatúva reñeporandu pe vautísmore

¿Mbaʼépa orrepresenta pe vautísmo? Reikévo pe ýpe haʼete remanóva, pórke nerepensamoʼãvéima ndejehénte. Upéi resẽvo pe ýgui haʼete reikove jeýva rejapo hag̃ua opaite mbaʼe Jehová ohaʼarõva ndehegui.

¿Mbaʼépa heʼise ñañemeʼẽ Ñandejárape? Heʼise jahejaha Jehová pópe ñande rekove kompletoite ha ndajadesidivéi ñandejeheguínte la jajapótava (Mateo 16:24). Upévare og̃uahẽ mboyve pe rejevautisaha día peteĩ ñemboʼépe repromete vaʼerã Jehovápe rejapotaha haʼe oipotáva añoite.

¿Mbaʼépa rejapo vaʼerã rejevautisa mboyve? Reiko la Biblia heʼiháicha ha emombeʼu ótrope umi mbaʼe regueroviáva. Tekotevẽ avei eñemoag̃uive Ñandejárare, upearã restudia vaʼerã la Biblia neañoháme ha eñemboʼe meme. Ndete rejedesidi vaʼerã reservi Jehovápe ha ndahaʼéi ótro heʼíguinte ndéve.

¿Mboy áño ereko vaʼerã ejevautisa hag̃ua? Pe eda ndahaʼéi la iñimportantevéva. Reguerekónte vaʼerã peteĩ eda ikatuhápe rehechauka neakãguapyha ha rentendeha mbaʼépa heʼise eñemeʼẽ Jehovápe.

¿Mbaʼépa rejapokuaa nde tuakuéra heʼírõ ndéve rehaʼarõve vaʼerãha? Oimérõ haʼekuéra opensa ikuentaveha rehaʼarõmie ikatu hag̃uáicha remoĩ en práktika umi konsého bíblico, ikuentavéta rehendúrõ chupekuéra, ha rehaʼarõ aja eñehaʼã eñemoag̃uive Jehováre (1 Samuel 2:26).

 [Rrekuádro oĩva páhina 308 ha 309-pe]

Rekompleta hag̃ua

¿Repensámapa rejevautisávo?

Umi porandu koʼápe oĩva nepytyvõta reikuaa hag̃ua reho porãpa hese. Ha rembohovái mboyve aníkena nderesarái relee vaʼerãha umi téxto.

¿Mbaʼe mbaʼépa rejapo hína rehechauka hag̃ua rejeroviaha Jehováre? (Salmo 71:5). ․․․․․

¿Mbaʼéichapa rehechaukáma rediferensiakuaaha umi mbaʼe iporãva umi ivaívagui? (Hebreos 5:14). ․․․․․

¿Reñemboʼe memépa? ․․․․․

¿Remombeʼúpa Jehovápe umi mbaʼe rehasáva? ¿Ojekuaápa umi mbaʼe erévare ne ñemboʼépe añetehápe rehayhuha Jehovápe? (Salmo 17:6). ․․․․․

¿Mbaʼéichapa repensa ikatuha remehora ne ñemboʼe? ․․․․․

¿Rejapo memépa nde estúdio personál? (Josué 1:8). ․․․․․

¿Mbaʼeichagua informasiónpa reipuru restudia jave? ․․․․․

¿Mbaʼe mbaʼépa repensa ikatuha rejapo omehora hag̃ua nde estúdio personál? ․․․․․

 ¿Reñehaʼãpa ndekatupyryve predikasiónpe? (Por ehémplo: ¿reexplikakuaápa umi mbaʼe la Biblia omboʼéva?, ¿rehópa revisita jey umi persóna oñeinteresávape?, ¿reñehaʼãpa rekonsegi estúdio bíblico?).

□ Si □ No

¿Resẽpa predikasiónpe nde túa ha nde sy nosẽiramo jepe? (Hechos 5:42).

□ Si □ No

¿Mbaʼépa ikatu rejapo remehorave hag̃ua predikasiónpe? (2 Timoteo 2:15). ․․․․․

¿Reho memépa rreunionhápe térãpa refalta meme? (Hebreos 10:25). ․․․․․

¿Mbaʼéichapa repartisipa jepi rreunionhápe? ․․․․․

Oiméramo nde tuakuéra opermiti ndéve, ¿rehópa rreunionhápe haʼekuéra ndohóiramo jepe?

□ Si □ No

¿Revyʼápa añetehápe rejapóvo Jehová rembipota? (Salmo 40:8).

□ Si □ No

¿Oĩmapa ndejopýva rejapo hag̃ua álgo ivaíva? ¿Mbaʼéichapa reaguanta kuri upe situasión? (Romanos 12:2).

¿Mbaʼépa rejapóta resegi hag̃ua remongakuaa ne mborayhu Jehováre? (Judas 20, 21).

¿Mbaʼépa rejapóta nde túa, nde sy térã ne amigokuéra ohejáramo Jehovápe, resegítapa reservi chupe? (Mateo 10:36, 37).

□ Si □ No

[Taʼanga oĩva páhina 310-pe]

Peteĩ persóna omendátava ojagarra peteĩ kompromíso isériova ha opensa porã vaʼerã, ha upeichaite avei peteĩ ojevautisátava