Oiméne ñanemanduʼa Jesús orekórõ guare 12 áño oñemongeta hague umi mboʼehárandi pe témplope. Koʼág̃a ohasáma 17 áño, ha og̃uahẽma pe primavéra del áño 29. Heta hénte imanduʼajoa Juan rehe, haʼéva hína Jesús pariénte. Haʼe opredika oikóvo heta siudáre pe oéste gotyo, rrío Jordán ypýrupi.

Enterovénte oñesorprende ohendúvo mbaʼéichapa Juan opredika, ha avei ohecharamo hikuái mbaʼéichapa oñemonde. Ijao ojejapo kaméllo raguekuégui ha oipuru peteĩ sinturón de kuéro. Avei oñealimenta tuku ha eirete kaʼaguýre. Péro, ¿mbaʼépa pe mensáhe opredikáva? Haʼe heʼi: “Peñarrepentíke, [pórke] pe Rréino yvagapegua hiʼag̃uimbaitéma” (Mateo 3:2).

Pe mensáhe Juan opredikáva opoko umi hénte korasõre. Oĩ heta ohechakuaáva tekotevẽha oñarrepenti, térã okambia vaʼerãha opensa lája ha ohejaite umi mbaʼe vai ojapo vaʼekue. “Umi hénte oĩva Jerusalénpe, ha enterove umi oikóva Judéape ha pe Jordán jerére” oho Juan rendápe (Mateo 3:5). Heta umi oúva hendápe oñarrepenti ha ojevautisa. Juan ovautisávo koʼã persónape, omoñapymiete voi chupekuéra pe rrío Jordánpe. ¿Mbaʼérepa ovautisa umi héntepe?

Haʼekuéra ojevautisa ohechauka hag̃ua oñarrepentiha ipyʼaite guive nokumplíri haguére pe pákto de la Léi, ojejapo vaʼekue Ñandejárandi (Hechos 19:4). Péro naentéroi ikatu ojevautisa. Por ehémplo, umi fariséo ha saduséo oúrõ guare hendápe, Juan omongavaju chupekuéra heʼívo: “Peẽ mbói ñemoñare. [...] Peheja pene rembiapo vai ha pehechauka peñarrepentiha. Ha animoʼãke peje pendejupe: ‘Ore ru ningo Abrahán’. Che haʼe peẽme Ñandejára ikatuha koʼã itágui jepe omopuʼã Abrahánpe ifamiliarã. Pe hácha oĩma hína oikytĩ hag̃uáicha umi yvyramáta hapo guive. Upévare, entéro yvyramáta ndahiʼaporãiva ojeitýta ha ojepoíta tatápe” (Mateo 3:7-10).

Hetaiterei hénte ou Juan rendápe ohendu hag̃ua chupe ha ojevautisa hag̃ua. Upévare umi hudío omondo umi saserdóte ha levítape oporandu hag̃ua Juánpe: “¿Máva piko nde?”.

Haʼe okontesta: “Che ndahaʼéi hína pe Cristo”.

Ha oporandu jey hikuái: “¿Máva upéicharõ? ¿Elías piko?”.

Haʼe heʼi: “Nahániri”.

Haʼekuéra imanduʼa Moisés heʼi hague outaha peteĩ proféta. Upévare oporandu hikuái: “¿Pe Proféta oñepromete vaʼekue piko?” (Deuteronomio 18:15, 18).

Juan orresponde jey: “¡Nahániri!”.

Haʼekuéra oinsisti Juánpe ha heʼi: “¿Máva piko nde?, eréna oréve roho hag̃ua romombeʼu umi orembou vaʼekuépe. ¿Mbaʼépa ere ndejehe?”. Ha Juan ombohovái: “Che hína pe osapukáiva desiértore: ‘Pembojoja asy Jehová rape’, heʼi haguéicha proféta Isaías” (Juan 1:19-23).

Upéi heʼi hikuái: “Nde ndahaʼéiramo Cristo, ni Elías ni pe Proféta oñepromete vaʼekue, ¿mbaʼérepa upéicharõ reporovautisa?”. Haʼe okontesta: “Che aporovautisa ýpe. Pende apytépe katu oñemboʼy peteĩ peẽ peikuaaʼỹva, haʼe ou che rapykuéri” (Juan 1:25-27).

Juan oikuaa opreparaha hína umi héntepe ikatu hag̃uáicha ojerovia pe Mesías oñepromete vaʼekuére, haʼétava hína Rréi. Oñeʼẽvo pe Mesías rehe, Juan heʼi: “Che rire oútava katu imbareteve hína chehegui ha namereséi ni isandália aipeʼa chupe” (Mateo 3:11). Ha heʼi avei: “Pe oúva che rapykuéri oñemotenondéma cherehe, haʼe ningo oĩma vaʼekue che mboyve” (Juan 1:15).

Añetehápe ningo iñimportanteterei pe mensáhe Juan opredikáva. Haʼe oanunsia: “Peñarrepentíke, cháke pe Rréino yvagapegua hiʼag̃uimbaitéma” (Mateo 3:2). Péicha haʼe ohechauka pe Rréi Jehová omoĩ vaʼekue, haʼéva hína Jesucristo, oñepyrũ potaitemaha hembiapo ko yvy ape ári.