PÁRTE 25
Konsého kristianokuérape g̃uarã
Santiago, Pedro, Juan ha Judas ohai heta kárta omokyreʼỹ hag̃ua kristianokuérape
LA Bíbliape ojehai heta kárta omombaretéva ñande jerovia ha ñanepytyvõva akóinte ñamotenonde hag̃ua Ñandejára rréino. Jahechamíta umi ohaivaʼekue Santiago ha Judas, koʼãva hína Jesús ermanoanga. Ha avei ohaíva apóstol Pedro ha Juan. Koʼã 4 kuimbaʼe ohai 7 kárta Ñandejára espíritu rupive. Ñahesaʼỹijomína jahecha hag̃ua mbaʼépa ñanemboʼe.
Jahechaukavaʼerã jajeroviaha. Ndahaʼéi jaʼentevaʼerã jajeroviaha Jehováre, upéva jahechaukavaʼerã ñande rembiapóre. Santiago heʼi voi: ‘Jerovia tembiapoʼỹre omanoite’ (Santiago 2:26, ÑÑB). Jahasáramo heta mbaʼe ijetuʼúva ñaneñeʼẽrendúgui Jehovápe, upéi ñande jerovia imbareteve. Avei upéicha jave ikatu jajerure Jehovápe tañanepytyvõ. Ha akóinte jaháramo tape porãre Jehová ñandeguerohorýta (Santiago 1:2-6, 12). Upévare Santiago ohai: ‘Peñemoag̃ui Ñandejárare ha haʼe oñemoag̃uíta penderehe’. Haʼe ningo katuete ñanepytyvõta jajerovia ha ñaneñeʼẽrendúramo chupe (Santiago 4:8).
Ñamombaretevaʼerã ñande jerovia ani hag̃ua jaha tape vaíre. Judas ningo oikovaʼekue hénte aña ha hekovaíva apytépe, upévare heʼi: ‘Peñehaʼãmbaitékena pende jeroviáre’ (Judas 3).
Ñanderekopotĩkena. Jehová oipota ñanderekoporã ha ñanepotĩ. Pedro ohai: ‘Ñandejára kuatiañeʼẽme heʼi: “Peẽ penemarangatuvaʼerã, che chemarangatuháicha”’ (1 Pedro 1:15, 16, JMP). Upearã ñahaʼangavaʼerã Jesúspe, ha apóstol Pedro heʼi haʼe omoĩ hague ñandéve ehémplo ‘jaguata hag̃ua ipyporére’ (1 Pedro 2:21, JMP). Ijetuʼúramo jepe jajapo Jehová heʼíva, ñañehaʼãvaʼerã jaikuaágui iñimportanteha ñane ‘konsiénsia ipotĩ’ (1 Pedro 3:16, 17, ÑÑB). Pedro heʼi avei tekotevẽha ñanderekopotĩ ha jahechauka ñane rembiapóre ñamombaʼeguasuha Ñandejárape. Péicha jajapovaʼerã og̃uahẽ meve pe ára Ñandejára ñandehusga hag̃ua ha igoviérno oguerútava “tekojoja” (2 Pedro 3:11-13).
‘Peñemoag̃ui Ñandejárare ha haʼe oñemoag̃uíta penderehe.’ (Santiago 4:8)
Jajoayhuvaʼerã. Apóstol Juan heʼi: ‘Ñandejára ningo mborayhu’. Haʼe ohechauka ñanderayhuha “omboúvo itaʼýra peteĩete ko yvy ári” omano hag̃ua ñanderayhupápe. Mbaʼépa jajapovaʼerã ñande upéicharõ? Juan heʼi: ‘Che pehẽnguekuéra, Ñandejára peichaite peve ñanderayhu haguére ñande avei jajoayhuvaʼerã’ (1 Juan 4:8-11). Ha ikatu jahechauka jahayhuha ñane ermanokuérape ñanembaʼeporãvo hendivekuéra oikotevẽ jave (3 Juan 5-8).
Mbaʼéichapa ikatu jahechauka jahayhuha Jehovápe? Apóstol Juan heʼi: ‘Jahayhu Ñandejárape heʼise jajapo haʼe heʼíva, ha upéva ndaipohyiri’ (1 Juan 5:3; 2 Juan 6). Umi iñeʼẽrendúva Jehovápe ikatu oiko Ñandejára mborayhúpe ohaʼãrõ aja pe ‘jeikove opaveʼỹva’ (Judas 21).
(Oñeguenohẽ Santiago; 1 Pedro, 2 Pedro; 1 Juan, 2 Juan, 3 Juan, ha Judas kuatiañeʼẽgui.)
