Jesús ojotopa rire Marta ha María ndive og̃uahẽ mboyvemi Betániape, oho hikuái Lázaro sepultúrape. Upéva ningo peteĩ itakua oñembotýva peteĩ ita guasúpe. Jesús heʼi: “Peipeʼa pe ita”. Marta ojepyʼapy, pórke nontendéi mbaʼépa la Jesús ojaposéva, ha heʼi: “Karai, ojapóma ningo cuatro día omano hague ha oiméne inéma”. Péro Jesús heʼi chupe: “¿Ndaʼéi piko ndéve raʼe regueroviáramo rehechataha Ñandejára tuichaha?” (Juan 11:39, 40).

Upémarõ oipeʼa hikuái pe ita ha Jesús omaña yvágare ha oñemboʼe: “Che Ru, aagradese ndéve cherendu haguére. Añetehápe, che aikuaa voi akóinte nde cherenduha; péro añemboʼe ndéve koʼã hénte oĩva koʼápe oguerovia hag̃ua nde chembou hague”. Péicha Jesús ohechauka umi  héntepe Ñandejára omeʼẽha chupe podér oporomoingove jey hag̃ua. Upéi hatã osapukái: “¡Lázaro, esẽ!”. Ha Lázaro osẽ. Ipo ha ipy ojeliapa gueteri umi télape ha hova katu ojejahoʼi páñope. Jesús heʼi: “Peipeʼa chugui umi ojejokuaha ha peheja toho” (Juan 11:41-44).

Heta hudío ou vaʼekue okonsola María ha Mártape, oñepyrũ ojerovia Jesús rehe ohechávo pe milágro. Péro oĩ avei umi pyaʼe ohóva omombeʼu la oikóva umi fariséope. Upémarõ umi fariséo ha saserdotekuéra ombyaty pe Sanedrín, haʼéva hína pe trivunál hudío iñimportantevéva. Pe Sanedrínpe oĩ avei pe saserdóte prinsipál hérava Caifás. Koʼã kuimbaʼe apytégui oĩ heʼíva: “¿Mbaʼéiko jajapóta? Pe kuimbaʼéngo ojapo heta milágro. Jahejáramo osegi péicha enterove ojeroviáta hese ha umi rrománo oúta oipeʼa ñandehegui ñane témplo ha ñane retã” (Juan 11:47, 48). Umi hénte omombeʼu opárupi umi milágro Jesús ojapóva, péro umi líder rrelihióso ohendúramo jepe koʼã mbaʼe, ni michĩmi ndoguerohorýi Jesús rembiapo. Haʼekuéra oikuaa Jesús ojapoha umi milágro Ñandejára podér rupive, péro ojepyʼapy ijehénte ha ndoperdeséi ipuestokuéra.

Lázaro rresurreksión ndouporãiete umi saduséope, pórke haʼekuéra ndogueroviái umi omanóva oikove jeytaha. Caifás, haʼéva avei saduséo, heʼi: “Peẽ ndapeikuaái mbaʼeve, ha ndapehechakuaái ñane retã iñimportanteveha peteĩ kuimbaʼégui. Iporãvéngo haʼe omano oñehundipa rangue ko tetã” (Juan 11:49, 50; Hechos 5:17; 23:8).

Caifás ningo oreko tuicha autorida haʼe rupi pe saserdóte prinsipál. Péro haʼe ndeʼíri koʼã mbaʼe “ijehegui reínte”, síno Ñandejára voi omoĩ chupe upéva ijurúpe. Caifás heʼise kuri ojejuka vaʼerãha Jesúspe anive hag̃ua ojapeligra ipuestokuéra ha ijautorida. Upéicharõ jepe, pe profesía haʼe heʼíva ohechauka avei Jesús omanotaha, ndahaʼéi voi umi hudío rehehápente, “síno avei ombyaty hag̃ua peteĩ atýpe Ñandejára raʼykuéra isarambipa vaʼekue” (Juan 11:51, 52).

Caifás okonsegi la oipotáva ha pe Sanedrín oñepyrũ oplanea mbaʼéichapa ojukáta Jesúspe. Ndajaikuaái noiméipa Nicodemo oho raʼe oavisa Jesúspe la oikóva. Haʼe ningo oĩ avei pe Sanedrínpe ha ojerovia Jesúsre. Tahaʼe haʼeháicha, Jesús osẽ Jerusaléngui ani hag̃ua ojejuka chupe og̃uahẽ mboyve pe tiémpo Ñandejára omeʼẽva chupe.