“Ñandejára, nde ningo rehendu umi hénte ñemboʼe, ne rendápe oúta opaichagua persóna” (Salmo 65:2).

Heta hénte ningo oñemboʼe pórke heʼi péicha oñeñandu porãveha, ndogueroviáiramo jepe oĩha hína álgien ohendúva chupe. Péro pe ñemboʼe ningo ndahaʼéi ñanepytyvõnteva ñañeñandu porãve hag̃ua, ikatu hag̃uáicha ñambohovái ñane provlemakuéra. Upéva rangue la Biblia oasegura ñandéve ‘Jehová * ndohejaiha umi hese ojeroviávape, umi persóna sinséramente oñemboʼévape chupe. Haʼekuéra ojerure jave ajúda, katuete haʼe ohendu chupekuéra’ (Salmo 145:18, 19).

Upéicharõ, ikatu ñaĩ segúro Ñandejára Jehová ñanerenduha ñañemboʼe jave chupe. Mborayhúpe ningo haʼe heʼi ñandéve: “Ha peẽ pecherenóita, pejúta ha peñemboʼéta chéve, ha che pohendúta” (Jeremías 29:12).

“Siémpre peñemboʼe” (Romanos 12:12).

La Biblia ningo ñanemokyreʼỹ ñañemboʼe meme hag̃ua, ha avei jajapo hag̃ua opaichagua ñemboʼe. Ojekuaa porã Ñandejára Jehová oipotaitereiha ñañemboʼe chupe (Mateo 26:41; Efesios 6:18).

¿Mbaʼérepa Ñandejára oipota ñañemboʼe chupe? Epensamíntena, ajépa peteĩ túa ovyʼaiterei itaʼyraʼi térã itajyraʼi heʼi jave chupe: “Papa, ¿ikatu piko chepytyvõmi?”. Jaikuaaháicha, pe túa oiméne oikuaáma voi raʼe mbaʼépa oikotevẽ ifamília, péro ohendu jave ojerureha chupe ajúda, ohechakuaa pe ifamília okonfiaha hese. Upéicha avei ñande ñañemboʼe jave Ñandejára Jehovápe, jahechauka hína chupe ñakonfiaha hese ha ñañemoag̃uiseha hese (Proverbios 15:8; Santiago 4:8).

“Ha pemoĩ ipópe entéro mbaʼe pendepyʼapýva, pórke haʼe ojepyʼapy penderehe” (1 Pedro 5:7).

Ñandejára ningo oipotaiterei ñañemboʼe chupe pórke haʼe ñanderayhu ha ojepyʼapy ñanderehe. Haʼe ningo oikuaapaite umi ñane provlemakuéra ha avei umi mbaʼe ñanekevrantáva, upévare ñanepytyvõse.

Oikove aja pukukue, rréi David oñemboʼe vaʼekue Jehovápe oipytyvõ hag̃ua chupe, avei omombeʼu hag̃ua chupe umi mbaʼe opensáva ha oñandúva (Salmo 23:1-6). ¿Mbaʼépa Ñandejára opensa vaʼekue David rehe? Ñandejára ohayhu vaʼekue Davídpe ha ohendu oñemboʼe jave chupe (Hechos 13:22). Upéicha avei, Ñandejára ohendu ñañemboʼe jave chupe pórke haʼe ojepyʼapy ñanderehe.

Péicha heʼi vaʼekue peteĩ kuimbaʼe oskrivi vaʼekue peteĩ Salmo oĩva la Bíbliape. Ko kuimbaʼe oĩ vaʼekue segúro Ñandejára ohenduha iñemboʼe ha upéva oipytyvõiterei chupe. Haʼe oñandu Ñandejára haʼeha iñamigoite, ha upéva oipytyvõ chupe oaguanta hag̃ua ijetuʼúrõ guare hendive (Salmo 116:1-9).

Jaikuaávo Ñandejára ohenduha ñane ñemboʼe, siémprema ñañemboʼeséta chupe. Epensamína la oiko vaʼekuére Pedro rehe, oikóva nórte gotyo Espáñape. Peteĩ aksidéntepe, omano chugui peteĩ itaʼýra oreko vaʼekue 19 áño. Upérõ Pedro heta vése oñemboʼe Ñandejárape omombeʼu hag̃ua chupe mbaʼéichapa oñeñandu, ha avei oipytyvõmi hag̃ua chupe. ¿Mbaʼépa oiko upéi? Pedro heʼi: “Jehová orresponde che ñemboʼe ha chepytyvõ chéve ha che rembirekópe roñeñandu porãve hag̃ua. Upearã ojevale ore amigokuérare haʼéva avei testígo de Jehová”.

Pe ñemboʼe ndahaʼéi omoingove jey vaʼekue itaʼýrape, péro oipytyvõ Pedro ha ifamíliape heta hendáicha. Hembireko María del Carmen heʼi: “Pe ñemboʼe chepytyvõ kuri aaguanta hag̃ua aĩ vaietereírõ guare. Che aikuaa Jehová ontende hague che situasión, pórke añemboʼe rire chupe tuicha añeñandu porãve”.

La Biblia ha avei umi mbaʼe ohasa vaʼekue heta persóna, ohechauka porã Ñandejára ohenduha ñane ñemboʼe. Upéicharõ jepe jaʼekuaa avei Ñandejára norrespondeiha entéro ñemboʼe. ¿Mbaʼérepa Ñandejára orresponde unos kuánto ñemboʼénte ha ótro katu nahániri?