OHASÁMA 3 áño Jesús oiko hague opredika ha haʼe oikuaa porã hiʼag̃uimaha omanotaha ára. Umi omoakãva hudiokuéra rrelihión oñembyaty ohecha hag̃ua mbaʼéichapa ikatu ojuka chupe. Péro okyhyje hikuái umi héntegui, oĩgui heta ogueroviáva Jesús haʼeha peteĩ proféta. Upémaramo Satanás ombotavy Júdaspe, ha haʼe ovende Jesúspe 30 monéda de plátare.

Jesús oñembyaty ijapostolkuérandi Paskuarã. Upéi Judas oho rire heʼi chupekuéra ogueromanduʼavaʼerãha omano hague ára. Jesús ojagarra peteĩ pán ha oñemboʼe rire itúvape ombohasa idisipulokuérape. Upéi heʼi: “Kóva niko che rete, oñemeʼẽva penderehehápe. Pejapo kóva penemanduʼávo cherehe”. Avei ojagarra peteĩ kópa de víno ha heʼi: ‘Kóva heʼise pe kompromíso pyahu, ojejapóva che ruguy rupive’ (Lucas 22:​19, 20).

Upe pyhare Jesús heta oñemoñeʼẽ idisipulokuérape ha omanda chupekuéra peteĩ mbaʼe iñimportantetereíva, tojoayhu hikuái ipyʼaite guive. Upéi heʼi: “Pejoayhúramo opavave ohechakuaáta peẽ haʼeha che remimboʼe” (Juan 13:​34, 35). Heʼi avei chupekuéra ani hag̃ua oheja oguapy hesekuéra upe oikótava hese. Ha oñemboʼe ikorasõ mbytete guive Jehovápe oñangareko hag̃ua hemimboʼekuérare. Oho mboyve pe hardín de Getsemanípe opuraheijoa hikuái Jehovápe.

Og̃uahẽ rire upépe Jesús oñesũ ha oñemboʼe itúvape ipyʼaite guive. Upeichaháguinte ohecha ouha atýra soldádo ha saserdotekuéra ojagarra hag̃ua chupe. Judas oñemboja Jesús rehe ha ohetũ chupe, péicha umi soldádo oikuaáta mávapepa oguerahavaʼerã préso. Ijapostolkuéra katu okañymbaite upégui.

Upéi Jesús heʼi mburuvichakuéra renondépe haʼeha Ñandejára raʼy. Umi hués ipochyeterei ha heʼi oñeʼẽ vaiha Ñandejárare ha omanovaʼerãha upévare. Upémaramo ojegueraha Poncio Pilato rendápe, peteĩ mburuvicha Romaygua. Haʼe opilla Jesús ndojapói hague mbaʼeve ivaíva, péro umi hénte ojopýgui chupe ohejámante ojejuka.

Upéi umi soldádo ogueraha Jesúspe peteĩ lugárpe hérava Gólgota ha upépe ojejuka chupe. Upeichaháguinte iñypytũmbaite pe ára ha omano rire oiko peteĩ yvyryrýi hatãitereíva. Upéi hetekue oñemoĩ peteĩ panteónpe ojejapovaʼekue itakuápe, oñemboty porã ha opyta peteĩ soldádo oñatende upépe. Mbaʼépa oikóta chugui koʼág̃a? Upéva jahecháta pe párte oúvape.

(Oñeguenohẽ Mateo kapítulo 26 ha 27; Marcos kapítulo 14 ha 15; Lucas kapítulo 22 ha 23; ha Juan kapítulo 12-19-gui.)